Elga xizmat – oliy himmat

Men yetmishinchi yillarning boshlarida tumanimizdagi jamoa xoʻjaliklaridan birida temirchi usta vazifasida ishlayotgan otam ­– Tajim ustaning ishxonasiga tez-tez borib, uning ishlarini  kuzatardim, u-bu ishlariga yordamlashib yurardim. Ustachilikka qiziqishim borligini sezgan otam menga dastlab roʻzgʻor buyumlarini yasashni oʻrgata boshladi.

1975-yildan mustaqil usta sifatida ish boshladim. Shu davrdan to hozirgi kungacha hunarmandchilik bilan shugʻullanib kelaman.

Mustaqillik yillarida mamlakatimizda iqtisodiyotni liberallashtirish, boshqaruvning bozor tamoyillari va mexanizmlarini joriy etish, qulay ishbilarmonlik muhitini shakllantirish, kichik biznes va xususiy tadbirkorlikni rivojlantirish yoʻlidagi ortiqcha byurokratik toʻsiq va gʻovlarni bartaraf etish borasida tizimli ishlar amalga oshirilmoqda.

Prezidentimizning 2015-yil 15-maydagi "Xususiy mulk, kichik biznes va xususiy tadbirkorlikni ishonchli himoya qilishni taʼminlash, ularni jadal rivojlantirish yoʻlidagi toʻsiqlarni bartaraf etish chora-tadbirlari toʻgʻrisida”gi Farmoni xususiy tadbirkorlikning iqtisodiyotdagi roli va oʻrnini tubdan oshirish, tadbirkorlik faoliyatini tashkil etish yoʻlidagi mavjud toʻsiq va cheklovlarni tugatish, xususiy mulkning yalpi ichki mahsulotda, jumladan, xorij sarmoyasi ishtirokidagi ulushini izchil oshirish uchun yanada qulay iqtisodiy, huquqiy sharoit va ragʻbatlar yaratishga qaratilgan.

Mamlakatimizda tadbirkorlikni, shuningdek hunarmandchilikni har tomonlama qoʻllab-quvvatlash va rivojlantirishga juda katta eʼtibor berilayotganligi mening "Jumamurod usta” oilaviy korxonasini ochishimga sababchi boʻldi. Oilaviy korxonamizda 5-6 kishi, ayrim paytlarda esa 10 kishigacha mehnat qilamiz. Biz ishlab chiqarayotgan  40 xildan ziyod uy-roʻzgʻor buyumlari sifati yaxshiligi tufayli hamsha xaridorgir boʻlayapti.

Kelgusida biz ishlab chiqarayotgan mahsulotlarimiz turlarini koʻpaytirib, sifatini yanada yaxshilashga eʼtiborni kuchaytiramiz.

Maqsadimiz ­– eldoshlarimizga yanada yaxshiroq xizmat koʻrsatish va ularning olqishiga sazovor boʻlish.

Jumamurod BOBOJONOV, hunarmand.

Maqola Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan loyiha doirasida tayyorlandi.