AMUDARYoDA VOLEYBOL BOʻYIChA TUMAN BIRINChILIGI MUSOBAQALARI BOʻLIB OʻTDI

Amudaryoda sportning voleybol turi boʻyicha “Yoshlar va biznesni qoʻllab-quvvatlash yili”ga bagʻishlab tuman birinchiligi oʻtkazildi.

17-18-fevral kuni tumandagi Ixtisoslashtirilgan maktab sport zalida kattalar oʻrtasida boʻlib oʻtgan tuman birinchiligi musobaqasining ochilish marosimida tuman Sport maktabining ommaviy sportni rivojlantirish va selektsiya ishlari boʻyicha direktor oʻrinbosari Bahrom Soatov hamda Yoshlar ishlari agentligi tuman boʻlimi masʼullari, maktablarning jismoniy tarbiya fani oʻqituvchilari, tuman Sport maktabi murabbiylari ishtirok etishdi.

Ochilish marosimida soʻzga chiqqanlar yurtimizda sportni rivojlantirishga qaratilayotgan eʼtibor, tumanimiz sport sharafini nufuzli musobaqalarda himoya qilayotgan yurtdoshlarimiz, erishilayotgan yutuqlarni tilga olib oʻtdilar. Shuningdek, aholini jismoniy tarbiya va sportga jalb qilish, sport turlari orqali sogʻlomlashtirish azal-azaldan eʼtirof etib kelinayotgani, bu esa sogʻlom muhitni yaratishga xizmat qilayotganini taʼkidlashdi va musobaqada ishtirok etish uchun kelgan jamoalarga omad tilashdi.

Shundan soʻng, tuman birinchiligi uchun qizgʻin bellashuvlar boshlab yuborildi. Musobaqalarda erkaklar oʻrtasida 11 ta, ayollar oʻrtasida esa 9 ta jamoa kuch sinashdilar. Tumandagi ovul va mahallalar, korxona-tashkilotlar, umumtaʼlim maktablari xodimlaridan tashkil topgan jamoalar gʻoliblik uchun harakat qildilar. Musobaqalar davomida barcha jamoalar oʻyin qoidalariga amal qilgan holda birdamlikda gʻalabani qoʻlga kiritishga intildilar.

Shuni eʼtirof etish joizki, bugungi kunda davlatimizda sport oʻyinlari kundan kunga ommalashib, sport jamoalarining shakllanib borish darajasi yuqorilamoqda. Ayniqsa, voleybol sport turi aholi va oʻquvchi-yoshlarda jamoaviylik, ahillik, birdamlik, hamjihatlik, mehr-oqibatni yanada mustahkamlashda beqiyos ahamiyat kasb etmoqda. Hozirda maktablarda jismoniy tarbiya fani darslari va darsdan tashqari mashgʻulotlar mobaynida voleybol sport turi orqali oʻquvchilarning jismoniy sifatlarini rivojlantirishda turli xil zamonaviy metodlardan foydalanib kelinmoqda. Shuningdek, voleybol sport turi yoshlarda jismoniy sifatlarni rivojlantirish bilan birga kuch, chidamlilik, tezkorlik, chaqqonlik, egiluvchanlik sifatlarini ham oshirishda ham oʻrni katta.

Ikki kun davomida qizgʻin va murosasiz boʻlib oʻtgan voleybol musobaqalarida jamoalar oʻrtasidagi bahslarni hakamlar sinchkovlik bilan kuzatib, baholab bordilar. Natijaga koʻra erkaklar oʻrtasida tuman Ichki ishlar boʻlimi jamoasi birinchi oʻrin gʻolibligini qoʻlga kiritdi. Ikkinchi oʻrinni esa 45-sonli maktab jamoasi, uchinchi oʻrinni Qangli ovuli jamoasi qoʻlga kiritishga muvaffaq boʻlishdi. Shuningdek, ayollar oʻrtasidagi musobaqalarda birinchi oʻrin 28-sonli maktab jamoasiga nasib qilgan boʻlsa, Oq oltin ovuli jamoasi ikkinchi oʻrin, tuman Sport maktabi jamoasi esa uchinchi oʻrinni egallashdi.

18-fevral kuni boʻlib oʻtgan gʻoliblarni taqdirlash munosabati bilan oʻtkazilgan marosimda tuman Sport maktabi direktori Chorsham Tajimurodov, tuman Ichki ishlar boʻlimi masʼullari, Sport maktabi masʼullari, trenerlari qatnashishdi va gʻoliblarni yutuq bilan tabriklashdi.

Gʻolib jamoalarga tuman hokimligi tomonidan tayyorlangan diplom va esdalik sovgʻalari bilan topshirildi.

O.Xudoyberganova.