СИФАТЛИ ТИББИЙ ХИЗМАТ КЎРСАТИШ ЙЎЛИДА
Мамлакатимизда мустақиллик йилларида инсон омилига эътибор, унинг бахтиёр ва фаровон яшаши учун ғамхўрлик кучайди. Булар албатта тиббиёт соҳасида олиб борилган ислоҳотлар билан чамбарчас боғлиқ.
Соғликни сақлаш тизимини янада такомиллаштириш, тиббиёт муассасалари фаолияти самарали бўлишига эришиш, жаҳон андозалари талабларига мувофиқ аҳолига юқори сифатли тиббий ёрдам кўрсатиш бош вазифа қилиб қўйилган бугунги кунда туман тиббиёт бирлашмасига қарашли муассасаларда ҳам улуғвор вазифаларнинг ижроси таъминланмоқда.
Бирлашмага қарашли кўп тармоқли марказий поликлиникада Манғит шаҳри аҳолисига тиббий хизмат кўрсатилади. Кейинги йилларда давлати-мизнинг аҳоли саломатлигини муҳофаза қилишга, баркамол авлоднинг шаклланишига, оилада тиббий маданиятни юксалтиришга қаратаётган эътибори туфайли аҳолининг саломатлик кўрсаткичлари се-зиларли даражада яхшиланди. Кунлик қабул қилиш қуввати 785 одамга мўлжалланган поликлиникамизда 22 турдаги мутахассислар томонидан беморлар қабул қилинади. Бу борада 70 нафар шифокор, 90 нафар ҳамшира, 22 нафар кичик ҳамширалар ўз хизмат вазифасини сидқидилдан адо этмоқдалар.
Муассасамиз биноси 2012 йилда капитал реконструкция қилиниб, қабул учун қулай шароитлар яратилди ҳамда жаҳон андозалари талаблари даражасидаги замонавий диагностика тиббий асбоб-ускуналари ўрнатилди. Жумладан рақамли рентген аппарати, ультратовуш текшируви аппарати, шунингдек, кўз касалликларини аниқлайдиган рефроктометр билан таъминланди.
Яратилган имкониятлар беморларга аниқ ташҳис қўйиш ва даволашни самарали олиб боришга имконият туғдиради.
Жорий йилнинг ўтган даври мобайнида муассасамизда 409 982 та қатнов қайд қилиниб, беморларнинг аксарияти амбулатор шароитларда соғломлаштирилди.
Бугунги кунда жаҳон тиббиёти тажрибалари беморларга аниқ ташҳис қўйилиб, амбулатор шароитларда соғломлаштирилиши қулай ва самарали бўлишини кўрсатмоқда. Буни инобатга олган ҳолда поликлиникамизда меҳнат қиладиган шифокорлар ва ўрта тиббиёт ходимларининг касб малакаси ва маҳоратини ошириб боришга доимий эътибор бераяпмиз. Шунинг натижасида 70 фоиз шифокорларимиз, 33 фоиздан ортиқ ўрта тиббиёт ходимларимиз касб тоифасига эга бўлишди.
Муассасамизда ва унга қарашли бўлган 19 та қишлоқ врачлик пунктларимизда беморларга сифатли тиббий хизмат кўрсатиш билан бирга касалликларнинг олдини олиш учун эмлаш, касалликлардан сақланиш йўл-йўриқлари, соғлом турмуш кечириш афзалликлари аҳоли орасида кенг тарғиб қилинаяпти. Умумтаълим мактаблари ўқувчилари йилига бир марта тизимли равишда энг малакали мутахассислар иштирокида бепул тиббий кўрикдан ўтказилмоқда. Аҳолининг кенг қатламлари орасида ўтказилаётган тиббий кўриклар туфайли кўпгина касалликлар аниқланиб, даво чоралари кўрилаяпти.
Жорий йилимизнинг "Кексаларни эъзозлаш йили” дея номланишига мувофиқ қабул қилинган дастурга асосан туманимизда истиқомат қилувчи нуроний ёшдаги отахон ва онахонларимизга алоҳида ғамхўрлик кўрсатилаётир. Иккинчи жаҳон уруши ва фронт орти меҳнат фахрийлари махсус уй аптечкалари билан таъминланди ва уларга шифокорлар бириктирилди.
Фурсатдан фойдаланиб, аҳоли соғлигини сақлаш ва сифатли тиббий хизмат кўрсатиш йўлида сидқидилдан меҳнат қилаётган тиббиёт ходимларини касб байрами билан қизғин қутлайман!
Бахтиёр МУХТОРОВ,
туман марказий кўп тармоқли поликлиникаси мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
