Мустақилликнинг 35 йиллиги олдидан Бобур номли овулда ҳашар ўтказилди
Шу кунларда бутун мамлакатимиз бўйлаб Ўзбекистон Республикаси давлат мустақиллигининг 35 йиллигини муносиб кутиб олиш ва кенг нишонлашга катта тайёргарлик кўрилмоқда. Давлатимиз раҳбарининг 2026 йил 1 апрелдаги «Ўзбекистон Республикаси давлат мустақиллигининг 35 йиллигини кенг нишонлашга тайёргарлик кўриш ва уни ўтказиш тўғрисида»ги қарори бу борада муҳим дастуриламал бўлиб хизмат қилмоқда. Мазкур ҳужжатда ушбу қутлуғ айёмни Янги Ўзбекистоннинг бугунги улкан салоҳияти ҳамда жаҳон майдонидаги тобора ошиб бораётган нуфузига мувофиқ тарзда, юксак савияда ўтказиш бўйича қатор устувор вазифалар ва аниқ топшириқлар белгилаб берилган. Бу эзгу мақсадлар йўлида юртимизнинг ҳар бир гўшасидаги маҳалла ва овулларда байрам шукуҳи эрта бошланди.
Амударё туманининг овул ва маҳаллаларида ҳам ушбу энг улуғ, энг азиз байрамимизга бағишланган тайёргарлик ишлари аллақачон қизғин паллага кирган. Азал-азалдан халқимиз ҳар қандай тўй ва тантанани, қутлуғ байрамни энг аввало ўз атрофини, маҳалла-кўйни тозалаш, ободонлаштириш ва кўкаламзорлаштириш ишларидан бошлаган. Бу гўзал анъана бугунги кунда ҳам ўз аҳамиятини йўқотмасдан, жамият жипслигини таъминловчи муҳим омил бўлиб келмоқда.
Ана шундай эзгу мақсадларни ўзида мужассам этган ҳолда, тумандаги Бобур номли овул фуқаролар йиғинида мустақиллигимизнинг 35 йиллиги олдидан ҳашар ташкил қилинди. Овул фуқаролар йиғини раиси Даврон Шукурлаев ташаббуси билан ўтган мазкур экологик тадбирда овул аҳолиси ва маҳалланинг энг фаол фуқаролари уюшқоқлик билан иштирок этишди.
Ҳашар доирасида ҳудуд қиёфасини тубдан яхшилаш ва яшил майдонларни кенгайтиришга алоҳида эътибор қаратилди. Хусусан, овулга кириш йўлида, аниқроқ қилиб айтганда, Жумуртов йўлидан бошлаб то овул фуқаролар йиғини маъмурий биноси ёнигача бўлган масофада йўлнинг бир томонига манзарали арча кўчатлари экилди.
Бу хайрли ишда жамоатчилик вакилларининг ўзаро ҳамжиҳатлиги яққол кўзга ташланди. Жумладан, туман бош имом-хатиби Абдураҳмон ҳожи Матсапаев мазкур савобли ишга ўз ҳиссасини қўшиб, ҳомийлик асосида 90 туп арча кўчатлари ҳамда уларнинг бақувват ўсишини таъминловчи биогумус ўғитларини тақдим этди.
Шу куни илгариги ҳашарлар вақтида экилган, аммо турли сабабларга кўра тутиб кетмаган ва ривожланмай қолган арча кўчатларининг ўрнига янги ниҳоллар ўтқазилди. Шу билан биргаликда, айни вақтда йўл бўйида яшнаб ўсиб турган 90 туп арчага шакл берилиб, уларнинг кўриниши янада кўркамлаштирилди.
Бобур номли овулда амалга оширилган бундай ободонлаштириш ишлари юртимизда олиб борилаётган бунёдкорлик сиёсатининг жойлардаги амалий ифодасидир. Биргина маҳалла мисолида кўзга ташланаётган бундай аҳиллик, яратувчанлик ва табиатга бўлган меҳр-эътибор, албатта, яқинлашиб келаётган Ўзбекистон Республикаси давлат мустақиллигининг 35 йиллик шодиёналарига муносиб туҳфа бўлади. Зеро, озод ва обод Ватанни биргаликда барпо этиш, унинг ҳар бир қарич ерини кўз қорачиғидек асраб-авайлаш ҳамда келажак авлодга яшил ва тоза табиат қолдириш барчамизнинг умумий бурчимиз эканини шу каби амалий ҳаракатлар, уюшқоқлик билан ўтказилаётган ободонлаштириш ишлари яна бир бор исботламоқда. Бу каби хайрли ташаббуслар байрам кунларига қадар юртимизнинг барча ҳудудларида изчил давом этади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
