BOʻZYoPLIK KITOBXON YoShLAR DAVRASIDA

Kitob – insoniyatni zulmatdan yorugʻlik sari eltuvchi mayoq. Ilm qadrini bilgan insonning hayot sifatini yaxshilovchi, maʼnaviyatini yuksaltiruvchi qudratli kuchdir. Aqlni charxlab, koʻngilda ezgu orzular uygʻotishga qodir mutolaa lahzalari har qanday odam ongida yaxshilik, mehr tuygʻularini mustahkamlaydi.

“Taraqqiyot koʻzgusi” gazetasi tahririyati ijodiy jamoasi tomonidan amalga oshirilayotgan “Najot – taʼlimda, najot – tarbiyada, najot – bilimda” shiori ostida yoshlar oʻrtasida kitobxonlikni targʻib qilishga bagʻishlangan “Bilimli va maʼnaviyatli yoshlar bilan – Uchinchi Renessans sari” davlat granti loyihasi doirasidagi tadbirlarning mazmun-mohiyati ham oʻsib kelayotgan yosh avlodni ilm choʻqqilarini egallash va yuksak maʼnaviyat sohiblari boʻlishga daʼvat etish, shu bilan birga, bilimdon va tashabbuskor yoshlarni tengdoshlariga oʻrnak qilib koʻrsatishga qaratilgani bilan muhim ahamiyat kasb etmoqda.

Oʻzbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan mazkur loyiha ish rejasiga koʻra, loyiha ijodkorlari joriy yilning 29-mart sanasida Amudaryo tumanining 3-sektori hududidagi 77-sonli umumtaʼlim maktabida boʻlishib, yosh kitobxonlar bilan uchrashdi.

Boʻzyop qishlogʻi aholisining farzandlari taʼlim-tarbiya olayotgan mazkur oʻquv maskani, 2017-yilda qayta taʼmirlanib, zamonaviy talablar darajasida jihozlangan. 140 oʻquvchi oʻringa moʻljallangan taʼlim muassasasida ayni paytda 134 nafar boʻzyoplik ilmga chanqoq oʻquvchi-yoshlar taʼlim-tarbiya olishmoqda. 26 nafar oʻqituvchilarning 1 nafari oliy, 3 nafari 1-, 3 nafari 2-toifaga, qolganlari esa mutaxassis oʻqituvchilardir. Maktabda umumtaʼlim fanlari boʻyicha 14ta fan toʻgaraklari faoliyati yoʻlga qoʻyilgan boʻlib, mazkur toʻgaraklarda salkam 90 nafar oʻquvchi shugʻullanishadi. 6ta sport sektsiyasida olib boriladigan mashgʻulotlarning doimiy ishtirokchilari esa 52 nafarni tashkil etadi.

Maktab oʻquvchilari uchun kitobxonlik eng qiziqarli mashgʻulotlar sirasiga kiradi. Zulxumor Yozboyeva rahbarlik qilayotgan maktab kutubxonasining kitoblar jamlanmasi 2600ta boʻlib, kutubxonada hozirgi zamon oʻzbek bolalar adabiyoti namunalaridan tortib, jahon adabiyotining durdona asarlari tartib bilan terib qoʻyilgan.

Moʻʼjazgina kutubxonaning 90 nafar doimiy aʼzolari bilan birgalikda kutubxona mudirasi Zulxumor Yozboyeva turli sanalar munosabati bilan adabiy-badiiy davra suhbatlari, taniqli shoir va yozuvchilarning hayoti va ijodiy faoliyatiga bagʻishlangan mushoiralar, sheʼriyat bayramlari tashkil etilayotganidan bildikki, kitobxon oʻquvchi-yoshlar uchun maktab kutubxonasi haqiqiy maʼnaviyat maskaniga aylangan.

Maktab direktori Shavkat Toʻrayev, maʼnaviy-maʼrifiy ishlar boʻyicha direktor oʻrinbosari Muhabbat Mangʻitovalarning eʼtirof etishlaricha, kitobxon oʻquvchilar orasida A.Navoiy, Z.M.Bobur, Furqat, Zulfiyaxonim, H.Olimjon, E.Vohidov, A.Oripov, H.Xudoyberdiyeva, Ibroyim Yusupov, Muhammad Yusuf asarlarining bilimdonlari koʻp. Buni biz kitobxon oʻquvchi-yoshlarning oʻzlari oʻqigan kitoblar, kitoblardan olgan taassurotlari haqida toʻlqinlanib soʻzlashlaridan his etdik.

8-sinf oʻquvchisi Saodat Jumaboyeva Alisher Navoiyning “Xamsa”si, Oʻtkir Hoshimovning “Dunyoning ishlari” asarlaridan oʻzi uchun olgan ibrat va mehr-muhabbat hissi, Muhammad Yusuf sheʼriyati tufayli qalbida uygʻongan vatanparvarlik, xalqparvarlik tuygʻulari xususida faxrlanib soʻz yuritarkan, uning bu fikrlarini quvvatlagan 10-sinf oʻquvchilari Sevaraxon Yoʻldosheva, Madinaxon Sobirova, 5-sinf oʻquvchisi Oydinoy Rashidova, Ulboʻsin Matnazarovalar ham oʻzlari oʻqigan kitoblar haqida soʻz yuritib, tengdoshlariga ushbu kitoblarni oʻqishni tavsiya ham qildilar.

Maktabning biri-biridan kitobxon yoshlari bilan samimiy muloqotda boʻlgan loyiha koordinatori, Oʻzbekiston Yozuvchilar Uyushmasi aʼzosi, Qoraqalpogʻiston Respublikasida xizmat koʻsratgan jurnalist, shoira Robiya Yoʻldosheva kitobxon yoshlarning bilim va salohiyatlarini sinovdan oʻtkazish maqsadida hozirgi zamon va mumtoz oʻzbek adabiyoti namoyondalarining asarlari yuzasidan savol-javob tadbirini ham oʻtkazdi.

Kitobxon yoshlar Oʻzbekiston xalq yozuvchisi Pirimqul Qodirovning “Yulduzli tunlar”, “Humoyun va Akbar” asarlari, A.Oripovning “Hakim va ajal” dostoni, M.Yusuf sheʼriyati xususidagi savollarga mamnuniyat bilan javob berishib, oʻzlarining maʼnan barkamol insonlar sifatida voyaga yetayotganlarini puxta javoblari, teran fikrlari bilan amalda namoyon etdilar.

Maktabning 11-sinf oʻquvchisi Lobarxon Jumaboyeva oʻzi yozgan sheʼrlaridan, kitobxon yoshlar esa H.Olimjon, M.Yusuf, Ibroyim Yusupov, A.Oripov sheʼrlaridan ifodali oʻqib berdilar.

Bugungi globallashuv jarayonida oʻzlarining boʻsh vaqtlarini ijtimoiy tarmoqlarga, internet va uyali telefon vositalariga sarflamay, maktab kutubxonasi mudirasi Zulxumor Yozboyeva rahbarligida maʼnaviy-maʼrifiy suhbatlar, kitob mutolaasi bilan shugʻullanish orqali oʻtkazayotgan boʻzyoplik kitobxon yoshlar orasidan kelajakda ona Yurt fidoyilari, haqiqiy vatanparvarlar yetishib chiqishiga ishondik. Joriy oʻquv yilida ilk bitiruvchilari mustaqil hayotga qadam qoʻyishga hozirlanayotgan 77-sonli maktab obroʻsini koʻtarishga qodir ilmga chanqoq yoshlarning orzulari ushalishini tiladik.

Ravshan BAHROMOV, Muyassar XALILLAYeVA.