Gʻalladan boʻshagan maydonlarga takroriy ekinlar ekiladi

Mamlakatimiz qishloq xoʻjaligida erishilayotgan yuksak natijalar, xususan, gʻallachilik sohasidagi muvaffaqiyatlar oziq-ovqat xavfsizligini taʼminlashda muhim ahamiyat kasb etadi. Bu borada Amudaryo tumani mirishkorlari joriy yilgi gʻalla topshirish shartnomaviy rejasini respublikada birinchilardan boʻlib, ortigʻi bilan bajarib, yuksak marralarni zabt etishdi.

Joriy mavsumda tuman boʻyicha 12 ming 222 tonna gʻalla topshirish belgilangan edi. Fermer xoʻjaliklari va fidokor dehqonlarning tinimsiz, halol mehnati samarasi oʻlaroq, mazkur reja 108,4 foizga bajarildi. Natijada davlat xirmoniga 13 ming tonnadan ortiq sara bugʻdoy yetkazib berildi. Eʼtiborli jihati shundaki, Amudaryo tumani oʻtgan yillarda ham gʻalla topshirish rejasini mamlakat miqyosida birinchilardan boʻlib uddalagan edi. Bu esa hududda dehqonchilik madaniyati, agrotexnik tadbirlarning toʻgʻri va oʻz vaqtida olib borilishi mustahkam va barqaror tus olganidan yaqqol dalolat beradi.

Ana shunday ulkan zafarda tumandagi har bir hududning, har bir fermer xoʻjaligining oʻziga xos munosib ulushi bor. Xususan, tumanning Qumyop mahallasida joylashgan "Miskin ota" fermer xoʻjaligi ham bu borada yuqori natijalarga erishib kelmoqda. Tajribali va intiluvchan rahbar Sarvar Matchonov yetakchiligidagi mazkur xoʻjalik joriy yil hosili uchun 35 gektar maydonga serhosil "Alekseyevich" navli gʻalla urugʻini qadagan edi.

Yerga mehr berish, parvarish va agrotexnika qoidalariga qatʼiy amal qilish tezda oʻz samarasini koʻrsatdi. Shartnomaga muvofiq xoʻjalik 112 tonna don topshirishi kerak boʻlgan boʻlsa-da, amalda bu koʻrsatkich 115 tonnani tashkil etib, shartnomaviy reja ortigʻi bilan bajarildi. Bunday yuqori hosildorlikka erishishda, albatta, ekin yerlarining maxsus lazer qurilmasi yordamida tekislangani, ekish, sugʻorish, oziqlantirish, suspenziya bilan ishlov berish va boshqa barcha agrotexnik tadbirlarning oʻz vaqtida bajarilgani hal qiluvchi omil boʻldi. Ilgʻor innovatsion texnologiyalarning joriy etilishi suvdan oqilona foydalanish va oʻgʻitlarning yerga bir tekis singishini taʼminlab, hosildorlikni keskin oshirishga xizmat qildi.

Mazkur fermer xoʻjaligida jami 41 nafar ijarachi mehnat qilmoqda va ularning har biri jamoaning umumiy muvaffaqiyatiga kundalik mehnati bilan oʻz hissasini qoʻshib kelmoqda. Oʻrim-yigʻim mavsumida ayniqsa kombayn haydovchisi Toʻlqin Erdashev hamda xoʻjalik ish yurituvchisi Zokir Eshmonovlarning xizmatlari alohida eʼtiborga molikdir. Ularning oʻz kasbiga boʻlgan sadoqati va kechayu kunduz qilgan fidokorona mehnati natijasida pishib yetilgan hosil zarracha nes-nobud qilinmasdan, qisqa muddatlarda oʻrib-yigʻib olindi.

Xoʻjalik tasarrufida jami 6 ta zamonaviy qishloq xoʻjaligi texnikasi, jumladan, "Orion", "VT-150" hamda 2 ta "Belarus 80x" rusumli traktorlar mavjud boʻlib, ushbu qudratli texnikalar dala ishlarini unumli, tezkor va sifatli bajarishda dehqonlarning asosiy koʻmakchisiga aylangan.

Shuni alohida taʼkidlash joizki, "Miskin ota" fermer xoʻjaligi faqatgina gʻallachilik bilan cheklanib qolmagan. Bugungi kunda xoʻjalik tasarrufidagi 50 gektar yer maydoniga "Sulton" navli chigit ekilgan boʻlib, hozirda gʻoʻza parvarishi ham eng qizgʻin pallaga kirgan. Mehnatkash dehqonlarning kelgusi rejalari ham bisyor: endilikda gʻalladan boʻshagan yer maydonlaridan yanada samarali foydalanish maqsadida, bu joylarga takroriy ekin sifatida mosh ekish rejalashtirilgan. Bu tadbir, oʻz navbatida, tuproq unumdorligini oshirish va tiklash bilan birga, bozorlarimizni arzon hamda sifatli oziq-ovqat mahsulotlari bilan taʼminlashga, qolaversa, fermer xoʻjaligining iqtisodiy salohiyatini yanada yuksaltirishga xizmat qiladi.

Amudaryolik mirishkorlarning shijoati, zamonaviy ilm-fan yutuqlariga tayangan holda yerga boʻlgan munosabati yurtimiz farovonligi va xalqimiz dasturxoni toʻkinligini taʼminlash yoʻlidagi eng mustahkam poydevor vazifasini oʻtamoqda.