Амударё туманида ижтимоий соҳа объектлари қурилиши жадаллашмоқда

Сўнгги йилларда юртимизда қишлоқ жойларни ҳар томонлама ривожлантириш, аҳоли пунктларининг меъморий қиёфасини замон талаблари асосида янгилаш, йўл-транспорт ва муҳандислик-коммуникация инфратузилмасини такомиллаштириш, шунингдек, ижтимоий соҳа объектларини барпо этишга қаратилган кенг кўламли ислоҳотлар амалга оширилмоқда. Ушбу чора-тадбирлар қишлоқ жойларда замонавий инфратузилмани шакллантириш, аҳоли учун муносиб яшаш шароитини яратиш ва турмуш маданиятини юксалтиришда муҳим ўрин тутмоқда. Айниқса, халқаро ҳамкорликдаги лойиҳалар доирасида амалга оширилаётган ишлар орқали ҳудудлардаги инфратузилмавий муаммолар босқичма-босқич бартараф этилмоқда.

Хусусан, 2021 йил 18 сентябрда қабул қилинган Ўзбекистон Республикаси Президентининг “Ислом тараққиёт банки ва ОПЕК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисида”ги Қарори ушбу йўналишда муҳим дастуруламал бўлиб хизмат этмоқда.

Лойиҳа Ислом тараққиёт банки ҳамда ОПЕК халқаро тараққиёт жамғармаси молиявий кўмаги асосида амалга оширилаётган бўлиб, бугунги кунда Амударё туманида бир қатор ижтимоий соҳа объектларида қурилиш ишлари жадал суръатда олиб борилмоқда. Бу жараёнда 4 та пудратчи ташкилот фаол иштирок этмоқда.

Қурилиш жараёнлари туман прокуратураси томонидан белгиланган тартибда ўрганиб чиқилиб, объектлар доимий назоратга олинган. Хусусан, “Замин қурилиш транс сервис” МЧЖ томонидан бир нечта ҳудудда мактабгача таълим муассасалари барпо этилмоқда. Жумладан, Фаровон маҳалласининг ўзида 90 ўринли, Олмазор маҳалласининг Бирдамлик ва Янгибоғ кўчалари туташган нуқтасида 120 ўринли, Арна бўйи маҳалласининг Покизалик кўчасида 150 ўринли мактабгача таълим ташкилоти қурилиши якунланиш арафасида. Айни пайтда ушбу объектларда синов ва техник назорат ишлари амалга оширилмоқда.

Шунингдек, “Хива қурилиш комплекс” МЧЖ томонидан Дўстлик маҳалласининг Чаманзор кўчасида 240 ўринли боғча қуриш ишларини олиб борилмоқда. “Бакен қурилиш монтаж” МЧЖ томонидан эса Ўрта қалъа ва Тошёп овулларида 3 қаватли маҳалла мажмуалари барпо этилмоқда. “Шўрахан қурилиш монтаж” МЧЖ томонидан эса Тошёп овулида кунига 50 нафар фуқарога хизмат кўрсата оладиган қишлоқ врачлик пункти қурилиши давом этмоқда.

Барча объектларда иш жараёнлари белгиланган муддатга мувофиқ, сифат ва хавфсизлик талабларига қатъий риоя этилган ҳолда амалга оширилмоқда. Туман прокуратураси, махсус ишчи гуруҳлар, масъул идоралар ҳамда техник назорат хизмати томонидан қурилиш ишлари доимий мониторинг қилиб борилмоқда.

Шу билан бирга, иншоотларни белгиланган муддатларда фойдаланишга топшириш юзасидан пудратчи ташкилотлар ҳамда маҳаллий бошқарув органларига аниқ вазифалар ва топшириқлар юклатилган. Лойиҳанинг тўлиқ амалга оширилиши туманда таълим ва тиббий хизматларга бўлган эҳтиёжни қоплаш, аҳоли фаровонлигини ошириш, инфратузилмани янада такомиллаштиришга хизмат қилади.

Натижада, аҳоли учун яқин ва қулай шарт-шароитларда сифатли таълим ҳамда тиббий хизматлардан фойдаланиш имкониятлари яратилади. Туман прокуратураси ва тегишли ташкилотлар томонидан қурилиш ишлари устидан доимий назорат амалга оширилмоқда.

Бундан ташқари, ҳудудларда замонавий шаҳарсозлик талаблари асосида кўп қаватли уй-жойлар, ижтимоий соҳа ва инфратузилма объектлари ҳамда муҳандислик-коммуникация тармоқлари қурилишини жадаллаштириш бўйича изчил ишлар амалга оширилмоқда.

Жумладан, Дўстлик маҳалласи ҳудудидаги “Янги Ўзбекистон” массивида 1015 хонадонли 28 та кўп қаватли уй-жой қурилиши режалаштирилган. Мазкур лойиҳа нафақат аҳолининг уй-жойга бўлган эҳтиёжини қондириш, балки улар учун замонавий ва қулай ҳаёт шароитини яратиш, шу билан бирга, ҳудуднинг меъморий қиёфасини тубдан ўзгартиришга хизмат қилади.

Айни пайтда мазкур массивда 60 хонадондан иборат 2 та кўп қаватли уй-жой фойдаланишга топширилди. Мазкур ишлар “2022–2026 йилларга мўлжалланган Янги Ўзбекистоннинг тараққиёт стратегияси”да белгилаб берилган устувор вазифаларнинг амалдаги ижросини таъминлашга хизмат қилмоқда.

Энг муҳими, ҳар бир барпо этилаётган уй-жой фуқароларимиз фаровонлиги, жамият тараққиёти тимсоли сифатида юртимиз тараққиётига хизмат қилмоқда.

Шарьяр Жолдасов, Амударё туман прокурорининг катта ёрдамчиси.