EL XIZMATIGA ShAYMIZ

Men tibbiyot sohasi xodimiman. Bu borada xalqimizga sifatli xizmat koʻrsatishga intilishlarim va ovulimizda sogʻlom turmush tarzini qaror toptirish, tibbiy madaniyatni yuksaltirishga qoʻshayotgan hissamni inobatga olgan holda 2014-yil 21-dekabrda boʻlib oʻtgan saylovda 25-Toʻlqin saylov okrugi saylovchilari meni xalq deputatlari tumani Kengashiga deputat qilib saylashdi. Kengashning mahalliy byudjetni shakllantirish va uni ijro etish, iqtisodiy islohotlarni amalga oshirish hamda tadbirkorlikni rivojlantirish masalalari boʻyicha doimiy komissiya aʼzosi boʻldim. Saylovchilar bilan har oyning oxirgi shanba kunlari uchrashuvlar oʻtkazib, qonunlar va qarorlarni hayotga tadbiq etishga hissa qoʻshishga, muammolarni joyida hal qilishga harakat qilayapman.

Maʼlumki, xalq deputatlari tuman, shahar va viloyat Kengashi deputatlari mahalliy Kengashlar sessiyalariga tashabbuslar bilan chiqish, elektorat manfaatlarini himoyalashga qaratilgan masalalarga ijro hokimiyati eʼtiborini jalb qilish hamda amaldagi qonunlar, Prezident Farmoni va Qarorlari, Davlat dasturlarining joylardagi ijrosini taʼminlash, joylardagi ijro hokimiyati faoliyati ustidan deputatlik nazorati oʻtkazish vakolatiga ega. Bundan foydalanib, hudud infratuzilmasini yaxshilashga, kommunal sohadagi kamchiliklarni bartaraf etishga, yoshlarni ish oʻrinlari bilan taʼminlashga koʻmaklashishga intilayapman.

Saylovchilar bilan uchrashuv yigʻilishlarimda bir qancha muammoli masalalarni hal qilish borasida takliflar bildirildi: "Toʻlqin” ovuli markazida 15 metr kvadrat boʻlgan koʻl mavjud boʻlib, kun isishi bilan bu koʻldan chiqadigan badboʻy hiddan hududdagi 30 dan ortiq xonadonda yashovchi aholi aziyat chekib kelayotganini, mavjud koʻlni tozalash, dezinfektsiya qilish yoki butunlay koʻmib tashlash masalasini hamda Toʻlqin ovulidagi 33-sonli maktabga qatnovchi oʻquvchilar yoʻlakcha yoʻqligi sababli katta asfalt yoʻldan yurishga majbur boʻlayotganligi, bu oʻquvchi bolalar hayoti uchun xavf tugʻdirayotganligi sababli mazkur muammoni hal qilish uchun uzunligi 500 metrlik yoʻlakcha qurilishiga eʼtibor qaratish zarurligini tegishli tashkilotlarga maʼlum qildim va ijobiy hal qilishga intilayapman.

"Iftixor-dent” xususiy klinikasi 2012-yilda qurilib, ishga tushirilgan. Klinikamiz barcha sanitariya va zamon talablariga javob beradigan holda qurilib, xorijdan keltirilgan eng soʻnggi rusumdagi zamonaviy uskunalar bilan jihozlandi.

Ilgari klinikamizda 4 nafar tibbiyot xodimi faoliyat koʻrsatgan boʻlsa, yangi bino ishga tushirilgandan keyin yana 10 ish oʻrni yaratilib, hozirgi kunda 14 nafar tibbiyot xodimi xalqqa sifatli xizmat koʻrsatib kelmoqdalar.

Bugungi kunda klinikamiz tomonidan aholiga stomatologiyaning terapiya, xirurgiya va ortopediya sohalari boʻyicha xizmat koʻrsatilib kelinmoqda. Klinikamiz xodimlari doimiy ravishda oʻz malakalarini oshirib borishga alohida eʼtibor qaratmoqdalar.Klinikamizda Nukus shahrida joylashgan filial bilan birga kuniga 40-45 nafar bemorlarga malakali tibbiy yordam koʻrsatib kelinmoqda.

Tumanimiz aholisiga koʻrsatiladigan xizmat sifatini yanada yaxshilashga harakat qilmoqdamiz.

Adilboy YuSUPOV, "Iftixor-dent” xususiy klinikasi rahbari, xalq deputatlari tuman Kengashi deputati.