МУСТАҚИЛЛИК - ЭНГ УЛУҒ, ЭНГ АЗИЗ НЕЪМАТ

Мамлакатимиз истиқлолга эришган сана – 1 сентябрь – мустақиллик байрами тобора яқинлашиб келмоқда. Айни кунларда бутун юртимиз бўйлаб мустақиллигимизнинг 22 йиллигини муносиб кутиб олишга қизғин тайёргарлик ишлари давом этмоқда.

Мустақиллик - бугун биз эришган юксак марраларга қанот бўлган куч. Бугун юртимизнинг ҳар бир гўшасида бўй кўрсатиб турган озод ва обод Ватан манзаралари, аввало, истиқлол шарофатидандир. Шу боис халқимиз ҳар йили энг улуғ ва энг азиз байрамимизни ўзгача шукуҳ, кўтаринки кайфият билан кутиб олади.

Бугун мамлакатимизда қўлга киритилаётган ютуқлар ва эришилаётган янги-янги марралар ҳақида гапирганда, бу ютуқларнинг туб асосида истиқлолнинг илк кунларидан белгилаб олинган «Инсон манфаати — ҳар нарсадан улуғ», «Инсон, унинг ҳуқуқ ва эркинликлари ҳамда манфаатлари — энг олий қадрият», «Ислоҳот ислоҳот учун эмас, аввало инсон учун, унинг фаровон ҳаёти учун», «Ҳамма нарса — инсон учун, унинг келажаги учун» каби кўплаб эзгу даъватлар ва ҳаётбахш ғоялар турганини мамнуният билан тилга оламиз.

Мустақиллик бизга энг аввало ўзлигимизни қайтариб берди. Ким эканимизни, қандай буюк зотлар авлоди эканимизни, ҳеч кимдан кам эмаслигимизни ва ҳеч қачон кам бўлмаслигимизни англаб, ўтган 22 йиллик тарихан қисқа даврда дунё ҳамжамиятида ўз ўрнимизга, ўз сўзимизга эга бўлдик.

Мустақиллик бизга инъом этган ҳуқуқлар жуда кўп. Масалан, биргина мулкдорлик ҳуқуқини олайлик. Бундан 22 йил олдин «хусусий мулк» деган тушунчанинг ўзи йўқ эди. Истиқлол шарофати билан бугун юртимизда ҳар бир инсон мулкдор бўла олади, тадбиркорлар сафи йил сайин ортиб бормоқда. Барчамизга маълумки, Ўзбекистон Республикаси мустақиллигининг дастлабки кунлариданоқ мамлакатимизда иқтисодиётнинг ғоят муҳим соҳаси бўлмиш кичик бизнесни ривожлантиришни рағбатлантиришга, хусусий тадбиркорлик ҳуқуқларининг кафолатлари ва ҳимоясининг кучли тизимини яратишга жуда катта эътибор бериб келинмоқда.

Президентимиз Ислом Каримов раҳнамолигида мамлакатимизда ишбилармонлик муҳитини яхшилаш, рухсат бериш тартиб-таомилларини соддалаштириш, солиқ ва статистик ҳисоботларни қисқартиришга қаратилган қонун ҳужжатлари ва норматив актлар мажмуасининг қабул қилиниши кичик бизнес субъектлари ривожига хизмат қилмоқда.

Тадбирокорларнинг қонун билан кафолатланган ҳуқуқлари ва манфаатларини ҳимоя қилиш, уларнинг ривожланишига тўсиқ бўлаётган муаммоларни бартараф этиш борасида туман Прокуратураси томонидан қатор амалий ишлар қилинмоқда. Жумладан, жорий йилнинг ўтган 6 ойи давомида 8 та ҳолатда Прокуратура аралашуви билан тадбиркорларнинг поймол қилинган ҳуқуқлари тикланди. Прокуратурада ташкил қилинган 007 рақамли ишонч телефонига тадбиркорлардан 4 та қўнғироқлар келиб тушган бўлса, телефон орқали мурожаатларда айтилган муаммоларнинг барчаси тадбиркорлар фойдасига ҳал қилинди.

Шуни фахр билан айтиш мумкинки, бугун юртимизнинг ҳар бир фуқароси истиқлол берган ана шу ҳуқуқ – тадбиркорлик билан шуғулланиб, мулкдор бўлиш, ўз оиласи, ўзи яшаётган ҳудуд ва мамлакатимиз иқтисодиётининг ривожланишига ҳисса қўшиш бахтига эга.

Фурсатдан фойдаланиб, ана шундай бахтни ўзининг олий мақсади, Ватанимиз тараққиётига ҳисса қўшишни фарзандлик бурчи, деб билган ҳолда турли соҳаларда ишлаб, меҳнат қилаётган ҳар бир юртдошимизни яқинлашиб келаётган энг улуғ ва энг азиз байрамимиз – мустақиллигимизнинг 22 йиллиги билан табриклайман.

Қадр-қимматимиз, таянчимиз ва ифтихоримиз бўлмиш муқаддас Ватанимиз ҳамиша тинч, халқимиз омон, турмушимиз обод ва истиқлолимиз абадий бўлсин!

Фархад АЛЛАМБЕРГЕНОВ,

туман прокурори, адлия маслаҳатчиси.