Xalq deputatlari Amudaryo tumani Kengashining 70-sessiyasi toʻgʻrisida axborot

2024-yil 22-fevral kuni Xalq deputatlari Amudaryo tumani Kengashining navbatdagi 70-sessiyasi boʻlib oʻtdi.

Sessiyada tuman hokimi Sobir Xoʻjametov, sektorlar masʼullari, hokim oʻrinbosarlari, boʻlimlar boshliqlari, ovul va mahalla fuqarolari yigʻinlarining xotin-qizlar faollari hamda ommaviy axborot vositalari vakillari ishtirok etdilar.

Sessiyani xalq deputatlari tuman Kengashi raisi oʻrinbosari Gʻulomjon Eshniyazov ochdi va olib bordi.

Sessiya kun tartibidagi dastlabki – “Amudaryo tumanini kompleks ijtimoiy-iqtisodiy rivojlantirish boʻyicha sektorlar tomonidan hududlarida amalga oshirilgan ishlar va 2024-yilda amalga oshiriladigan ishlarning “Yoʻl xaritalari”ni tasdiqlash toʻgʻrisida”gi masala yuzasidan sektorlar masʼullari hisobot berdilar.

1-sektor kotibi Otabek Ollayorovning hisobotida keltirilishicha, 1-sektor rahbari tomonidan hududni ijtimoiy-iqtisodiy rivojlantirish borasida tizimli ishlar amalga oshirilmoqda. Xususan, oʻtgan 2023-yilda sektor rahbari hamda tuman xalq qabulxonasi bilan birgalikda fuqarolarning mummolarini tinglash, yoshlar bilan uchrashuvlar tashkil qilish boʻyicha reja-grafik asosida 54-marta sayyor qabullar oʻtkazilgan. Sayyor qabullarda 358 ta murojaatlar koʻrib chiqilgan va tegishliligi boʻyicha masʼullar tomonidan oʻrganilib, aksariyati ijobiy hal etilgan.

Kun tartibidagi masala yuzasidan 2-sektor hududida amalga oshirilgan ishlar boʻyicha tuman prokurori yordamchisi Sanjar Abdullayev hisobot berdi.  Hisobotda taʼkidlanganidek, oʻtgan yil mobaynida “Bandlik” dasturiga muvofiq 2-sektor xududida aholi bandligiga koʻmaklashish markazi tomonidan 485 nafar fuqarolar, shulardan 194 nafar yoshlar va 95 nafar xotin-qizlar ishga joylashtirilgan. Joriy yilning oʻtgan davri mobaynida 2-sektor xududida 7-marta boʻsh ish oʻrinlari yarmarkasi tashkil qilingan boʻlib, ularga 176 nafar fuqaro jalb qilingan. Shundan 73 nafar fuqarolarga ishga yoʻllanma berilgan.

3-sektor kotibi Muhriddin Rahimovning hisobotida qayd etilganidek, hududda kasbga oʻqitish yoʻnalishida kichik biznes, oilaviy tadbirkorlik, hunarmandchilik va kasanachilikni qoʻllab-quvvatlash va rivojlantirish maqsadida oʻquv markazlarida yil boshidan 37 nafar fuqarolar turli yoʻnalishda tahsil olgan. Ularning bandligi toʻliq taʼminlangan, xususan, 7 nafari tikuvchilik, 5 nafari oshpazlik, 11 nafari qurilish, 6 nafari avtomobillarga texnik xizmat koʻrsatish, 5 nafari axborot texnologiyalari, 2 nafari payvandlovchilik, 3 nafari sartaroshlik yoʻnalishida bilimlarga ega boʻlgan.

Tuman soliq inspektsiyasi boshligʻi oʻrinbosari Islom Yusupov tomonidan 4-sektor hududida amalga oshirilayotgan ishlar xususida hisobot berildi. Hisobotda 4-sektor hududida aholini ijtimoiy-iqtisodiy qoʻllab-quvvatlash boʻyicha samarali ishlar tashkil etilayotgani taʼkidlandi. Qayd etilishicha, sektor hududida yashovchi, ayniqsa nogironligi boʻlgan va ijtimoiy himoyaga muhtoj oilalarni zarur dori-darmon vositalari, nogironlik aravachalari hamda reabilitatsiya vositalari bilan taʼminlash borasida samarali ishlar qilingan. Xususan, nogironligi boʻlgan 12 nafar fuqaroga kattalar uchun nogironlik aravachasi, 5 nafar fuqaroga elektr yuritmali kreslo-aravacha, 2 nafar voyaga yetmagan nogironligi boʻlgan bolaga bolalar aravachasi, 2 nafar fuqaroga eshitish moslamasi, 7 nafar fuqaroga qoʻltiqtayoq, 12 nafar fuqaroga hassatayoq olib berilgan hamda reabilitatsiya vositalari bilan toʻliq taʼminlangan.

