Яширин иқтисодиётга қарши курашиш масаласида йиғилиш ўтказилди
Амударё тумани Солиқ инспекцияси биносида прокуратура органларининг солиқчилар ва тадбиркорлар билан учрашуви бўлиб ўтди. Ўзбекистон ва Қорақалпоғистон Республикалари Прокуратуралари масъуллари иштирокида ўтказилган учрашувда туман Солиқ инспекцияси ходимлари, тумандаги тадбиркорлик субъектлари эгалари ва бизнес вакиллари иштирок этди.
Қайд этиш керакки, мамлакатимизда кичик бизнес ва хусусий тадбиркорликни ривожлантириш масаласига алоҳида эътибор берилмоқда. Бу жараёнда давлатнинг асосий мақсади ишлаб чиқаришни ошириш, янги иш ўринларини яратиш ва иқтисодиётнинг барқарор ривожланишини таъминлашдир. Соҳадаги ислоҳотлар натижасида ўзига хос ижобий ўзгаришлар кузатилмоқда, бунда давлатнинг тадбиркорлар билан муносабатлари янги йўналишда ривожланмоқда. Бундан ташқари, Ўзбекистонда тадбиркорликни ривожлантириш учун муҳим механизмлардан бири — солиқ органларида амалга оширилаётган ислоҳотлардир.
“Солиқчи – тадбиркорга кўмакчи” тамойили асосида солиқ органларининг бизнес вакиллари билан ишлаш тартиби тубдан ўзгарди. Агар аввал солиқ органлари тадбиркорларга нисбатан назоратчи ва жазоловчи ролини ўйнаган бўлса, эндиликда уларнинг асосий вазифаси — тадбиркорларга кўмак бериш ва уларнинг фаолиятини қўллаб-қувватлашдир. Бунинг натижасида тадбиркорлар учун солиқ тўлаш, ҳисоботларни топшириш ва солиқ органлари мутасаддилари билан муносабат ўрнатиш ишлари анча осонлашди. Бунинг ортидан кичик ва ўрта бизнес соҳасидаги шахслар учун ҳуқуқий ва иқтисодий хавфсизлик юзага келди. Пировардида эса тадбиркорларнинг мамлакат иқтисодиётидаги улуши йил сайин ортиб бормоқда.
Бироқ, Ўзбекистонда яширин иқтисодиётнинг мавжудлиги мамлакатнинг ривожига салбий таъсир кўрсатмоқда. Учрашувда тадбиркорларга яширин иқтисодиётнинг аввало ўзи учун, қолаверса мамлакат иқтисодиёти ва халқ фаровонлиги учун салбий таъсири ҳаётий мисоллар орқали тушунтириб берилди.
Яширин иқтисодиёт бюджет тушуми режаларининг бажарилишига, шу орқали давлатни иқтисодий ривожлантиришга тўсқинлик қилади. Ноқонуний фаолият кўламининг кенгайиши қонуний фаолият юритаётган тадбиркорларга ҳам зарар келтириб, рақобатнинг сусайишига, оқибатда эса барқарор иқтисодий ўсишга салбий таъсир кўрсатади, мамлакатнинг инвестицион жозибадорлигини камайтиради.
Яширин иқтисодиётни қисқартириш ва тадбиркорларнинг қонунга бўйсунишини таъминлаш мақсадида ҳукумат томонидан бир қатор имтиёзлар берилмоқда. Берилаётган солиқ имтиёзлари, айниқса, кичик бизнес ва тадбиркорлик субъектларини ташкил қилиш, уларда иш ўринларини кўпайтириш, фаолиятини янада кенгайтиришга ёрдам бермоқда.
Учрашувда Қорақалпоғистон Республика Прокуратурасининг яширин иқтисодиётга қарши курашиш соҳасида назорат бўлим бошлиғи, адлия катта маслаҳатчиси М.Е.Бабатаев тадбиркорларга бу каби чоралар ҳақида батафсил маълумотлар бериб, улар тўлаётган солиқлардан бюджет шаклланиши, яратаётган янги иш ўринлари сабабли эса ишсизлик қисқариб, оилаларнинг даромадлари кўпайиши, пировардида эса мамлакат тараққиёти ва халқ фаровонлиги янада юксалишини тушунтирди.
Чиндан ҳам, яширин иқтисодиёт йўқ жойда соғлом рақобат бўлади. Рақобат бор жойда эса ишлаб чиқарилаётган маҳсулот ёки кўрсатилаётган хизматлар нархи арзонлашиб, сифати яхшиланади. Бундан эса нафақат истеъмолчилар, балки тадбиркорларнинг ўзлари ҳам фақат ютади. Зеро, рақобатбардош бизнеснинг умри узоқ бўлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
