Nazarxon ovulining ijtimoiy-iqtisodiy rivoji masʼullar diqqat markazida

Amudaryo tumanining chekkasida joylashgan Nazarxon ovulini har tomonlama rivojlantirish, aholining turmush farovonligini oshirish hamda mavjud muammolarga joyida yechim topish maqsadida keng koʻlamli oʻrganish ishlari amalga oshirildi. Unga barcha sohalar – prokuratura, sogʻliqni saqlash, taʼlim, ichki ishlar, mahalla va oilani qoʻllab-quvvatlash, qishloq xoʻjaligi sohalari mutasaddilari, infratuzilma, elektr va ichimlik suvi taʼminotiga masʼul tashkilotlar rahbarlari jalb etildi.

Ovul fuqarolar yigʻini binosida fuqarolar uchun ochiq sayyor qabul tashkil etildi. Qabulda Nazarxon aholisini qiynayotgan muammolar, jumladan, ichimlik suvi taʼminoti, yoʻllarning holati, tibbiy xizmat koʻrsatish sifati, maktab va bogʻchalar faoliyati kabi masalalar yuzasidan murojaatlar qabul qilindi. Ochiq muloqot jarayonida har bir muammoli masala alohida roʻyxatga olinib, yechimi boʻyicha masʼullarga tegishli topshiriqlar berildi va ijrosi nazoratga olindi.

Taʼkidlash joizki, bugun mamlakatimizda davlat boshqaruvi tizimida ochiqlik va shaffoflik tamoyillarini keng tatbiq etish, xalq bilan bevosita muloqotda boʻlish, muammolarni joyida aniqlab, ularni hal qilish amaliyoti kun tartibidagi dolzarb masalaga aylangan. Ayniqsa, joylardagi rahbarlarning tashabbusi bilan tashkil etilayotgan sayyor qabullar, mahallabay ishlash tizimining amaliy samara berayotgani bunga yaqqol dalildir.

Shu maʼnoda, Amudaryo tumanining chekka hududlaridan biri – Nazarxon ovul fuqarolar yigʻinida oʻtkazilgan ochiq muloqot ham ana shunday ezgu maqsadlarga xizmat qilgani bilan ahamiyatli boʻldi. Ushbu muloqotda tumandagi barcha sohalar boʻyicha masʼul rahbarlar tuman prokurori Bahram Masharipov boshchiligida ishtirok etdi. Ochiq muloqot davomida fuqarolar oʻz muammolari bilan rahbarlarga bevosita murojaat qilish imkoniyatiga ega boʻldilar.

Eʼtiborga molik jihati shundaki, har bir murojaat faqat eshitilib qoʻyilmasdan, joyiga chiqqan holda oʻrganilib, mutasaddilar tomonidan tegishli choralar belgilandi. Ayrim masalalarga esa muloqot chogʻidayoq amaliy yechim topildi.

Tuman prokurori Bahram Masharipovning boshchiligida oʻtkazilgan ochiq muloqotda fuqarolarga qonunchilik asosida oʻz huquqlari tushuntirildi, ayrim huquqbuzarlik holatlari boʻyicha ogohlantirishlar berildi. Bunday muloqotlar aholining davlat organlariga boʻlgan ishonchini mustahkamlash bilan birga, muammolarning ildizini aniqlab, tizimli yechimlar topishda katta ahamiyat kasb etishi shubhasiz.

Bugun xalq dardini tinglash va muammolarini hal qilish har bir rahbar faoliyatining asosiy mezoniga aylangan. Nazarxon ovulida oʻtkazilgan ochiq muloqot buning yana bir amaliy isbotidir. Aholining dardi tinglangan joyda taraqqiyot boshlanadi, muammoga eʼtibor qaratilgan joyda esa davlatga ishonch ortadi. Asosiysi, bunday uchrashuvlar mamlakatimizning eng chekka mahallalari ham davlatimiz va hukumatimizning eʼtiborida ekanini amalda namoyon etadi.

Charos Arslonova, tuman hokimligining Axborot xizmati rahbari.