Xalq deputatlari Amudaryo tuman Kengashining 65-sessiyasi toʻgʻrisida axborot

2023-yil 6-oktyabr kuni Amudaryo tumani hokimligining majlislar zalida Xalq deputatlari tuman Kengashining navbatdagi – 65-sessiyasi boʻlib oʻtdi.

Sessiyani Xalq deputatlari tuman Kengashi raisining oʻrinbosari Gʻulomjon Eshniyozov ochdi va olib bordi. Sessiya kotibligiga 28-Daryoboʻyi saylov okrugidan deputat Akbar Rajabov saylandi.

Sessiyada deputatlar, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari, mahallalardagi hokim yordamchilari hamda ommaviy axborot vositalari vakillari ishtirok etdi.

Sessiyada dastlab “Tashabbusli byudjet” jarayonining 2023-yil ikkinchi mavsumining yakuni toʻgʻrisida tuman hokimining birinchi oʻrinbosari Rashid Salayev hisobot berdi.

Hisobotda taʼkidlanganidek, tumanda tashabbusli byudjet jarayonining joriy yildagi ikkinchi mavsumi uchun “Fuqarolar tashabbusi jamgʻarmasi”ga mahalliy byudjet mablagʻlari va qoʻshimcha manbalardan jami 9 mlrd. 291 mln. 700 ming soʻm mablagʻlar shakllantirilgan.

Iqtisodiyot va Moliya vazirligi tomonidan ochilgan Ochiq byudjet (openbudjet.uz) portalida 2023-yil 17-iyuldan 7-avgustga qadar boʻlgan davrda tuman fuqarolari tomonidan jami 116ta tashabbus kiritilgan. Ovoz berish yakuniga koʻra, 7ta tashabbus “gʻolib” deb topilib, ushbu tashabbuslarning jami qiymati 9 mlrd. 240 mln. soʻmni tashkil qiladi.

Shundan keyin tuman hokimligi Bolalarni himoya qilish shoʻʼbasining 2023-yil uchinchi choragi davomida amalga oshirilgan ishlari toʻgʻrisida shoʻʼba rahbari Jahongir Xolmurodov hisobot berdi. Taʼkidlanganidek, tuman aholisining umumiy soni 207 ming 483 nafar boʻlib, shundan voyaga yetmaganlar 76 ming 5 nafarni tashkil qiladi. Hozirgi kunda tumanda jami 134ta maktabgacha taʼlim tashkilotlari faoliyat yuritayotgan boʻlib, muassasalarga 12 ming 237 nafar bolalar qamrab olingan. Mavjud 85ta umumiy oʻrta taʼlim maktablarida esa jami 38 ming 476 nafar bolalar taʼlim-tarbiya olib kelishmoqda.

Sessiya ishida tumanda jinoyatchilik va huquqbuzarliklarning oldini olish hamda ularning profilaktikasini tashkil etish boʻyicha 2023-yilning 9 oyi davomida amalga oshirilgan ishlar yuzasidan tuman Ichki ishlar boʻlimi oʻrinbosari Sharaf Joldosboyevning hisoboti tinglandi.

Hisobotda qayd etilganidek, joriy yilning 9 oyi davomida tumanda umumiy jinoyatchilik tahlil qilinganida, oʻtgan yilga nisbatan 190dan 184taga, jinoyat qidiruv yoʻnalishida 132dan 126taga, boshqaruv va iqtisodiyot sohasidagi jinoyatlar 33dan 25taga kamaygan, boshqa sohadagi jinoyatlar esa 25dan 33ga oshgan.

Jami sodir etilgan 184ta jinoyatlarni sektorlar kesimida tahlil qilinganida 1-sektor hududida 56ta, 2-sektor hududida 60ta, 3-sektor hududida 28ta, 4-sektor hududida 40ta jinoyatlar sodir qilingan.

Sessiyada tuman hokimining oʻrinbosari – Oila va xotin-qizlar boʻlimi boshligʻi Goʻzal Soburovaning ham hisoboti tinglandi. Taʼkidlanganidek Oʻzbekiston Respublikasi Prezidenti rahbarligida mamlakatimiz iqtisodiy, siyosiy va ijtimoiy hayotining barcha jabhalarida xotin-qizlarning faolligini oshirish, ularning taʼlim va kasbiy koʻnikmalar olishi hamda bandligini taʼminlashga har tomonlama koʻmaklashish, tadbirkorlik tashabbuslarini yanada qoʻllab-quvvatlash, “Ayollar daftari” bilan ishlash tizimini takomillashtirish borasida keng koʻlamli ishlar amalga oshirilmoqda.

Xususan, birinchi toifa boʻyicha ijtimoiy himoyaga muhtoj ishsiz 1 ming 943 nafar ehtiyojmand xotin-qizlardan 1 ming 732 nafarining bandligi taʼminlandi, 183 nafar xotin-qizlar doimiy ishga joylashtirildi, 105 nafar xotin-qizlar jamoat ishlariga jalb etildi, 174 nafar xotin-qizlar kasb-hunarga oʻqitildi, 1 ming 270 nafar xotin-qizlar esa oʻzini-oʻzi band qilib, bandligi taʼminlandi.

Shuningdek, Oʻzbekiston Respublikasi Vazirlar Mahkamasining “Oliy taʼlim muassasalariga qoʻshimcha davlat granti asosidagi qabul koʻrsatkichlari doirasida ehtiyojmand oilalardagi xotin-qizlarga tanlovda ishtirok etish uchun tavsiyanoma berish va ularni oʻqishga qabul qilishni tashkil etish tartibi toʻgʻrisida”gi 338-sonli Qarori asosida 823 nafar xotin-qizlarga tavsiyanoma berildi. Shundan, 13 nafar xotin-qizlar Oliy taʼlim muassasalariga davlat granti asosida talabalikka tavsiya etildi.

Sessiyada tuman Xalq qabulxonasi mudiri Erkin Rajabov aholidan kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari toʻgʻrisidagi masala yuzasidan axborot berdi. Axborotda taʼkidlanganidek, Oʻzbekiston Respublikasi Prezidentining Virtual qabulxonasiga 2023-yil 30-sentyabr sanasiga qadar tuman aholisi tomonidan jami 3335ta masalalar boʻyicha murojaatlar kelib tushgan. Shundan 3075tasi koʻrib chiqilgan boʻlib, 2489tasi qanoatlantirilgan, 1431tasi ijobiy hal qilingan.

Sessiyada Kengash vakolatiga kiruvchi boshqa masalalar ham muhokama qilindi. Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi. Shuning bilan sessiya oʻz ishini yakunladi.

Tuman hokimligi Axborot xizmati