Ёшлар – тараққиёт таянчи

Бугунги кунда мамлакатимизда ёшлар салоҳиятини рўёбга чиқариш, уларни қўллаб-қувватлаш ва ҳар томонлама камол топишларига шароит яратиш давлат сиёсатининг устувор йўналишларидан бири сифатида алоҳида эътибор қаратилмоқда. Бу борадаги эзгу ташаббус ва ислоҳотларнинг жойлардаги ижросини, айниқса, ёшлар ҳаётига қандай таъсир кўрсатаётганини амалий мисоллар орқали кўриш мумкин. Амударё туманида ўтказилган навбатдаги медиа-тур айнан мана шундай ёндашувни ёритишга қаратилди.

Амударё тумани ҳокимлигининг Ахборот хизмати ташаббуси билан ташкил этилган медиа-турда “Амударё” телеканали ва “Тараққиёт кўзгуси” газетаси журналист ва мухбирлари иштирок этиб, туманда ёшларни қўллаб-қувватлаш ва бандлигини таъминлаш йўлида амалга оширилаётган саъй-ҳаракатлар билан бевосита танишдилар.

Медиа-тур давомида иштирокчилар бир қатор маҳаллаларда бўлиб, ёшларнинг ўз ташаббуслари билан йўлга қўйган фаолиятини кўздан кечирдилар. Жумладан, Бой овул маҳалласида яшовчи Даврон Гулмонов фаолияти барчада катта таассурот қолдирди. Унга ёшлар етакчиси кўмагида юмшоқ мебеллар ишлаб чиқаришни йўлга қўйиш учун 100 миллион сўм миқдорида имтиёзли кредит ажратилган. Бугун Давроннинг меҳнати эвазига беш нафар ёшнинг бандлиги таъминланган, бу эса нафақат унинг оиласи, балки жамият фаровонлиги учун ҳам хизмат қилмоқда.

Янгиобод маҳалласида яшовчи Барно Муродованинг эса пишириқ ва ширинликлар ишлаб чиқариш ташаббуси қўллаб-қувватланган. У ҳам 100 миллион сўмлик имтиёзли кредит асосида ўзининг тадбиркорлик фаолиятини бошлаган. Ҳозирда Барно 2 нафар ёшни иш билан таъминлаган бўлса, қўшимча равишда 5 нафар шогирдни тайёрламоқда. У хотин-қизларни нафақат иш билан таъминламоқда, балки кондитерлик сир-асрорларини ўргатиб, касбга йўналтирмоқда.

Шунингдек, Оқ олтин овулида яшовчи Зарифа Қуролбоева ёшларга ажратилган ер майдонидан самарали фойдаланиш орқали оиласига қўшимча даромад олиб кирмоқда. Унга ажратилган 30 сотих ер майдонининг 10 сотихига помидор, 20 сотихига тарвуз экилган. Ҳозирда ҳосил мўл-кўл, оилавий меҳнат натижасида хонадоннинг турмуш фаровонлиги яхшиланмоқда.

Ташриф давомида журналистлар ёшлар билан мулоқот қилиб, уларнинг орзу-режалари, келажакдаги мақсадлари хусусида суҳбатлашдилар. Мулоқотлар шуни кўрсатдики, бугунги ёшлар ўз ҳаётини мустақил қуришга, жамиятда муносиб ўрин эгаллашга, ўз салоҳиятини рўёбга чиқаришга интилмоқда. Уларга зарур имконият ва ишонч берилса, улар ҳеч кимдан кам эмаслигини исботлашга тайёр.

Давлат томонидан кўрсатилаётган эътибор ва кўмак, яратилаётган имконият ва шарт-шароитлар эвазига юзага келаётган бу каби ташаббуслар шубҳасиз, келажакда бутун жамият тараққиёти учун мустаҳкам пойдевор бўлиб хизмат қилади. Ёшларга берилган имкон – келажакка қилинган сармоя. Амударёлик ёшлар эса бу имкониятни тўғри англаб, ўз ҳаракати, меҳнати ва фидойилиги билан фаровонлик сари дадил қадам ташламоқда.

Чарос Арслонова, туман ҳокимлигининг Ахборот хизмати раҳбари.