Shundan soʻng cessiya kun tartibidagi navbatdagi masala yuzasidan tuman hokimining birinchi oʻrinbosari Kamiljan Aytbayev hisobot berdi. Hisobotda tumanimizda 2024-yil yangi ish oʻrinlarini yaratish va aholi bandligiga koʻmaklashish dasturiga asosan jami 15 ming 836ta yangi ish oʻrinlari yaratilishi reja qilinayotgani, ulardan 3125tasi doimiy, 10 ming 130tasi mavsumiy va 2 ming 581tasi vaqtinchalik ish oʻrinlari ekanligi qayd etildi. Shuningdek, kelgusi yilda yirik va hududiy investitsiya loyihalarini ishga tushirish hisobiga 398ta, xizmat koʻrsatish sohasini rivojlantirish hisobiga 4062ta, qishloq xoʻjaligi sohasida 10 ming 821ta, qurilish sohasida 555ta yangi ish oʻrinlarini tashkil qilish orqali aholi bandligini taʼminlash rejalashtirilayotgani haqida maʼlumot berildi.

Kun tartibidagi navbatdagi masala yuzasidan tuman qurilish va uy-joy kommunal xoʻjaligi boʻlimi boshligʻi Ahmad Rajapov tomonidan berilgan hisbotda keltirilishicha, 2023-yil mobaynida tumanimizda 100 mlrd. soʻmlik mablagʻ evaziga jami 74 ta obʼektda qurilish-taʼmirlash ishlari olib borilgan. Davlat-xususiy sherikchilik shartlari doirasida tuman hududidagi jami 125 ta ijtimoiy soha obʼektlarini isitish boʻyicha shartnomalar imzolanib, 26 ta obʼektlarning qozonxonalari yangidan qurilganligi hamda 89 ta yangi qozonlarni oʻrnatish ishlari olib borilmoqda, shuningdek, ushbu obʼektlarni koʻmir mahsulotlari bilan taʼminlash maqsadida 3 ming 301 tonna koʻmir yetkazib berilgan.

Sessiya kun tartibidagi navbatdagi masala yuzasidan tuman hokimi oʻrinbosari, Oila va xotin-qizlar boʻlimi boshligʻi Goʻzal Saburovaning bergan hisobotida joriy yil 5-bosqich “Ayollar daftari”ga kiritish maqsadida 49 ta maxallalarga biriktirilgan ishchi guruhlar tomonidan xatlov oʻtkazish ishlari olib borilgani hamda 30 yoshdan yuqori boʻlgan 45 ming 330 nafar xotin-qizlarga anketa soʻrovnomalari toʻldirilganligi qayd etilib, bu borada qilinayotgan ishlar haqida maʼlumotlar berildi.

Shuningdek, Xalq deputatlari tuman kengashi deputatlari tomonidan 5-bosqich “Ayollar daftari”ga kiritilayogan 5 ming 593 nafar xotin-qizlarning roʻyxati hamda “Ayollar daftari”ga kiritilgan xotin-qizlar muammolarini bartaraf etishga qaratilgan “Yoʻl xaritasi” tasdiqlandi.

Sessiyada tuman Iqtisodiyot va moliya boʻlimi boshligʻi Javlonbek Jumamurodov mahalliy byudjeti mablagʻlarining 2023-yil davomida sarflanishi toʻgʻrisida hisobot berdi. Hisobotda 2023-yil davomida mahalliy byudjetning daromadlar qismi aniqlangan reja prognozi 84 mlrd 2,42 mln soʻmga belgilangan boʻlib, xaqiqatda 95 mlrd 364,2 mln soʻmga, yaʼni 113,5 foizga yoki rejaga nisbatan 11 mlrd 361,8 mln soʻmga ortigʻi bilan bajarilgani qayd etildi.

Shundan soʻng sessiya kun tartibidagi navbatdagi masala yuzasidan tuman fermer, dehqon xoʻjaliklari va tomorqa yer egalari kengashi raisi Ilhom Palvanov soʻzga chiqib, tuman hokimligi hisobidagi zahira yer  maydonlarini “E-AUKSION” elektron platformasida ochiq elektron tanlovga chiqarish toʻgʻrisidagi taklifni oʻqib eshittirdi. Deputatlar tuman Qishloq va suv xoʻjaligi boʻlimining hokimlik zaxira yer fondi hisobidagi yer maydonlarini paxta va gʻallachilik, sabzavot va poliz ekinlarini ekish, chorvachilik va eksportbop sabzavotchilik yoʻnalishlarida faoliyat yuritish uchun aholiga ajratish maqsadida onlayn auktsionga chiqarish boʻyicha takliflarini maʼqulladilar.

Sessiya kun tartibidagi barcha masalalar yuzasidan hisobot va axborotlar deputatlar tomonidan muhokama qilinib, tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligining Axborot xizmati