YaNGI OʻQUV-QOʻLLANMALAR TAQDIMOTI OʻTKAZILDI

Oʻzbekiston Respublikasi Prezidentining 2022-yil 2-fevralda qabul qilgan “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida”gi qarori aholiga madaniy dam olish xizmatlarini koʻrsatish darajasini oshirish, respublikaning barcha hududlarida teatr, tsirk va boshqa turdagi ommaviy-madaniy va kontsert tomosha tadbirlarini tizimli ravishda yoʻlga qoʻyish, madaniyat va sanʼat sohasidagi isteʼdodli yosh ijodkorlarni izlab topish va qoʻllab-quvvatlash, taʼlim muassasalarini milliy cholgʻular, musiqa darsliklari, notalar toʻplamlari va oʻquv-metodik adabiyotlar bilan taʼminlanishini yaxshilashda muhim asos boʻlib xizmat qilmoqda.

Qaror ijrosi yuzasidan olib borilayotgan saʼy-harakatlar Amudaryo tumanidagi 9-sonli Bolalar musiqa va sanʼat maktabida ham oʻquv mashgʻulotlari samaradorligi oshishiga zamin yaratmoqda.

Shu yilning 1-mart kuni mazkur muassasada yana bir quvonchli voqea boʻldi. Yuqorida qayd etilgan qarorga asosan Oʻzbekiston Respublikasi Madaniyat va turizm vazirligi tomonidan maktabga 400 donadan ortiq yangi oʻquv qoʻllanmalar berildi. Bu oʻquv qoʻllanmalari foydalanishdagi avvalgi oʻquv qoʻllanmalaridan afzallik jihatlari bilan eʼtiborga sazovordir. Yaʼni ushbu oʻquv qoʻllanmadan har bir kuy va qoʻshiqni oʻquvchi oʻqibgina qolmay, kitobda koʻrsatilgan shtrix kod orqali tinglashi ham mumkin. Bu oʻquvchilarning berilgan kuy va qoʻshiqlarni yaxshi oʻzlashtirishlariga imkon beradi va ayni paytda oʻqituvchi mehnatini ham yengillashtiradi, darslar samaradorligiga ijobiy taʼsir koʻrsatadi.

Shu boisdan ham yangi kitoblarning maktabga taqdim etilishi oʻqituvchilar uchun ham, oʻquvchilar uchun ham quvonarli voqea boʻldi. Maktab direktori Yoʻldoshboy Abdalov barchani yangi oʻquv qoʻllanmalari bilan qutladi va yosh avlodga sanʼat sirlarini qunt bilan oʻrgatayotning ustoz-murabbiylar faoliyatiga muvaffaqiyatlar tiladi. Direktor oʻrinbosari Nigora Usmonova oʻquv-qoʻllanmalarni kutubxonachi Shahnoza Yoʻldoshevaga topshirar ekan, ularning muassasada taʼlim olayotgan oʻquvchilarning musiqiy bilim va koʻnikmalarini oshirishda, ularning qalbida milliy sanʼatimizni oʻrganishga boʻlgan intilish va ishtiyoqni oshirishga zamin boʻlishini taʼkidladi.

Maʼlumot uchun: ushbu muassasada bugungi kunda 262 nafar oʻquvchilar musiqa va sanʼat yoʻnalishida 12 ta yoʻnalishida taʼlim olishadi. Ularga 41 nafar malakali pedagoglar saboq berishayapti.

Shunisi eʼtiborliki, mazkur maktab oʻquvchilari respublikadagi musiqa va sanʼat maktablari oʻquvchilari orasida oʻtkazilayotgan turli koʻrik-tanlovlarda nufuzli oʻrinlarni egallab kelishmoqda.

Yangi oʻquv-qoʻllanmalar oʻquvchilarning musiqiy madaniyati va savodxonligini yuksaltirishda, estetik didi va dunyoqarashini kengaytirishga, sanʼatga boʻlgan hurmatini oshirishga xizmat qilishi shubhasiz. Tumanimiz musiqa va sanʼati gʻunchalari tarbiyalanayotgan maskanda kelgusida ham yuqorida qayd etilgan qaror muvofiq hali koʻpgina ijobiy oʻzgarishlarga erishiladi.

Oygul RAJABOVA.