GʻALLA OʻRIMIGA TEXNIKALAR TAYYoRGARLIGIGA BAGʻIShLANGAN KOʻRGAZMALI SEMINAR BOʻLIB OʻTDI
Tumanimizda gʻallachilik boʻyicha 2 ta klaster – “Qipchoq g‘alla klaster” va “Amu Rich Xarvest” masʼuliyati cheklangan jamiyatlari faoliyati yoʻlga qoʻyilgan boʻlib, 344 ta fermer xoʻjaliklarida jami 6000 gektar gʻalla maydoni mavjud.
2021-yil kuzida 2022-yil hosili uchun gʻalla ekilgan ushbu maydonlardagi barcha bugʻdoy maysalari hozirgi kunda boshoqlash fazasida rivojlanmoqda. Shu kungacha bugʻdoyzorlar agrotexnika qoidalari asosida parvarish qilindi.
Hozirgi kungacha gʻalla maydonlarini har gektariga 200 kilogramm hisobida uchinchi marta azotli mineral oʻgʻitlar bilan oziqlantirish ishlari nihoyasiga yetkazildi. Begona oʻtlarga, zararkunanda hasharotlarga qarshi biologik ishlov berildi. Natijada barcha maydonlarda yuqori hosil toʻplanishiga erishildi.
Yaqin kunlar ichida joriy qishloq xoʻjaligi yilining ilk hosili – gʻalla oʻrim-yigʻimiga kirishiladi. Bu jarayonda texnikalar kuchidan – kombaynlar, transport traktorlaridan unumli foydalanish muhim ahamiyat kasb etadi.
Joriy yilgi gʻalla oʻrim-yigʻimini namunali tashkil etish, yetishtirilgan hosilni nest-nobud qilmasdan yigʻishtirib olish yuzasidan qizgʻin tayyorgarliklar olib borildi.
Shu yilning 12-may kuni “Agroservis MTP” masʼuliyati cheklangan jamiyatining ustaxonasida oʻtkazilgan koʻrgazmali seminarda ham texnikalarning mavsumga tayyorgarligi koʻrib chiqildi.
Tadbirga tuman hokimi Sultonboy Yoʻldoshev, “OʻzAgroinspektsiya” Qoraqalpogʻiston Respublikasi boshqarmasi boshligʻi Anvar Yoʻldoshev, tumandagi sektorlar rahbarlari, qishloq xoʻjaligi mutasaddilari, dehqon, fermer va tomorqa yer egalari Kengashi masʼullari, fermer xoʻjaliklari raislari hamda fermerlarga xizmat koʻrsatuvchi korxona-tashkilotlar rahbarlari, kombaynlar boshqaruvchilari ishtirok etdilar.
Koʻrgazmali seminarni tuman hokimi Sultonboy Yoʻldoshev ochdi va yaqinlashib kelayotgan masʼuliyatli mavsum - gʻalla oʻrim-yigʻimini uyushqoqlik bilan tashkil etish borasidagi vazifalarga keng toʻxtaldi. “OʻzAgroinspektsiya” Qoraqalpogʻiston Respublikasi boshqarmasi boshligʻi Anvar Yoʻldoshev xalqimizning rizq-roʻzi, dehqonlarimiz fidoyi mehnatlari evaziga yaratilgan gʻalla hosili yigʻim-terimi mavsumida ishtirok etadigan barcha korxona-tashkilotlar rahbarlariga ishlarni uyushqoqlik bilan tashkil etish yuzasidan tavsiyalar berdi.
Tadbirda joriy yilgi gʻalla oʻrim-yigʻimi mavsumida 16 dona yuqori unumli oʻrim kombaynlari ishtirok etishi, shularning barchasi “Agroservis MTP” masʼuliyati cheklangan jamiyati ustaxonasiga taʼmirga tortilib, toʻla taʼmirlanib, tayyorlov chizigʻiga qoʻyilganligi va sertifikat asosida qabul qilib olish ishlari amalga oshirilayotganligi taʼkidlandi.
Shuningdek, oʻrim kombaynlari mavsum oldidan texnik koʻrikdan oʻtkazilib, yongʻinga qarshi vositalar bilan jihozlangani, kombayn operatorlari va otryad aʼzolarining favqulodda vaziyatlar sodir boʻlganda qanday harakat qilishi, xavfsizlik boʻyicha tavsiyalar, yongʻinlarning oldini olish yuzasidan yoʻl-yoʻriqlar berildi.
Koʻrgazmali seminarda gʻalla oʻrimiga tayyorgarlik boʻyicha mavjud kamchiliklar ham tilga olinib, ularni bartaraf etish masʼullarga topshirildi. Shuningdek, gʻalla oʻrim-yigʻimida ishtirok etadigan 16 ta kombaynlar operatorlariga masʼuliyati cheklangan jamiyat shaklidagi “Amudaryotex” xorijiy korxonasi paxta toʻqimachilik klasteri tomonidan ragʻbat sifatida un, moy kabi oziq-ovqat mahsulotlari taqdim etildi.
O.RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
