ҒАЛЛА ЎРИМИГА ТЕХНИКАЛАР ТАЙЁРГАРЛИГИГА БАҒИШЛАНГАН КЎРГАЗМАЛИ СЕМИНАР БЎЛИБ ЎТДИ

Туманимизда ғаллачилик бўйича 2 та кластер – “Qipchoq g‘alla klaster” ва “Amu Rich Xarvest” масъулияти чекланган жамиятлари фаолияти йўлга қўйилган бўлиб, 344 та фермер хўжаликларида жами 6000 гектар ғалла майдони мавжуд.

2021 йил кузида 2022 йил ҳосили учун ғалла экилган ушбу майдонлардаги барча буғдой майсалари ҳозирги кунда бошоқлаш фазасида ривожланмоқда. Шу кунгача буғдойзорлар агротехника қоидалари асосида парвариш қилинди.

Ҳозирги кунгача ғалла майдонларини ҳар гектарига 200 килограмм ҳисобида учинчи марта азотли минерал ўғитлар билан озиқлантириш ишлари ниҳоясига етказилди. Бегона ўтларга, зараркунанда ҳашаротларга қарши биологик ишлов берилди. Натижада барча майдонларда юқори ҳосил тўпланишига эришилди.

Яқин кунлар ичида жорий қишлоқ хўжалиги йилининг илк ҳосили – ғалла ўрим-йиғимига киришилади. Бу жараёнда техникалар кучидан – комбайнлар, транспорт тракторларидан унумли фойдаланиш муҳим аҳамият касб этади.

Жорий йилги ғалла ўрим-йиғимини намунали ташкил этиш, етиштирилган ҳосилни нест-нобуд қилмасдан йиғиштириб олиш юзасидан қизғин тайёргарликлар олиб борилди.

Шу йилнинг 12 май куни “Агросервис МТП” масъулияти чекланган жамиятининг устахонасида ўтказилган кўргазмали семинарда ҳам техникаларнинг мавсумга тайёргарлиги кўриб чиқилди.

Тадбирга туман ҳокими Султонбой Йўлдошев, “ЎзАгроинспекция” Қорақалпоғистон Республикаси бошқармаси бошлиғи Анвар Йўлдошев, тумандаги секторлар раҳбарлари, қишлоқ хўжалиги мутасаддилари, деҳқон, фермер ва томорқа ер эгалари Кенгаши масъуллари, фермер хўжаликлари раислари ҳамда фермерларга хизмат кўрсатувчи корхона-ташкилотлар раҳбарлари, комбайнлар бошқарувчилари иштирок этдилар.

Кўргазмали семинарни туман ҳокими Султонбой Йўлдошев очди ва яқинлашиб келаётган масъулиятли мавсум - ғалла ўрим-йиғимини уюшқоқлик билан ташкил этиш  борасидаги вазифаларга кенг тўхталди. “ЎзАгроинспекция” Қорақалпоғистон Республикаси бошқармаси бошлиғи Анвар Йўлдошев халқимизнинг ризқ-рўзи, деҳқонларимиз фидойи меҳнатлари эвазига яратилган ғалла ҳосили  йиғим-терими мавсумида иштирок этадиган барча корхона-ташкилотлар раҳбарларига ишларни уюшқоқлик билан ташкил этиш юзасидан тавсиялар берди.

Тадбирда жорий йилги ғалла ўрим-йиғими мавсумида 16 дона юқори унумли ўрим комбайнлари иштирок этиши, шуларнинг барчаси “Агросервис МТП” масъулияти чекланган жамияти устахонасига таъмирга тортилиб, тўла таъмирланиб, тайёрлов чизиғига қўйилганлиги ва сертификат асосида қабул қилиб олиш ишлари амалга оширилаётганлиги таъкидланди.

Шунингдек, ўрим комбайнлари мавсум олдидан техник кўрикдан ўтказилиб, ёнғинга қарши воситалар билан жиҳозлангани, комбайн операторлари ва отряд аъзоларининг фавқулодда вазиятлар содир бўлганда қандай ҳаракат қилиши, хавфсизлик бўйича тавсиялар, ёнғинларнинг олдини олиш юзасидан йўл-йўриқлар берилди.

Кўргазмали семинарда ғалла ўримига тайёргарлик бўйича мавжуд камчиликлар ҳам тилга олиниб, уларни бартараф этиш масъулларга топширилди. Шунингдек, ғалла ўрим-йиғимида иштирок этадиган 16 та комбайнлар операторларига масъулияти чекланган жамият шаклидаги “Amudaryotex” хорижий корхонаси пахта тўқимачилик кластери томонидан рағбат сифатида ун, мой каби озиқ-овқат маҳсулотлари тақдим этилди.

О.РАЖАБОВА.