YuRT XIZMATIGA KAMARBASTA BOʻLISh – INSONIY FAZILAT

Aziz yurtimiz oʻz mustaqilligiga erishib, ota-bobolarimizning azaliy orzu-umidlari roʻyobga chiqdi. Mustaqillik sharofati sabab bugun yurtimiz obod, oilalarimiz tinch.

Vatanga muhabbat har bir insonga xos tuygʻudir. Chindan ham yurtimiz, qolaversa, butun dunyo tarixiga bir nazar solsak, Vatanga muhabbat tuygʻulari rivojlangan joyda har taraflama bunyodkorlik, obodonchilik, toʻkinlik, moʻl-koʻllik va farovon turmushning guvohi boʻlamiz. Umar ibn Hattob (roziyallohu anhu): «Alloh taolo yurtlarni Vatan muhabbati bilan obod qildi»,–deganlar. Va yana: «Agar Vatan muhabbati boʻlmaganida yurtlar xarob boʻlardi», – deganlar.

Zotan, insonning oʻz Vataniga, yashab turgan goʻshasiga mehr-muhabbati boʻlmasa, hech qachon oʻzi yashab turgan joyda har taraflama qulay shart-sharoitlar va imkoniyatlar boʻlishiga eʼtibor bermaydi. Bunday insonlar uchun nafaqat Vatan tuygʻusi, balki boshqa barcha ijobiy hissiyot va muqaddas tuygʻular begonadir. Bundaylar uchun Vatan degan tushunchaning hech qanday ahamiyati yoʻq. Bu holat esa bizning shariatimizda qattiq qoralanadi. Aksincha, dinimizda Vatan va unga bogʻliq boʻlgan qadriyatlarni asrab-avaylash, himoya qilish madh etiladi, hatto bu borada qilingan harakatlar va shu yoʻlda jon fido qilish oxiratda buyuk maqomlarga erishish uchun vosita ekani zikr qilinadi.

Mana, har yili mustaqillik tadbirlarini oʻtkazishdagi ramziy shior barcha yurtdoshlarimizning qalbida aks-sado beradi. Eng ulugʻ, eng aziz bayramning qutlugʻ 27 yilligi arafasidagi «Aziz va yagonamsan, jonajon Oʻzbekistonim!» ezgu shiori ham teran mazmunga ega.

Unda ifodalangan soʻzlar bizni fidoyilikka, vatanparvarlikka undab turadi. Shayx Muhammad Gʻazzoliy aytgan ekanlar: «Inson oʻzi tugʻilib-oʻsgan yurtni, undagi barcha narsalarni sevadi, garchi u joy odam yashamaydigan sahro boʻlsa ham. Vatanni sevish inson qalbidagi asl, tugʻma tabiatdir. Ushbu tugʻma tabiat insonni Vatanida yashab turganda xotirjam qiladi, undan yiroqda boʻlganda esa sogʻintiradi, unga hujum qilinganda uni himoya qiladigan, hurmatsizlik qilinganda gʻazablanadigan qilib qoʻyadi».

Imom Gʻazzoliyning ushbu hikmatli soʻzlaridan Vatanni sevish insonning tugʻma tabiati, insoniylik fitratida bor xislat ekani maʼlum boʻladi.

Vatan obodligi – taraqqiyot hamda yuksalishlarning asosidir.

Ha, bu yil qutlugʻ bayramga tayyorgarlik oʻzgacha. Odamlarimizning kayfiyati chogʻ, ularning yuz-koʻzlarida xursandchilik, bayram ruhi sezilib turibdi. Mahalladoshlar bilan suhbatlashar ekanmiz, kimdir tomorqadan katta daromad olayotgani, yana kimdir tadbirkorlarga yaratilayotgan shart-sharoitlardan unumli foydalanib, roʻzgʻori but, koʻngli xotirjam ekanini aytadi. Yana kimningdir farzandi sport sohasida xalqaro miqyosda katta yutuqqa erishganini aytib, faxrlanadi. Xullas, muvaffaqiyatga erishmagan oilaning oʻzi yoʻq.

Albatta, bunday farovonlik uchun, toʻkin-sochinlik uchun Yaratganga shukrona keltirishimiz, shunday yurtda yashash baxti nasib etganidan xursand boʻlishimiz kerak. Shu oʻrinda, jonajon diyorimiz taraqqiyotiga har birimiz munosib hissa qoʻshib yashashimiz kerakligini his qilmogʻimiz darkor. Dono xalqimiz bejizga, toma-toma koʻl boʻlur, demagan.

Zotan, Vatanimizning gullab-yashnashi yoʻlidagi birdamligimiz, sobitqadamligimiz, amaliy harakatlarimiz yurtimizning bundan-da yuksak marralarni qoʻlga kiritishiga xizmat qiladi.Shunday ekan, har birimiz oʻz tugʻilib oʻsgan ona diyorimizni sevishimiz, qadriga yetishimiz, tinchligi yoʻlida kamarbasta boʻlishimiz, uning istiqlolini asrab-avaylashimiz, dushmanlaridan himoya qilishimiz, bu neʼmatlarni inʼom etgan Ulugʻ Robbimiz– Allohga tinimsiz shukrona qilishimiz lozim.

Alloh taolodan iltijolar qilib soʻraymizki, barchamizni Vataniga sadoqatli, el-yurti, xalqi hamda dini yoʻlida xizmat qiladigan haqiqiy vatanparvar boʻlib yashash baxtiga musharraf aylasin!

Oʻktam QURBONIYoZOV, «Noʻgʻoy eshon» jomʼe

masjidi imom-xatibi.