MUSTAQILLIK - ChEKSIZ IMKONIMIZ

Prezidentimizning "Oʻzbekiston Respublikasi davlat mustaqilligining yigirma toʻrt yillik bayramiga tayyorgarlik koʻrish va uni oʻtkazish toʻgʻrisida”gi qarorida shu davr mobaynida bosib oʻtgan ogʻir va mashaqqatli, ayni vaqtda sharafli yoʻlimiz, keng koʻlamli islohotlarimiz, qoʻlga kiritgan ulkan yutuqlarimizning tub mohiyati hamda ahamiyatini yurtimiz va jahon jamoatchiligiga yetkazish, biz kecha kim edigu bugun kim boʻlganimizni anglash, vatandoshlarimizni yangi marralar sari ruhlantirish, eng ulugʻ, eng aziz ayyomimiz boʻlmish Mustaqillik bayramini yuksak darajada oʻtkazish boʻyicha bir qator vazifalar belgilab berildi.

Mamlakatimiz mustaqillikka erishganiga 24-yil toʻldi. Ana shu qisqa muddat ichida Oʻzbekiston mustaqil davlat sifatida dunyo xaritasidan mustahkam oʻrnini topdi, barcha sohalarda ulkan yutuqlarga erishdi, xalqaro hamjamiyat eʼtirofiga sazovor boʻldi. Bunday keng koʻlamli islohotlar inson manfaatlarini taʼminlash, huquq va erkinliklarini himoya qilishga qaratilgan boʻlib, bu avvalo, yurtdoshlarimizning ertangi kunga ishonchi tobora ortib, ayniqsa, yoshlarning Vatan taqdiriga, taraqqiyotiga daxldorlik tuygʻusi kuchayib borayotganida yanada yaqqol namoyon boʻlmoqda. Albatta, bu Istiqlol sharofati, yaratib berilayotgan shart-sharoit hamda amalga oshirilayotgan saʼy-harakatlar samarasi, desak, aslo mubolagʻa boʻlmaydi.

Shu nuqtai nazardan aytganda, mustaqillikning ilk yillaridanoq aholi, birinchi navbatda, keksa avlod vakillari, xotin-qizlar va yoshlarga alohida eʼtibor hamda gʻamxoʻrlik koʻrsatish, ularning huquq va manfaatlarini taʼminlash, oila, onalik hamda bolalikni himoya qilish mamlakat siyosatining ustuvor yoʻnalishlaridan biriga aylandi. Binobarin, davlatimiz tomonidan aholini ijtimoiy muhofaza qilishga sarflanayotgan mablagʻ ham yildan-yilga oshib borayotgani eʼtiborga molik.

Bugungi kunda davlat byudjetining 60 foizidan koʻpi aholini ijtimoiy qoʻllab-quvvatlashga yoʻnaltirilayotgani sotsial sohani mustahkamlash, pirovardida xalqimizning turmush farovonligini yanada yuksaltirishda katta oʻrin tutmoqda.

Farovonlik haqida soʻz ketganda, taʼkidlash joizki, davlatimiz rahbarining bevosita tashabbusi bilan oilalarning ijtimoiy-iqtisodiy imkoniyatlarini yaxshilash masalasiga alohida eʼtibor qaratilmoqda. Har bir oila daromadini oshirish, unda farzandlarni barkamol voyaga yetkazish, ularning intilishlarini qoʻllab-quvvatlash, puxta bilim hamda kasb-hunarga ega boʻlishlarini taʼminlash hayotiy zaruratga aylandi. Oʻtgan davr mobaynida bu borada qabul qilingan bir qator qonunlar ushbu yoʻnalishdagi ishlarni izchil davom ettirishda huquqiy asos boʻlayotir.

Bugun aholining aksariyat qismi kichik biznes va xususiy tadbirkorlik, uy mehnati bilan samarali shugʻullanib kelmoqda. Bu kabi faoliyat bilan shugʻullanish istagidagi oilalarga respublikamizdagi tijorat banklari tomonidan imtiyozli kreditlar ajratilayotgani, ularning tashabbuslari har tomonlama qoʻllab-quvvatlanayotgani esa diqqatga sazovordir.

Bugun mamlakatimiz yalpi ichki mahsulotining 56 foizi kichik biznes va xususiy tadbirkorlik hissasiga toʻgʻri kelmoqda. Bunga albatta, oʻz-oʻzidan erishilgani yoʻq. Mustaqillik yillari davomida Oʻzbekiston iqtisodiyoti va xususiy sektorning har tomonlama rivojlanishini taʼminlovchi mustahkam qonunchilik bazasi yaratildi.

Joriy yilning 15-may kuni mamlakatimiz Prezidenti tomonidan xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish boʻyicha qabul qilingan Farmon iqtisodiyotimizni rivojlantirish tizimli ravishda mustahkam yoʻlga qoʻyilganligidan dalolatdir.

Umuman aytganda, mamlakatimizda mustaqillik yillarida barcha sohada amalga oshirilayotgan keng koʻlamli islohotlar mazmun-mohiyatini aholiga tushuntirishda biz, Oliy Maj-lis Qonunchilik palatasi deputatlari ham faollik koʻrsatishimiz maqsadga muvofiqdir. Fuqarolarning huquq hamda manfaatlarini taʼminlashga oid qonunlar, ayniqsa, Prezidentimizning mazkur Farmoni ahamiyatini keng jamoatchilikka yetkazish, bu boʻyicha joylarda uchrashuvlar, jonli muloqotlar tashkil etish ayni muddaodir. Zero, mazkur saʼy-harakatlar jamiyatda sogʻlom va barqaror muhitni qaror toptirishga, mamlakatimizning yanada taraqqiy etishiga xizmat qiladi.

Joldasbay Abdijamilov,