Амударё туманида ғалладан бўшаган майдонларда такрорий экинлардан юқори ҳосил олишнинг самарали усуллари ҳамда иқтисодий ўсиш кафолати

Амударё туманида 2025 йилда ғалла ўрим-йиғими муваффақиятли якунланиб, ҳосилдорлик кўрсаткичлари ўтган йилга нисбатан юқори бўлди. Айниқса, фермер хўжаликлари томонидан замонавий агротехника талабларига риоя қилингани, сув ресурсларидан оқилона фойдаланиш, сифатли уруғлик ва агроқўллаб-қувватлаш тизимининг яхшилангани натижасида юқори натижаларга эришилди.

Бу йил туманда 14 минг гектардан зиёд майдонда ғалла етиштирилди ва ҳозирги кунда ушбу майдонларнинг катта қисмида такрорий экинлар экилди. Хусусан, тезпишар ва қисқа вегетация даврига эга бўлган маҳсулотлар – мош, кунгабоқар, сабзавот ва полиз экинларини экиш ишлари жадал суръатларда олиб борилмоқда.

Бу борада туман фермерлар кенгаши томонидан такрорий экинларни экиш ҳамда агротехник тадбирларни тўғри амалга ошириш бўйича кўрсатма ва маслаҳатлар бериб келинмоқда.

Туманда 3540 гектар майдонда такрорий сабзавот-полиз, дуккакли, мойли экинлар экиш режалаштирилган бўлиб, ишлар жадаллик билан олиб борилмоқда.

Амударё тумани Тўлқин ҳудудидаги “Амат Тўраев” фермер хўжалиги майдонида ҳудуддаги фермер хўжаликлар, тегишли соҳа вакиллари иштирокида такрорий экинларни экишда агротехник тадбирларни тўғри ташкил қилиш бўйича семинар бўлиб ўтди.

“Амат Тўраев” фермер хўжалиги томонидан 31,1 гектар майдонда такрорий экинлар экиш ишлари тўлиғи билан якунланган бўлиб, 15 гектар дуккакли, 5 гектар мойли экинлар, 6,1 гектар озуқа экинлар, 5 гектар картошка экинлари экилди. Мазкур экинлар экспортбоп, юқори ҳосилдорликка эга навлар асосида танлаб олиниб, ҳар бир фермер хўжалиги томонидан агротехник тадбирлар белгиланган муддатда ва сифатли амалга оширилмоқда. Айниқса, такрорий экинлар учун замонавий, сувни тежовчи технологиялар жорий этилаётгани эътиборга молик.

Алоҳида фаоллик кўрсатаётган қуйидаги илғор фермер хўжаликлари: “Тажимуротов Исмоил”, “Аннамуратов Баққол”, “Ражаб Жапақ”, “Уста Аллаёр”, “Азимжон вайсак”, “Холбек Элбек”, “Бобониёзов Фарход”, “Сапорбой Қодир”, “Гулмира Гулрух”, “Матназаров Содиқбек”, “Хидиров Самад”, “Алламберганов Шакиржон”, “Эрманов Урозбой”, “Куралбай Алламович”, “Жавоҳир Жавлонбек Шахзодбек”, “Юсуф хўжа”, “Амат Тўраев”, “Феруз Равшанбек”, “Якупова Гавҳар”, “Эркин Расулов асалчи” фермер хўжаликлари томонидан такрорий экинлар нафақат тупроқ унумдорлигини оширади, балки бозорда талаб юқори бўлган маҳсулотлар билан таъминлашда муҳим аҳамиятга эга. Шу билан бирга, ойлик даромад оқимини таъминлашга хизмат қилади.

Айни пайтда Амударё тумани ҳокимлиги, туман аграр бўлими, сув хўжалиги ва туман фермерлар кенгаши ҳамкорлигида такрорий экинлар экиш жараёнини қўллаб-қувватлаш, уруғ, минерал ўғит ва ёқилғи билан таъминлаш ишлари йўлга қўйилган. Шу билан бирга, ҳар бир фермер хўжалиги билан алоҳида “йўл харитаси” ишлаб чиқилиб, самарадорликни ошириш чоралари кўрилмоқда.

Амударёлик фермерлар экин майдонларидан икки карра фойда олишга интилмоқдалар. Бундай саъй-ҳаракатлар мамлакатимиз агросаноат салоҳиятини мустаҳкамлашда муҳим қадам ҳисобланади.

Амударё тумани Фермерлар Кенгаши