EL XIZMATIGA KAMARBASTA

Tumanimizda faoliyat boshlagan ovul, mahallalardagi xotin-qizlar faollari oʻz zimmalaridagi masʼuliyatli va dolzarb vazifalar ijrosini taʼminlash borasida tizimli ishlarni amalga oshirmoqdalar.

Tumanimizning chekka hududi boʻlgan Qumyop mahallasida 714 ta xonadonda 4653 nafar aholi istiqomat qiladi.

Mahalla xotin-qizlar faoli Roza Qonarboyeva va yigʻin masʼullari yil boshida oʻtkazgan xatlov natijasida ijtimoiy himoyaga muhtoj 93 nafar ayollar 3-bosqich “Ayollar daftari”ga kiritildi. Ularning 33 nafari ijtimoiy himoyaga muhtoj, 9 nafari ishsiz, tadbirkorlik bilan shugʻullanish istagi bor, 15 nafari boquvchisini yoʻqotgan, ehtiyojmand ayollar, 17 nafari nogironligi boʻlgan ayollar, 2 nafari uy-joyga muhtoj ayollar, 17 nafari qaramogʻida nogiron farzandlari bor ehtiyojmand ayollar sifatida alohida-alohida ajratib daftarga qayd etildi va muntazam xabar olinayapti hamda moddiy qoʻllab-quvvatlanayapti. 3 nafarining uy-joyi taʼmirlab berildi, 6 nafar ayol imtiyozli kredit evaziga tadbirkorlik faoliyatini yoʻlga qoʻydi va oʻzini oʻzi band qildi, 6 nafar ayol haq toʻlanadigan jamoat ishiga jalb qilindi.

Mahalla tinch-osoyishtaligiga erishish, oʻzaro doʻstona qoʻshnichilik munosabatlarini mustahkamlash, yoshlar maʼnaviyatini yuksaltirish, oilalarning mustahkamligiga erishish maqsadida turli maʼnaviy-madaniy tadbirlar oʻtkazilayapti.

Keyingi yillarda toʻy-marosimlarning ortiqcha sarf-xarajatlar bilan oʻtkazilayotgani, dabdababozlik, isrofgarchilikka yoʻl qoʻyilayotgani bu borada aholi orasida jiddiy targʻibot olib borishni taqozo etmoqda. Shundan kelib chiqib, R.Qonarboyeva mahalla nuroniylari ishtirokida ibratli ishlarni amalga oshirayapti. Sogʻlom turmush tarzi, oilalarni mustahkamlash keng targʻib etilayotgani natijasida oilaviy ajrimlar sodir boʻlmadi.

Mahalla faollari G.Nazarova, M.Yaxshimovalar va hududdagi ulkan hayotiy tajribaga ega nuroniy onaxonlar Rozaxon opaga koʻmakdosh boʻlishayapti.

Qumyop mahallasiga Chimboy tumanidan kelin boʻlgan, millati qozoq boʻlsa-da, mahallada yashovchi aholining katta yoshlilariga qiz, kichik yoshdagilarga opa, checha boʻlib, el boʻlib ketgan oliy maʼlumotli oʻqituvchi mutaxassisligiga ega R.Qonarboyevaning hali mahallada amalga oshirishni rejalashtirayotgan ishlari koʻp. Harakatda – barakat, deydi xalqimiz.

Ha, intilgan kam boʻlmaydi. Biz Roza Qonarbayevaning el xizmatiga kamarbasta boʻlib yuraverishini tilab qolamiz.

Sevara Ismoilova.