ТУБАНЛИККА ИНТИЛГАНЛАР

Шарқ халқлари азал-азалдан аёлни аъзозлаб келган. Жамиятимизда ҳозирги кунда ҳам аёлларнинг роли беқиёс. Турли жабҳаларда амалга оширилаётган ислоҳотлар-у бунёдкорликларда ҳиссаси катта уларнинг.

Афсус надоматлар бўлсинки, аёл номига, ўзи тенги пок қалбли, эзгу орзу-умидли аёллар номига доғ туширадиган, ҳаётда ўз олдига мақсад қўйиб мақсадлари сари интилиб яшаш ўрнига тубанликка интилувчи аёллар ҳам бор.

"Қангли” овулида истиқомат қилувчи Гулзода Ҳайитбоева (исм фамилиялар ўзгартириб берилмоқда) ҳам шу йўлни танлади. У ҳалол меҳнат қилиб ўз туғилган элида ҳурматли, обрўли бўлиб яшаш, оиласида фарзандларини баркамол инсонлар қилиб вояга етказиб, тинч-хотиржам умргузаронлик қилишдан кўра, эгри йўлни танлади. Эгриликнинг умри қисқа эканлигини ўйламади...

Гулзода 2011 йилнинг сентябрь ойида тергов даврида шахсини аниқлаш имкони бўлмаган кимсадан 1 пакетда соф вазни 5 грамм бўлган героин гиёҳвандлик моддасини олиб, олдиндан таниш бўлган Тахиатош шаҳри "Хоразм” кўчаси 18 уйда яшовчи Бобур Солиевга 600 минг сўмга сотган.

У турмуш ўртоғи Оботов Оллоёр билан жиноий тил бириктириб, 2011 йил 2 октябрь куни яна шу миқдордаги "оғу”ни Бобур Солиевга сотган. 28 октябрь куни шу фаолият билан қўлга тушган Бобур ўзини таъминлаб турган аёл исмини, манзилини милиция ходимларига айтишидан қўрқиб, гўё "изсиз йўқолишди”. Йўқ, наркобизнес эр-хотин хато ўйлашган экан. Ҳуқуқ тартибот ходимлари Гулзодани Россия давлатининг Москва шаҳрида қўлга олишди.

Гулзода Ҳайитбоева қонунга хилоф равишда сотиш, ташиш, сақлаш ва истеъмол қилиш ман этилган гиёҳванд моддалар савдоси билан шуғулланганлиги учун қилмишига яраша жазо олди, олти йил муддатга озодликдан маҳрум қилиш, жазоси тайинланди. Жазо муддатининг ўталмаган қисми Ўзбекистон Республикаси Олий Мажлиси Сенатининг 2012 йил 5 декабрдаги "Ўзбекистон Республикаси Конституцияси қабул қилинганлигининг 20 йиллиги муносабати билан амнистия тўғрисида”ги Қарорининг 7 банди "а” кичик бандига асосан учдан бир қисми қисқартирилди. 9 млн. 900 минг сўмлик "Тико” русумли шахсий автомашинаси эса жиноят қуроли сифатида давлат фойдасига мусодара қилинди.

Эзгу, тўғри йўл қолиб тубанликка интилган Гулзода бу одил ҳукмдан тегишли хулоса чиқариб олса, қанийди?!

"Холимбег” овулида яшовчи Бахтиёр Муродов ҳам Гулзода каби тайёрлаш, олиш, сотиш, ташиш таъқиқланган гиёҳвандлик моддалар савдоси билан шуғулланиб, бахтли ва фаровон яшашни орзу қилганларнинг бири. У Хозарасп туманида яшовчи таниши Илҳом Тўраев билан жиноий тил бириктириб, 85,33 грамм трияк (опий) кўп миқдордаги гиёҳвандлик моддасини 450 минг сўмга сотиб олиб, ўзининг яшаш уйида сақлаб қўйган.

У 2011 йилнинг 4 февралида "Дўрман” овулининг Хоразм вилояти билан чегарадош ҳудудида Гурлан тумани "Бирлашган” қишлоқ фуқаролар йиғинида яшовчи Озодбек Худойбергановга 20 грамм трияк (опий) гиёҳвандлик моддасини сотди. Бу билан ҳам чекланмай, 9 февраль куни 61,08 грамм кўп миқдордаги "оғу”ни Озодбек Худойберганов ва унинг туғишган акаси Ботирларга бир миллион эллик минг сўмга сотаётган вақтида ҳуқуқ-тартибот идоралари ходимлари томонидан қўлга олинди.

Бахтиёр Муродовнинг уйи тинтув қилинганида, унинг ётоқхонасида турган сариқ дублёнкасининг ички замокли чўнтагидан қоғоз бўлакчаси ичида сариқ рангли целлофан пакетга ўралган тўртбурчак шаклда 4,25 грамм трияк (опий) моддаси топилди.

Бу қилмишлари учун унга жиноят ишлари бўйича туман суди 10 йил муддатга озодликдан маҳрум қилиш жазосини тайинлади.

Ҳа, нопок йўл ҳеч қимни яхши манзилга етказмаганидек, 1976 йилда туғилган, уч нафар фарзанднинг отаси Бахтиёрни ҳам 10 йил муддатга темир панжара ичида яшашга маҳкум этди.

Айни умрининг энг жўшқин даврида, оиласидан айро 10 йил қамоқ жазосини ўтайдиган Бахтиёрнинг тақдири, қанийди, ушбу "заҳри қотил” тўрига илинганларга, савдоси билан шуғулланиб бой бўлишини орзу қилаётганларга сабоқ бўлса? Қанийди...

П.ДОШМУРАТОВ,

жиноят ишлари бўйича туман суди раиси.

(Фото - http://kun.uz)