“XAVFSIZ MAHALLA” TAMOYILI – AMALDA

Bugungi kunda “Inson qadri uchun” gʻoyasi ostida amalga oshirilayotgan islohotlarning tub mohiyati yurtimizda tinchlik va osoyishtalikni taʼminlashga qaratilgan. Qoraqalpogʻiston Respublikasi Ichki ishlar vazirligi huzuridagi Qoʻriqlash xizmati tomonidan respublika boʻylab oʻtkazilayotgan profilaktik tadbirlar ham aynan “Xavfsiz hudud” va “Xavfsiz mahalla” tamoyillarini roʻyobga chiqarishga xizmat qilmoqda.

“Sifat, ishonch va xavfsizlik” shiori ostida tashkil etilayotgan navbatdagi amaliy tadbirlar Xoʻjayli tumanining Madaniyat va Murtazabiy ovullari hududida oʻtkazildi. Tahlillarga koʻra, ushbu hududlar tumandagi kriminogen vaziyati nisbatan ogʻir boʻlgan nuqtalardan sanalib, bu yerda jinoyatchilik va huquqbuzarliklarning oldini olish boʻyicha kuchaytirilgan choralar koʻrish talab etilayotgan edi. Qoʻriqlash xizmati xodimlarining asosiy maqsadi — mazkur mahallalarni jinoyatchilikdan xoli hududga aylantirish va aholining tinch-osuda hayotini kafolatlashdan iborat.

Tadbir davomida soha mutaxassislari tomonidan fuqarolarga, tadbirkorlarga va savdo markazlari egalariga zamonaviy qoʻriqlash vositalarining afzalliklari tushuntirildi.  Xususan, xonadonlar, koʻp qavatli uylar va savdo doʻkonlariga zamonaviy qoʻriqlash signalizatsiya uskunalarini oʻrnatish — mol-mulkni oʻgʻirlikdan asrashning eng ishonchli yoʻli ekanligi hayotiy misollar bilan tushintirib berildi.

Bugungi kunda ushbu hududlardagi koʻplab obʼektlarga zamonaviy qoʻriqlash signalizatsiya moslamalarining oʻrnatilishi natijasida sodir etilishi mumkin boʻlgan bir qancha salbiy holatlarning oldi olinishiga erishilgani taʼkidlandi.

Tadbirda alohida eʼtibor qaratilgan yana bir jihat — jamoat joylari xavfsizligi boʻldi. Qoʻriqlash xizmati tomonidan bozorlar, xiyobonlar va fuqarolar gavjum toʻplanadigan boshqa joylarda “Tashvish tugmalari”ni oʻrnatish ishlari jadallashtirilmoqda.

Bu tizim xavf tugʻilgan zahoti tegishli xizmatlarga signal berish va qisqa vaqt ichida yordam olish imkonini beradi. Hududlarda tunu kun faoliyat olib borayotgan Qoʻriqlash xizmatining tezkor harakatlanuvchi guruhlari signal kelib tushgan manzilga zudlik bilan yetib borib, xavfsizlikni taʼminlash imkoniyatiga ega boʻladilar.

Ushbu profilaktik tadbirlar Ichki ishlar vazirligining Qoʻriqlash xizmati, Prokuratura organlari va “Mahalla yettiligi” bilan hamkorlikda amalga oshirilmoqda. Joylarda oʻtkazilayotgan tadbirlarda tegishli hududning mahalla raisi, hokim yordamchisi, yoshlar yetakchisi, xotin-qizlar faoli, profilaktika inspektori, soliq va ijtimoiy xizmat xodimi ishtirok etib, oʻz mahallasini xavfsiz hududga aylantirish ishlariga munosib hissa qoʻshmoqdalar.

Bu kabi targʻibot-tashviqot ishlari respublikamizning boshqa tuman va shaharlarida ham davom ettirilib, har bir fuqaroning uyida va koʻchada oʻzini xavfsiz his qilishiga zamin yaratmoqda.