Ғалладан бўшаган майдонларга такрорий экинлар экилади

Мамлакатимиз қишлоқ хўжалигида эришилаётган юксак натижалар, хусусан, ғаллачилик соҳасидаги муваффақиятлар озиқ-овқат хавфсизлигини таъминлашда муҳим аҳамият касб этади. Бу борада Амударё тумани миришкорлари жорий йилги ғалла топшириш шартномавий режасини республикада биринчилардан бўлиб, ортиғи билан бажариб, юксак марраларни забт этишди.

Жорий мавсумда туман бўйича 12 минг 222 тонна ғалла топшириш белгиланган эди. Фермер хўжаликлари ва фидокор деҳқонларнинг тинимсиз, ҳалол меҳнати самараси ўлароқ, мазкур режа 108,4 фоизга бажарилди. Натижада давлат хирмонига 13 минг тоннадан ортиқ сара буғдой етказиб берилди. Эътиборли жиҳати шундаки, Амударё тумани ўтган йилларда ҳам ғалла топшириш режасини мамлакат миқёсида биринчилардан бўлиб уддалаган эди. Бу эса ҳудудда деҳқончилик маданияти, агротехник тадбирларнинг тўғри ва ўз вақтида олиб борилиши мустаҳкам ва барқарор тус олганидан яққол далолат беради.

Ана шундай улкан зафарда тумандаги ҳар бир ҳудуднинг, ҳар бир фермер хўжалигининг ўзига хос муносиб улуши бор. Хусусан, туманнинг Қумёп маҳалласида жойлашган "Мискин ота" фермер хўжалиги ҳам бу борада юқори натижаларга эришиб келмоқда. Тажрибали ва интилувчан раҳбар Сарвар Матчонов етакчилигидаги мазкур хўжалик жорий йил ҳосили учун 35 гектар майдонга серҳосил "Алексеевич" навли ғалла уруғини қадаган эди.

Ерга меҳр бериш, парвариш ва агротехника қоидаларига қатъий амал қилиш тезда ўз самарасини кўрсатди. Шартномага мувофиқ хўжалик 112 тонна дон топшириши керак бўлган бўлса-да, амалда бу кўрсаткич 115 тоннани ташкил этиб, шартномавий режа ортиғи билан бажарилди. Бундай юқори ҳосилдорликка эришишда, албатта, экин ерларининг махсус лазер қурилмаси ёрдамида текислангани, экиш, суғориш, озиқлантириш, суспензия билан ишлов бериш ва бошқа барча агротехник тадбирларнинг ўз вақтида бажарилгани ҳал қилувчи омил бўлди. Илғор инновацион технологияларнинг жорий этилиши сувдан оқилона фойдаланиш ва ўғитларнинг ерга бир текис сингишини таъминлаб, ҳосилдорликни кескин оширишга хизмат қилди.

Мазкур фермер хўжалигида жами 41 нафар ижарачи меҳнат қилмоқда ва уларнинг ҳар бири жамоанинг умумий муваффақиятига кундалик меҳнати билан ўз ҳиссасини қўшиб келмоқда. Ўрим-йиғим мавсумида айниқса комбайн ҳайдовчиси Тўлқин Эрдашев ҳамда хўжалик иш юритувчиси Зокир Эшмоновларнинг хизматлари алоҳида эътиборга моликдир. Уларнинг ўз касбига бўлган садоқати ва кечаю кундуз қилган фидокорона меҳнати натижасида пишиб етилган ҳосил заррача нес-нобуд қилинмасдан, қисқа муддатларда ўриб-йиғиб олинди.

Хўжалик тасарруфида жами 6 та замонавий қишлоқ хўжалиги техникаси, жумладан, "Орион", "ВТ-150" ҳамда 2 та "Беларус 80х" русумли тракторлар мавжуд бўлиб, ушбу қудратли техникалар дала ишларини унумли, тезкор ва сифатли бажаришда деҳқонларнинг асосий кўмакчисига айланган.

Шуни алоҳида таъкидлаш жоизки, "Мискин ота" фермер хўжалиги фақатгина ғаллачилик билан чекланиб қолмаган. Бугунги кунда хўжалик тасарруфидаги 50 гектар ер майдонига "Султон" навли чигит экилган бўлиб, ҳозирда ғўза парвариши ҳам энг қизғин паллага кирган. Меҳнаткаш деҳқонларнинг келгуси режалари ҳам бисёр: эндиликда ғалладан бўшаган ер майдонларидан янада самарали фойдаланиш мақсадида, бу жойларга такрорий экин сифатида мош экиш режалаштирилган. Бу тадбир, ўз навбатида, тупроқ унумдорлигини ошириш ва тиклаш билан бирга, бозорларимизни арзон ҳамда сифатли озиқ-овқат маҳсулотлари билан таъминлашга, қолаверса, фермер хўжалигининг иқтисодий салоҳиятини янада юксалтиришга хизмат қилади.

Амударёлик миришкорларнинг шижоати, замонавий илм-фан ютуқларига таянган ҳолда ерга бўлган муносабати юртимиз фаровонлиги ва халқимиз дастурхони тўкинлигини таъминлаш йўлидаги энг мустаҳкам пойдевор вазифасини ўтамоқда.