2015-YIL - KEKSALARNI EʼZOZLASh YILI

Inson kamolotida oilaning oʻrni gʻoyat katta. Chunki biz ana shu moʻʼjaz makon, Vatanimiz ichra kichik Vatan - oilada tugʻilib, voyaga yetamiz. Jamiyat taraqqiyotiga hissa qoʻshishga qodir shaxs sifatida shakllanamiz. Shu aziz makon sari har lahzada talpinib turamiz.Chunki bu makonning bagʻri issiq, mehrigiyosi, odamni oʻziga tortib turuvchi ohanrabosi, qalblarimizni ravshan qilguvchi nurafshon ziyosi bor. Bundan ham muhimrogʻi esa, bizning har bir qadamimizni jiddiy nazorat qilib, xulq-atvorimizni odamiylik tarozisi ila oʻlchab, yaxshiliklarga yoʻllab turguvchi ota-onamiz, bobo va buvilarimizning mehr-muhabbati hokim unda. Asrlar davomida shakllangan oila qadriyati millatimiz uchun tom maʼnodagi intellektual maʼnaviy meroski, bu maʼnaviy merosni hech qanday moddiyat bilan qiyoslab boʻlmaydi. Oilamiz farishtasi, xonadonimiz koʻrki boʻlgan bobo va momolarimiz, aziz buvijonlarimiz qanotlari ostida bizning farzandlarimiz, hatto nevaralarimizning ulgʻayib, kamol topishida, bitta oila negizida shakllangan ibratga loyiq shajaraning yaralishida juda katta hikmatlar mujassam. Bu hikmatlar ana shu maʼnaviy-axloqiy tarbiya makoni – oiladagi toʻkislikni bir xil mezonda ushlab turuvchi ulugʻ yoshdagi keksalarimizning oʻziga xos oʻzbekona tutumlarida, oila aʼzolarining xulq-atvoridagi goʻzal sifat va fazilatlarda namoyon boʻladi. Shuning uchun ham keksalar bor joyda fayz bor, baraka bor. Va muhtaram Prezidentimiz taʼkidlaganlariday: "Qarisi bor uyning parisi bor,” "Qariyalar – xonadonlarimizning fayzi va farishtasi”dir.

Darvoqe, qaysiki xonadonda keksa bobo va momolarimiz boʻlsa, oʻsha xonadonning havosi boshqacha. Oʻgʻil-qiz, nevara-chevara, hatto evaralar jamligidagi bu katta xonadonda birdamlik, jipslik, oʻzaro mehr-oqibat oʻzgacha, goʻzal. Topish-tutishining barakasidan nainki xonadonga, balki el-yurtga fayz yogʻiladi. Chunki ikki-uch, hatto toʻrt avlod jipsligidagi ahillik, oʻzaro mehr-oqibat mezonlaridan kuch olgan, qalblari ziynatlangan xonadon aʼzolari keksalar duosini olib, yumushga, tijorat, tadbirkorlik ishlariga qoʻl uradilar, el-yurt manfaati uchun fidoyilik qiladilar. Xonadonlari ostonasidan tashlagan ezgu qadamlari el-yurt farovonligi yoʻlidagi niyatlari ulugʻ. Bu bobo va momolardan farzandlarga oʻtgan bebaho qadriyat.

Shuning uchun ham bizning mamlakatimizda yoshi ulugʻ keksalarga eʼtibor, gʻamxoʻrlik davlat siyosati darajasiga koʻtarilgan. Chunki turli sohalarda erishilayotgan yutuqlar, olib borilayotgan izchil islohotlar zamirida keksa avlod vakillarining betimsol fidoyiliklari mujassam. Sobiq tuzum davridagi qoliplashtirilgan siyosat tufayli xalqimiz hayotida yuz bergan katta yoʻqotishlar, qatagʻon va surgunlar, ikkinchi jahon urushi janggohlari hamda front orqasidagi mashaqqatli va azobli mehnat, yetar-yetmaslik, ocharchilik azoblariga sabr - toqat bilan chidab yashagan, har qanday murakkab vaziyatlarda ham oʻzligini yoʻqotmagan nuroniy yoshdagi otaxon va onaxonlarimizga eʼzoz va eʼtibor koʻrsatish bugun har birimizning zimmamizdagi farzandlik burchimizdir.

Mamlakatimizda yoshi ulugʻ insonlar hamisha eʼtiborda, eʼzozda. Keksalarimizning yaxshi dam olishlari, nuroniylik davrlarini huzur-halovatda oʻtkazishlari uchun davlatimiz tomonidan beqiyos gʻamxoʻrliklar qilinmoqda. Xususan, 2014-yil 13-oktyabrda qabul qilingan "1941-1945-yillardagi urush va mehnat fronti faxriylarini ijtimoiy qoʻllab-quvvatlashni yanada kuchaytirish chora-tadbirlari toʻgʻrisida”gi Prezident Farmoniga muvofiq endilikda ular yiliga bir marta oʻzlari uchun eng maʼqul boʻlgan muddatlarda sanatoriy-sogʻlomlashtirish muassasalari-da davlat xisobidan davolanib, sogʻliklarini mustahkamlashlari uchun keng imkoniyatlar yaratildi.

"Keksalarni eʼzolash yili” munosabati bilan oʻtgan yillarga berilgan nomlarga monand ishlab chiqiladigan Dasturda nuroniy keksalarimizga koʻrsatiladigan eʼtibor, eʼzoz, beqiyos gʻamxoʻrlik tadarruklari ila hayotimizga yanada fayz va baraka olib kiradi. Zero, ulugʻlari eʼzoz topgan yurt ahlining koʻngillari xotirjam, hayoti tinch, osoyishta, turmushi esa obod va farovon boʻladi. Xalqimiz hayotini ana shu mazmun, fayziyob onlar aslo tark etmasin. Xonadonlarimizning pir-u badavlat sohiblari, farishtalari omon boʻlsinlar!

Tahririyat.