AYoLIN EʼZOZLAB YaShAYoTGAN YuRT

6-mart kuni tuman hokimligida 8-mart – Xalqaro xotin-qizlar kuni munosabati bilan tantanali tadbir boʻlib oʻtdi.

Tadbirga xalq deputatlari tuman Kengashi deputatlari, tuman hokimligi, muassasa, korxona va tashkilotlar, fuqarolarning oʻzini oʻzi boshqarish organlari, taʼlim muassasalari hamda jamoat tashkilotlarining faol ayol-qizlari, keng jamoatchilik vakillari tashrif buyurdilar.

Tadbirni tuman hokimi oʻrinbosari, Xotin-qizlar qoʻmitasi raisi Maryam Ahmedova ochdi va olib bordi.

Tuman hokimining birinchi oʻrinbosari Bahodir Ernazarov Amudaryo tumani hokimi Rajabboy Yoʻldoshevning tumanimiz ayol-qizlariga tabrigini oʻqib eshittirdi.

Tadbirda soʻzga chiqqanlar taʼkidlaganidek, ayolga ehtirom koʻrsatish yurtimizda maʼnaviy islohotlarimizning bosh mezoniga aylangan. Bu ehtirom zamirida oilaga, Vatanga, ertangi avlod kelajagiga boʻlgan eʼzoz va eʼtibor mujassam. Istiqlol yillarida xotin-qizlarimizning huquq va manfaatlarini himoya qilish, ularni davlat va jamiyat boshqaruviga keng jalb qilish, onalik va bolalikni asrash yoʻnalishlarida qator amaliy ishlar qilinayotgani tahsinga loyiqdir. Bugun davlat boshqaruvi, jamiyat qurilishida, maʼnaviy-demokratik yangilanishlarda ayollarimizning roli kun sayin ortib borayotgani ana shu ishlarning samarasidir.

Yaqindagina davlatimiz rahbarining qarori bilan Zulfiyaxonim tavalludining 100-yilligi yurtimiz boʻylab keng nishonlangani ham ayol zotiga hurmat va ehtirom koʻrsatishdek ezgu maqsadlarga yoʻnaltirilgan.

Tadbirda turli sohalarda samarali faoliyat yuritayotgan ilgʻor ayol-qizlarga tuman hokimligining faxriy yorliq va esdalik sovgʻalari topshirildi hamda tuman madaniyat va sport ishlari boʻlimi tomonidan tayyorlangan bayram dasturi namoyish qilindi.

Tuman hokimligining axborot xizmati.