Tuman hokimi Sobir Xoʻjametov tomonidan Toshyop ovulida sayyor qabul oʻtkazildi

Amudaryo tumani hokimi – 1-sektor rahbari Sobir Xoʻjametov aholi bilan yaqindan muloqotda boʻlish, mavjud muammolarni oʻrganish va ularning hal etilishiga koʻmaklashish maqsadida 16-noyabr kuni Toshyop ovuli hududidagi 5-sonli maktab binosida sayyor qabul oʻtkazdi.

Sayyor qabulda 1-sektor hududiga biriktirilgan ishchi guruhi aʼzolari, mutasaddi tashkilotlar rahbarlari hamda hududda istiqomat qiluvchi 20 nafardan ortiq fuqarolar ishtirok etdi.

Aholining turli qatlamlari bilan muloqot qilish, mavjud dolzarb muammolarni aniqlash, ularni bevosita joyida bartaraf etish yuzasidan tezkor va aniq choralar koʻrish joylarda tashkil etilayotgan sayyor qabullarning bosh maqsadi hisoblanadi. Zero, barcha sohalarda amalga oshirilayotgan islohot va yangilanishlar avvalo aholi manfaatlarini taʼminlashga qaratilgan.

Sayyor qabulda sektor rahbariga fuqarolardan bir qancha murojaatlar kelib tushdi. Murojaatlar mazmuni ovul hududidagi baʼzi koʻchalarga tosh yotqizish, elektr kuchlanishi past boʻlgan hududlarga yangi transformator va beton simyogʻochlar oʻrnatish, talabalar kantrakt toʻlovining bir qismini toʻlab berilishi va boshqa masalalarda boʻldi. Undan tashqari, ishsizlik, ijtimoiy nafaqalar, kadastr va boshqa masalalar boʻyicha ham murojaatlar kelib tushib, mazkur murojaatlarga huquqiy tushuntirishlar berildi.

Sektor rahbari barcha masalalarni birma bir oʻrgandi. Murojaatlar boʻyicha masʼul tashkilot vakillariga shu yerning oʻzida zarur topshiriqlar berildi. Muddat talab etiladigan masalalar yuzasidan esa tegishli soha mutasaddilariga koʻrsatmalar berilib, tez kunda hal etilishiga kelishib olindi.

Darhaqiqat, bugun har bir fuqaro uchun barcha davlat organlari va tashkilotlarining eshiklari ochiq. Davlat idoralari rahbarlari fuqarolarning murojaatlarini ish xonalarida emas, balki joyiga borib, haqiqiy holatni koʻrgan va oʻrgangan holda koʻrib chiqmoqdalar.

Tuman boʻylab oʻtkazilayotgan bu kabi sayyor qabullar davlat organlari va fuqarolar oʻrtasida mustahkam koʻprik boʻlibgina qolmasdan, aholining hukumat rahbarlariga va davlat idoralariga boʻlgan ishochining yanada mustahkamlanishiga sabab boʻlmoqda.

Shuningdek, davlat idoralari masʼullarining xalq bilan muloqot qilib, ularning muammolarini hal qilish, murojaatlarini tinglash boʻyicha amalga oshirayotgan bu kabi sayyor qabullari xalqimiz turmush farovonligini yanada yuksaltirishga xizmat qilayotgani bilan ham ahamiyatlidir.

Aholi muammolarini joyida, tez va samarali hal etish imkonini berayotgan, hududlarda yigʻilib qolgan muammolarni aniqlash va bartaraf etishda davlat organlari va tashkilotlari oldiga yangi-yangi vazifalar qoʻyayotgan bu kabi sayyor qabullar xalq farovonligi, jamiyat ravnaqi va mamlakat taraqqiyotiga hissa qoʻshmoqda.

Tuman hokimligi Axborot xizmati