3-sektor faoliyatiga bir nazar

Soʻnggi yillarda mamlakatimizda hududlarni kompleks ijtimoiy-iqtisodiy rivojlantirish, aholining yashash sharoitlarini tubdan yaxshilash, turmush darajasida sezilarli ijobiy oʻzgarishlarga erishish boʻyicha izchil chora-tadbirlar amalga oshirilmoqda. Ushbu maqsadda hududlarni sektorlarga boʻlib ishni tashkil etish tizimining joriy etilganligi xalq bilan manzilli muloqotning yoʻlga qoʻyilishiga imkon yaratdi.

Hokimlik, prokuratura, ichki ishlar va soliq xizmati organlari rahbarlari boshchilik qilayotgan sektorlar oʻz hududlarida barcha ijtimoiy-iqtisodiy sohadagi muammolarni hal etish bilan bir qatorda, huquqbuzarliklar profilaktikasi, qonuniylikni mustahkamlash va huquq-tartibotni taʼminlash boʻyicha zarur chora-tadbirlarni amalga oshirmoqdalar.       

Xususan, Amudaryo tumani Ichki ishlar boʻlimi boshligʻi Jamaladdin Yusupov rahbarlik qilayotgan 3-sektor hududida ham ayni vazifalalar ustuvor maqsadlardan biriga aylangan boʻlib, bu borada olib borilayotgan amaliy ishlar oʻzining ijobiy natijasini koʻrsatib kelmoqda.

Maʼlumot tariqasida Amudaryo tumani 3-sektor hududida 12 ta shaharcha, ovul va mahallalar mavjud boʻlib unda yashovchi axoli soni 54 ming 105 kishini tashkil qiladi.

Oʻtgan yili mahallalarda ish boshlagan hokim yordamchilari aholi bandligini taʼminlash va kambagʻallikni qisqartirish boʻyicha sektor rahbarining yaqin koʻmakchisi va maslahatdoshiga aylangan. Sektor hududidagi mahallalarni ijtimoiy-iqtisodiy rivojlantirish, infratuzilmasini yaxshilash, investitsion jozibadorligini oshirish boʻyicha sektor masʼullari va hokim yordamchilari hamkorligida amalga oshirilayotgan ishlar alohida eʼtirofga loyiq.

Sektor hududidagi Boyovul mahallasining Tadbirkorlar koʻchasida istiqomat qiluvchi Oybek Oʻrazimbetov shu yilning may oyida 33 mln.soʻm imtiyozli kredit olib “Yo'ldosh stom” klnikasini ochdi. Bu klinikada aholiga sifatli stomatologiya xizmatlari koʻrsatilib, bemorlar uchun barcha qulayliklar yaratilgan. Aytish lozimki, joriy yilning 6 oyi mobayida oilaviy tadbirkorlikni rivojlantirish maqsadida xokim yordamchilari tomonidan 357 nafar fuqaroga 2,5 mlrd.soʻmlik kredit mablagʻlagʻi ajratilgan. Bundan tashqari, doimiy daromadga ega, qoʻshimcha daromad topish istagi bor 366 nafar fuqaroning 64 nafariga yengil konstruktsiyali issiqxona xamda asbob-uskunalar sotib olishlari uchun 48,9 mln.soʻmlik subsidiyalar ajratilgan.

Sektor hududida joylashgan Durunki mahallasida ham boshqa mahallalar kabi aholini har tomonlama qoʻllab-quvvatlashga, bandligini taʼminlashga alohida ahamiyat berilmoqda. Mahallada istiqomat qiluvchi Mansur Hayitjanov ham hokim yordamchisi koʻmagi bilan 33 mln.soʻm miqdorida imtiyozli kredit olib, Xitoy Xalq Respublikasidan keltirilgan mini kombaynlarni xarid qildi. Ushbu kombaynlar yordamida oilasiga qoʻshimcha daromad olib kirish bilan birga mahalladoshlarining ogʻirini yengil qilib, bugʻdoy va sholilarini oʻrib-yigʻib olishga yordam berib kelmoqda.

Durunki mahallasida yoshovchi yana bir bandligi taʼminlangan tadbirkor ayollardan biri Muyassar Vaisovadir. Oʻz mahalladoshlarini sifatli va arzon biogumus bilan taʼminlab kelmoqda.

Durunki mahallasida tadbirkorlar sonining tobora oshib borishi ishsiz fuqarolarning bandligi taʼminlanishida, oilaviy daromadlari oshishi va iqtisodiyotimiz rivojlanishida muhim ahamiyatga ega boʻlmoqda.

225 mln.soʻm miqdorida imtiyozli kredit olib, mebel ishlab chiqarishga ixtisoslashgan “Yavkashev Jasur” masʼuliyati cheklangan jamiyati faoliyatini yanada rivojlantirayotgan tadbirkor Jasurbek Yavkashev ham 4 nafar ishsiz yoshlarning bandligi taʼminlanishiga xissa qoʻshdi. Bugungi kunda ushbu mebel ishlab chiqariluvchi tsexda zamonaviy rusumdagi oshxona va mexmonxona mebellari sifatli va arzon narxlarda ishlab chiqarilmoqda.

Shuningdek, sektor hududida istiqomat qiluvchi ijtimoiy himoyaga muhtoj fuqarolarga ham sektor masʼullari tomonidan turli yordamlar koʻrsatilib kelinmoqda.

“Temir daftar” roʻyxatidagi oilalarga oziq-ovqat, dori-darmon vositalari tarqatish, uylarini taʼmirlab berish, boquvchisi yoʻq yakka-yu yolgʻiz ayollarga yangidan uy qurib berish ishlari hukumatimizning tegishli farmon va qarorlari asosida olib borilmoqda.

Shuningdek, sektor hududidagi mahallalarni yanada obodonlashtirish, ichki yoʻllarni taʼmirlash, yoʻl-transport hodisalari, huquqbuzarliklarning olidini olish borasida ham izchil saʼy-harakatlar amalga oshirilmoqda.

Biz esa xalq forovonligi va roziligi yoʻlida tinim bilmasdan mehnat qilayotgan sektor rahbari va masʼullarining ish faoliyatiga muvaffaqiyatlar tilaymiz.

Tuman hokimligining Axborot xizmati.