TAJRIBA-SINOV MAKTABLARIDA MARKAZLAShGAN HOLDA ChORAKLIK SUMMATIV BAHOLASh JARAYoNI OʻTKAZILDI

Oʻzbekiston Respublikasi Prezidentining 2023-yil 26-maydagi «Maktabgacha va maktab taʼlimi vazirligi hamda uning tizimidagi tashkilotlar faoliyatini samarali tashkil etish chora-tadbirlari toʻgʻrisida»gi Farmoni ijrosini taʼminlash borasida Amudaryo tumanida ham izchil chora-tadbirlar amalga oshirilmoqda.

Farmonga muvofiq maktabgacha va umumiy oʻrta taʼlimni yangi bosqichga olib chiqish, uning sifatini oshirish hamda taʼlim dasturlarini takomillashtirish maqsadida 2023-2024 oʻquv yilidan boshlab, bosqichma-bosqich bilimni baholashning yangi tartibini joriy etish va unga koʻra oʻqituvchi tomonidan oʻquvchilarning oʻtilgan mavzuni amaliyotda qoʻllay bilishi, tanqidiy fikrlashi va berilgan materialni tahlil qila olishi kabi koʻnikmalarini baholash vazifasi belgilangan.

Ushbu farmonda berilgan vazifalar ijrosini taʼminlash maqsadida Maktabgacha va maktab taʼlimi vazirligining «Tajriba-sinov maktablarida bilimni baholashning yangi tartibini joriy etish toʻgʻrisida»gi 2023-yil 16-avgustdagi buyrugʻiga asosan Amudaryo tumanidagi umumtaʼlim maktablaridan 3 tasi, yani 18-, 36- va 55-sonli maktablar tajriba-sinov maktablari sifatida tanlab olingan. 1-noyabr kuni mazkur maktablarda bilimni baholashning choraklik summativ baholash jarayoni oʻtkazildi. Unda mazkur maktablarning direktorlari, direktor oʻrinbosarlari va fan oʻqituvchilari ishtirok etdilar.

Tajriba-sinov maktablarida markazlashgan holda oʻtkazilgan choraklik summativ baholash jarayoni 5-7-sinflarda ona tili va adabiyot hamda matematika, 8-9-sinflarda ona tili va adabiyot, matematika va biologiya, 10-11-sinflarda ona tili va adabiyot, matematika va kimyo fanlaridan, shu bilan birgalikda 10-sinfda tanlov asosida ona tili va adabiyot, matematika va ingliz tili fanlaridan amalga oshirildi.

Mazkur tadbirni oʻtkazishdan maqsad yangi baholash tizimini joriy etishda maktablar direktorlari va oʻquv ishlari boʻyicha direktor oʻrinbosarlarining vazifalarini amalda koʻrsatib berish, shu bilan birga chorak boʻyicha summativ baholashning adolatli va shaffof oʻtkazilishini nazoratga olishdir.

Chorak boʻyicha summativ baholashlarning haqiqatan Baholash markazi tomonidan taqdim etilgan baholash mezonlariga asoslangan materiallar asosida amalga oshirilishi va tekshirilishi maʼlumot sifatida aytib oʻtildi. Shuningdek, bundan maktab metod birlashma rahbarlari hamda fan ustozlari tomonidan tahlil qilinishi uchun asosli tizimni oʻrnatish kerakligi taʼkidlandi. Natijada, tajriba-sinov maktablarida 2023-2024 oʻquv yilidan boshlab bosqichma-bosqich bilimni baholashning yangi tartibi joriy etilib, uning doirasida oʻqituvchi tomonidan oʻquvchilarning oʻtilgan mavzuni amaliyotda qoʻllay bilishi, tanqidiy fikrlashi va berilgan materialni tahlil qila olishi uchun zamin yaratiladi.

Tajriba-sinov maktablarida 2023-2024 oʻquv yili 1-chorak yakunlarini choraklik summativ baholash maxsus ishchi guruhlari rahbarlari – 1-ishchi guruh rahbari Amudaryo tumani ixtisoslashtirilgan maktabi direktori Otabek Yoʻldoshov, 2-ishchi guruh rahbari – shu maktabning oʻquv ishlari boʻyicha direktor oʻrinbosari Ravshan Xolmurodov, 3-ishchi guruh rahbari, shu maktabning maʼnaviy va maʼrifiy ishlar boʻyicha direktor oʻrinbosari Muyassar Rahmatullayevalar tomonidan amalga oshirildi.

Ishonamizki, bu choralar kelgusida oʻquvchilarning fanlarni yanada chuquroq oʻzlashtirishlarida muhim vosita boʻlib xizmat qiladi.

 Oygul RAJABOVA.