Amudaryo tumani Nazarxon ovulini ijtimoiy-iqtisodiy rivojlantirish boʻyicha oʻrganish ishlari olib borildi

Amudaryo tumani prokurori Bahram Masharipov boshchiligida barcha sohalar masʼullari tumanning eng chekka hududlaridan biri boʻlgan Nazarxon ovulida ijtimoiy-iqtisodiy holatni tahlil qilish va mavjud muammolarni bartaraf etish maqsadida oʻrganish ishlarini olib borishdi. Ushbu oʻrganish ishlari bevosita joylarga chiqqan holda, aholi bilan ochiq muloqot tarzida tashkil etildi. Aholining turmush sharoitini yaxshilash va ularning asosiy ehtiyojlarini qondirish maqsadida ushbu hududning rivojlanishiga alohida eʼtibor qaratildi.

Tuman prokurori Bahram Masharipovning Nazarxonga tashrifi davomida, aholi tomonidan bildirilgan murojaatlar va takliflar chuqur tahlil qilindi. Jumladan, ichimlik suvi taʼminotining sifati va uzluksizligi, mavjud yoʻl infratuzilmasining taʼmirlashga muhtojligi, elektr energiyasi taʼminotidagi uzilishlar, shuningdek, maktabgacha taʼlim muassasalarining yoʻqligi va tibbiy xizmatlarning uzoqligi kabi masalalar asosiy eʼtiborda boʻldi.

Masʼullar hududdagi ijtimoiy soha obʼektlari, umumtaʼlim maktablari, oilaviy poliklinika, maktabgacha taʼlim tashkilotlarining holatini ham koʻzdan kechirdilar.

Oʻrganish natijalari asosida Nazarxon ovulini ijtimoiy-iqtisodiy rivojlantirish boʻyicha aniq chora-tadbirlar rejasi ishlab chiqildi va shu kunning oʻzida qator muammolarni bartaraf qilish ishlari boshlab yuborildi. Xususan, mavjud suv tarmoqlarini taʼmirlash va ariqlarni kengaytirish ishlari boshlandi, ovul ichki yoʻllariga shagʻal toʻshash va taʼmirlash, shuningdek, elektr taʼminoti uzilishlarining oldini olish maqsadida elektr uzatish tarmoqlarini modernizatsiya qilish choralari koʻrilmoqda.

Qolaversa, maktabgacha taʼlim sifatini yaxshilash va qamrovini oshirish boʻyicha aniq chora-tadbirlar ishlab chiqilib, tibbiy xizmatlarni aholiga yaqinlashtirish, aholi bandligini taʼminlash, hududda kichik va oʻrta biznesni, ayniqsa, chorvachilik, dehqonchilik kabi qishloq xoʻjaligini turlarini rivojlantirish orqali aholining bandligini oshirish boʻyicha loyihalar amalga oshirilmoqda.

Bu kabi amaliy chora-tadbirlar Nazarxon ovulining ijtimoiy-iqtisodiy holatini yaxshilash, aholining turmush sifatini oshirish hamda hududning barqaror rivojlanishini taʼminlashga qaratilgan muhim qadam hisoblanadi. Tuman prokuraturasi tomonidan ushbu jarayon doimiy nazoratga olinib, belgilangan chora-tadbirlarning oʻz vaqtida va sifatli bajarilishi ustidan muntazam monitoring olib borilmoqda.

Charos Arslonova, tuman hokimligining Axborot xizmati rahbari.