Музқаймоқ ва салқин ичимликлар сифати назорат қилинмоқда
Ёзнинг жазирама кунлари бошланиши билан инсон организмининг салқин ичимликлар ва музқаймоқ маҳсулотларига бўлган эҳтиёжи табиий равишда ортиб боради. Бироқ, жазирама иссиқда бундай маҳсулотларни истеъмол қилиш нафақат роҳат бағишлайди, балки маълум санитария қоидаларига риоя этилмаса, саломатлик учун жиддий хавф туғдириши ҳам мумкин.
Айнан шу жиҳатларни ҳисобга олган ҳолда, мавсумий юқумли касалликларнинг олдини олиш мақсадида Амударё тумани Санитария-эпидемиологик осойишталик ва жамоат саломатлиги бўлими томонидан туман маркази ҳамда чекка ҳудудлардаги савдо дўконлари ва кўчма шохобчаларда кенг қамровли ўрганиш ишлари олиб борилмоқда. Ушбу тадбирлардан кўзланган асосий мақсад – ишлаб чиқарилган жойи ва сақлаш шароитлари номаълум бўлган, сифати кафолатланмаган маҳсулотларнинг савдога чиқарилишига чек қўйишдир. Жараён давомида бўлим мутахассислари маҳсулотлардан намуналар олиб, уларни лаборатория шароитида кимёвий ҳамда бактериологик текширувдан ўтказади ва тегишли хулосалар беради.
Сут ва сут маҳсулотлари, хусусан, музқаймоқ тез ва осон бузилувчи маҳсулотлар тоифасига киради. Уни ишлаб чиқариш ва сотиш жараёнида санитария-гигиена талабларига амал қилмаслик овқатдан заҳарланиш ҳолатларига олиб келиши мумкинлиги сабабли назорат тадбирлари кучайтирилмоқда.
Музқаймоқ ишлаб чиқаришда фақатгина белгиланган совитиш ҳароратига амал қилиш кифоя эмас. Корхоналарда ишлаб чиқаришни автоматлаштириш, ускуна ва анжомларни мунтазам тозалаб туриш, жараёнда тозаликни сақлаш муҳим аҳамият касб этади. Бундан ташқари, ишлатиладиган табиий ва қуруқ сутлар ҳамда турли қўшимчаларнинг сифати ва хавфсизлигини кафолатловчи махсус сертификатлари бўлиши қатъий талаб қилинади. Тайёр маҳсулот қадоғида эса ишлаб чиқарувчи корхонанинг номи, ишлаб чиқарилган санаси, яроқлилик муддати ва сақланиш шароитлари аниқ кўрсатилиши шарт. Ушбу маҳсулотлар фақат турғун савдо шохобчаларида, махсус совутгичларда сақланган ҳолда мижозларга тақдим этилиши лозим.
Маҳсулот хавфсизлиги билан бирга савдо ходимларининг санитария ҳолати ҳам муҳим аҳамиятга эга. Музқаймоқ ва салқин ичимликлар ишлаб чиқарувчи ҳамда сотувчи ходимлар Ўзбекистон Республикаси Соғлиқни сақлаш вазирлигининг махсус буйруғи асосида мунтазам равишда даврий тиббий кўрикдан ўтган бўлишлари, махсус тоза кийимда ишлашлари ва шахсий гигиена қоидаларига қатъий амал қилишлари керак. Қолаверса, ичимликлар ва музқаймоқлар мижозларга фақат бир маротаба ишлатиладиган идишларда қуйиб берилиши, фойдаланиб бўлингач, ушбу идишлар яроқсиз ҳолатга келтирилиб, махсус контейнерларда йиғилиши шарт.
Шу ўринда, мутахассислар барча фуқароларни янада огоҳ бўлишга чақиради. Ёзнинг иссиқ кунларида қуёш нури тик тушадиган очиқ шароитда сақланган, полиэтилен идишлардаги чанқоқбосди ичимликларни харид қилишдан сақланинг. Шунингдек, кўча-кўйларда уй шароитида тайёрланган, санитария талабларига жавоб бермайдиган номаълум идишларга солинган ўрик шарбати, айрон, гўжа, морс ва квасс каби ичимликларни истеъмол қилиш тавсия этилмайди. Бундай маҳсулотлар иссиқда ўзининг сифати ва хавфсизлигини тезда йўқотади ҳамда ўткир юқумли ичак касалликларига сабаб бўлиши мумкин. Харид жараёнида эриб қолган, қадоғининг бутунлиги бузилган ёки ҳар хил ускуналарда тайёрланган шубҳали музқаймоқларни асло сотиб олманг.
Истеъмол қилаётган маҳсулотингизнинг сақлаш шароитига ва яроқлилик муддатига доимо эътибор қаратиш орқали ўзингиз ва яқинларингиз саломатлигини мустаҳкам ҳимоя қилган бўласиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
