МУСТАҚИЛЛИК - ЧЕКСИЗ ИМКОНИМИЗ

Президентимизнинг "Ўзбекистон Республикаси давлат мустақиллигининг йигирма тўрт йиллик байрамига тайёргарлик кўриш ва уни ўтказиш тўғрисида”ги қарорида шу давр мобайнида босиб ўтган оғир ва машаққатли, айни вақтда шарафли йўлимиз, кенг кўламли ислоҳотларимиз, қўлга киритган улкан ютуқларимизнинг туб моҳияти ҳамда аҳамиятини юртимиз ва жаҳон жамоатчилигига етказиш, биз кеча ким эдигу бугун ким бўлганимизни англаш, ватандошларимизни янги марралар сари руҳлантириш, энг улуғ, энг азиз айёмимиз бўлмиш Мустақиллик байрамини юксак даражада ўтказиш бўйича бир қатор вазифалар белгилаб берилди.

Мамлакатимиз мустақилликка эришганига 24 йил тўлди. Ана шу қисқа муддат ичида Ўзбекистон мустақил давлат сифатида дунё харитасидан мустаҳкам ўрнини топди, барча соҳаларда улкан ютуқларга эришди, халқаро ҳамжамият эътирофига сазовор бўлди. Бундай кенг кўламли ислоҳотлар инсон манфаатларини таъминлаш, ҳуқуқ ва эркинликларини ҳимоя қилишга қаратилган бўлиб, бу аввало, юртдошларимизнинг эртанги кунга ишончи тобора ортиб, айниқса, ёшларнинг Ватан тақдирига, тараққиётига дахлдорлик туйғуси кучайиб бораётганида янада яққол намоён бўлмоқда. Албатта, бу Истиқлол шарофати, яратиб берилаётган шарт-шароит ҳамда амалга оширилаётган саъй-ҳаракатлар самараси, десак, асло муболаға бўлмайди.

Шу нуқтаи назардан айтганда, мустақилликнинг илк йиллариданоқ аҳоли, биринчи навбатда, кекса авлод вакиллари, хотин-қизлар ва ёшларга алоҳида эътибор ҳамда ғамхўрлик кўрсатиш, уларнинг ҳуқуқ ва манфаатларини таъминлаш, оила, оналик ҳамда болаликни ҳимоя қилиш мамлакат сиёсатининг устувор йўналишларидан бирига айланди. Бинобарин, давлатимиз томонидан аҳолини ижтимоий муҳофаза қилишга сарфланаётган маблағ ҳам йилдан-йилга ошиб бораётгани эътиборга молик.

Бугунги кунда давлат бюджетининг 60 фоизидан кўпи аҳолини ижтимоий қўллаб-қувватлашга йўналтирилаётгани социал соҳани мустаҳкамлаш, пировардида халқимизнинг турмуш фаровонлигини янада юксалтиришда катта ўрин тутмоқда.

Фаровонлик ҳақида сўз кетганда, таъкидлаш жоизки, давлатимиз раҳбарининг бевосита ташаббуси билан оилаларнинг ижтимоий-иқтисодий имкониятларини яхшилаш масаласига алоҳида эътибор қаратилмоқда. Ҳар бир оила даромадини ошириш, унда фарзандларни баркамол вояга етказиш, уларнинг интилишларини қўллаб-қувватлаш, пухта билим ҳамда касб-ҳунарга эга бўлишларини таъминлаш ҳаётий заруратга айланди. Ўтган давр мобайнида бу борада қабул қилинган бир қатор қонунлар ушбу йўналишдаги ишларни изчил давом эттиришда ҳуқуқий асос бўлаётир.

Бугун аҳолининг аксарият қисми кичик бизнес ва хусусий тадбиркорлик, уй меҳнати билан самарали шуғулланиб келмоқда. Бу каби фаолият билан шуғулланиш истагидаги оилаларга республикамиздаги тижорат банклари томонидан имтиёзли кредитлар ажратилаётгани, уларнинг ташаббуслари ҳар томонлама қўллаб-қувватланаётгани эса диққатга сазовордир.

Бугун мамлакатимиз ялпи ички маҳсулотининг 56 фоизи кичик бизнес ва хусусий тадбиркорлик ҳиссасига тўғри келмоқда. Бунга албатта, ўз-ўзидан эришилгани йўқ. Мустақиллик йиллари давомида Ўзбекистон иқтисодиёти ва хусусий секторнинг ҳар томонлама ривожланишини таъминловчи мустаҳкам қонунчилик базаси яратилди.

Жорий йилнинг 15 май куни мамлакатимиз Президенти томонидан хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш бўйича қабул қилинган Фармон иқтисодиётимизни ривожлантириш тизимли равишда мустаҳкам йўлга қўйилганлигидан далолатдир.

Умуман айтганда, мамлакатимизда мустақиллик йилларида барча соҳада амалга оширилаётган кенг кўламли ислоҳотлар мазмун-моҳиятини аҳолига тушунтиришда биз, Олий Маж-лис Қонунчилик палатаси депутатлари ҳам фаоллик кўрсатишимиз мақсадга мувофиқдир. Фуқароларнинг ҳуқуқ ҳамда манфаатларини таъминлашга оид қонунлар, айниқса, Президентимизнинг мазкур Фармони аҳамиятини кенг жамоатчиликка етказиш, бу бўйича жойларда учрашувлар, жонли мулоқотлар ташкил этиш айни муддаодир. Зеро, мазкур саъй-ҳаракатлар жамиятда соғлом ва барқарор муҳитни қарор топтиришга, мамлакатимизнинг янада тараққий этишига хизмат қилади.

Жолдасбай Абдижамилов,