Prezident qarorining mazmun-mohiyati yuzasidan tuman Madaniyat boʻlimida yigʻilish boʻlib oʻtdi

Xalqimizning kino, teatr, musiqaga, umuman, sanʼatga mehri, qiziqishi har doim yuqori boʻlgan. Aksariyat xonadonlarda rubob, dutor va doiraga koʻzingiz tushadi. Bugun sanʼat va madaniyat rivoji yangi bosqichga chiqdi, desak mubolagʻa boʻlmaydi. Buni mamlakatimizda oʻtkazilayotgan maqom, baxshichilik kabi xalqaro festivallar misolida ham koʻrishimiz mumkin. Ana shunday keng miqyosdagi madaniy anjumanlar, mamlakatimizda sohaga koʻrsatilayotgan yuksak eʼtibor tufayli madaniyat va sanʼat xalqimizning kundalik turmushida tobora yuksak oʻrin egallab bormoqda.

Shu maʼnoda, davlatimiz rahbarining “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida” gi qarori sanʼatsevar xalqimiz uchun muhim voqea boʻldi. Hujjat bilan aholi, ayniqsa, olis hududlarda istiqomat qiladigan fuqarolarga madaniy dam olish xizmatlarini koʻrsatish darajasini oshirish, umumtaʼlim maktablari, musiqa va sanʼat maktablarida taʼlim sifatini yanada oshirish, oʻquvchilarni musiqa darsliklari va cholgʻu asboblari bilan taʼminlashga doir qoʻshimcha-chora tadbirlar belgilandi. Ushbu qarorda belgilab berilgan vazifalarni amaliyotga tadbiq etish hamda ijrosini taʼminlash maqsadida Amudaryo tumani Madaniyat boʻlimi binosida yigʻilish boʻlib oʻtdi.

Yigʻilish tuman Madaniyat boʻlimi mudiri Shuhrat Yusupov, 9-sonli Bolalar musiqa va sanʼat maktabi direktori Yoʻldosh Abdalov hamda 21-sonli Bolalar musiqa va sanʼat maktabi direktori Ahmad Jumaboyevlar boshchiligida oʻtkazildi.

Mazkur yigʻilishda tuman Madaniyat boʻlimi, Xalq taʼlimi boʻlimi hamda tumandagi musiqa va sanʼat maktablarida faoliyat yurituvchi xodimlar, umumtaʼlim maktablardagi musiqa fani oʻqituvchilari qatnashib, qarorning mazmun-mohiyati va ahamiyati haqida yanada kengroq tushunchalarga ega boʻldilar.

 Qarorga muvofiq 2022-2023 oʻquv yilidan boshlab taʼlim muassasalarida oʻquvchi va talabalaring madaniy bilim va koʻnikmalarini, milliy madaniyatga muhabbatini oshirish, yosh isteʼdodlarni aniqlash va qoʻllab-quvvatlashga qaratilgan bir qator chora-tadbirlar amalga oshiriladi.

 Xususan, umumiy oʻrta taʼlim muassasalarida oʻquvchilarga milliy musiqa cholgʻularidan kamida bittasini chala olish mahorati oʻrgatiladi hamda bu haqda ularning taʼlim toʻgʻrisidagi hujjatlariga tegishli qayd kiritiladi.

Shuningdek, musiqa fani oʻqituvchilarining milliy cholgʻularning kamida bittasini, 2022-2023 oʻquv yilidan boshlab esa kamida 3 tasini chala olish mahoratiga ega boʻlishi majburiy hisoblanadi.

Musiqa darslarida “Hayotimga hamrohdir cholgʻu” shiori ostida cholgʻu ijrochiligi mashgʻulotlari yoʻlga qoʻyiladi.

Yigʻilishda ushbu qaror Taraqqiyot strategiyasini “Inson qadrini ulugʻlash va faol mahalla yili”da amalga oshirishga doir davlat dasturiga hamohangligi, muhimi, ushbu hujjat eng olis hududlar aholisining ham musiqaga oshno boʻlib, xalqimizning maʼnaviy saviyasi yanada yuksalishiga xizmat qilishi taʼkidlandi.

Albatta, davlatimiz rahbari tomonidan qabul qilinayotgan qarorlar va farmonlar negizida ertangi kun egalari boʻlgan yosh avlodning kelajagi yotadi. Shunday ekan, isteʼdodli yoshlarni har tomonlama qoʻllab-quvvatlashga har birimiz masʼulmiz.

F.Eshimbetova