Xalq deputatlari Amudaryo tuman Kengashining 77-sessiyasi toʻgʻrisida axborot

2024-yil 29-iyul kuni Amudaryo tumani hokimligining majlislar zalida Xalq deputatlari tuman Kengashining 77-sessiyasi boʻlib oʻtdi.

Sessiyada Amudaryo tumani hokimi Sobir Xoʻjametov, hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Kengash raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 11-Oʻrta qala saylov okrugidan deputat Hamro Xodjayev saylandi.

Kun tartibidagi dastlabki masala yuzasidan tuman Qishloq xoʻjaligi boʻlimi boshligʻi Qudrat Abdikalikov hisobot berdi.

Hisobotda Oʻzbekiston Respublikasi Vazirlar Mahkamasi hamda Qoraqalpogʻiston Respublikasida Vazirlar Kengashining tegishli qarorlari bilan tumanda 2024-yil hosili uchun qishloq xoʻjaligi ekinlari oqilona joylashtirilganligi, lekin baʼzi fermer xoʻjaliklarida ushbu qarorlar talablarini buzib, suvni koʻp talab qiladigan, joylashtirishda koʻrsatilmagan sholi ekinini ekish holatlari kuzatilayotgani taʼkidlandi.

Ushbu masala boʻyicha Agrosanoat majmuasi ustidan nazorat qilish inspektsiyasining tuman boʻlimi boshligʻi Sarvar Matyakubov hamda tuman irrigatsiya boʻlimi boshligʻi Shukurullo Yusupovlar soʻzga chiqib, yuqoridagi kabi qonunbuzilish holatlariga yoʻl qoʻygan fermer xoʻjaliklari bilan tuzilgan yer ijara shartnomalarini bir tomonlama bekor qilish taklifini qoʻllab-quvvatladilar.

Kun tartibidagi navbatdagi masala yuzasidan Amudaryo tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Kamiljan Aytbayev soʻzga chiqib, mol-mulk va yer soliqlarini yigʻishda faollik koʻrsatgan Amir Temur nomli ovul va Jumurovul mahalla fuqarolar yigʻinlari raislarini mahalliy byudjetning ortiqcha bajarilgan manbalari hisobidan bir martalik moddiy ragʻbatlantirish taklifini bildirdi. Taklif duputatlar tomonidan qoʻllab-quvvatlandi.

Sessiya kun tartibidagi navbatdagi masala yuzasidan Kengashning Sud-huquq masalalari va korruptsiyaga qarshi kurashish boʻyicha doimiy komissiyasi raisi Muzaffar Yeshchanov soʻzga chiqib, tumanining doimiy aholisi sonidan kelib chiqqan holda tegishli qonun talablariga muvofiq Xalq deputatlari Amudaryo tuman Kengashidagi deputatlik oʻrinlari sonini navbatdagi chaqiriqdan boshlab 25ta etib belgilash toʻgʻrisida taklif kiritdi. Ushbu taklif ham deputatlar tomonidan bir ovozdan maʼqullandi.

Sessiyada Amudaryo tuman Adliya boʻlimi boshligʻi vazifasini vaqtincha bajaruvchi Shavkat Vaisniyazov, tibbiyot birlashmasi boshligʻining oʻrinbosari Hakimjon Sobirov, tuman Maktabgacha va maktab taʼlimi boʻlimi boshligʻi Yalgʻashboy Shamuratovlar soʻzga chiqib, tegishli tashkilotlarda 2024-yilning oʻtgan 6 oyi davomida amalga oshirilgan ishlar yuzasidan hisobot berdilar.

Deputatlar tegishli masʼullarga aholining huquqiy ongi va madaniyatini yuksaltirish, tumanda tibbiyot sohasini yanada isloh qilish, aholi salomatligini mustahkamlash, maktabgacha taʼlim sohasida qamrov darajasini oshirish, maktab taʼlimida samaradorlikni yanada yaxshilash boʻyicha taklif hamda tavsiyalar bildirdilar.

Shuningdek, sessiyada xalq deputatlari tuman Kengashi vakolatiga kiruvchi boshqa masalalar ham muhokama qilindi.

Deputatlarning fikr va mulohazalari tinglanib, faol muhokamalardan keyin kun tartibidagi barcha masalalar boʻyicha tegishli qarorlar qabul qilindi.