GʻALLAChILIK DAROMADLI SOHAGA AYLANADI

Mamlakatimizda qishloq xoʻjaligi sohasida amalga oshirilayotgan islohotlar oʻzining ijobiy samaralarini berayotir. Gʻallachilikni rivojlantirish, istiqbolli, serhosil navlarni ekish va hosildorlik oshishiga erishish dehqonlarimiz faoliyatining asosiy mezoniga aylanmoqda desak, adashmagan boʻlamiz.

Amudaryo tumanida 2 ta gʻallachilik klasteri tashkil etilgan boʻlib, ularning 6000 gektar gʻalla maydoni bor. 2022-yil hosili uchun bugʻdoy ekilgan bu dalalardagi gʻallalar qish mavsumiga toʻliq tuplatib kiritildi va mineral oʻgʻitlar bilan oziqlantirildi.

Gʻalla maydonlaridan yuqori hosil yetishtirish uchun hududlarning tuproq-iqlim sharoitidan kelib chiqib, navlar tanlab ekilgani oʻzining natijalarini berdi: barcha maydonlarda toʻliq nihol undirib olindi. Dala boshlariga mahalliy oʻgʻit jamgʻarilib, koʻklamda bugʻdoyzorlarni sharbat usulida surogʻish uchun hozirlab qoʻyildi.

Tumanimizning Oq oltin ovulida 16 ta fermer xoʻjaliklari faoliyat yuritadi. Ularning paxta, poliz va sabzavot ekin maydonlaridan tashqari, 523 gektar gʻalla maydonlari bor.

Ushbu maydonlarga “Yogʻdu”, “Asr”, “Antonino” kabi tezpishar va hosildorligi yuqori boʻlgan gʻalla navlari ekilgan. Kuz faslida bir tekis unib chiqqan bugʻdoy nihollari oziqlantirildi, sugʻorildi. Natijada nihollar mustahkam tupladi.

Ayni kunlarda fermer xoʻjaliklarda gʻalla maydonlari boshiga mahalliy oʻgʻit jamgʻarish, sharbat usulida sugʻorish uchun xandaqlar qazish ishlari nihoyasiga yetkazilmoqda.

Ovulning “Shomurodova Sayyora” fermer xoʻjaligining 13 gektar yeriga 2022-yil hosili uchun gʻalla ekilgan.

Ushbu maydonlardan yuqori hosil yetishtirish maqsadida umidli “Yogʻdu” navi ekilgan. Urugʻlar unib chiqqach, ikki marta oziqlantirildi va sugʻorildi. 3 nafar pudratchilarga boʻlib berilgan gʻalla maydonlariga mahalliy oʻgʻit jamgʻarilib, bahorgi sugʻorishga tayyor qilib qoʻyildi.

Xoʻjalik gʻalla maydonlarini koʻzdan kechirgan kishi qishning izgʻirinli, qorli kunlarida ham ona zaminimiz taftidan kuch olib, bargi sargʻaysa-da, tuplari yashil rang kasb etib turgan bugʻdoy maysalalarini koʻrib, koʻz quvonadi.

Ayni kunlarda tumanimizda 2022-yil hosili uchun ekilgan dalalardan moʻl hosil yetishtirilishi uchun mavjud 16 ta biolaboratoriya, 2 ta oʻsimliklar klinikalarida bugʻdoyzorlarni kasalliklardan va zararli hasharotlardan va yovvoyi oʻtlardan himoya qilish maqsadida yetarli miqdorda biomahsulotlar tayyorlanmoqda.

Prezidentimiz Shavkat Mirziyoyevning “Gʻalla yetishtirish va sotishda erkin raqobatni taʼminlaydigan bozor tamoyillarini joriy etish toʻgʻrisida”gi Qaroriga muvofiq ichki bozorni gʻalla doni bilan kafolatli taʼminlash maqsadida 2022-yildan boshlab respublika hududida tavsiya etilgan bugʻdoy navlarini xoʻjalik yurituvchi subʼektlar tomonidan yer-suv sharoitlaridan kelib chiqib, mustaqil joylashtiradilar, 2022-2024-yillarda gʻallachilik klasterlari va fermer xoʻjaliklari yetishtirgan hosilning gʻalla ekilgan har gektar sugʻoriladigan maydon hisobidan respublika boʻyicha oʻrtacha 2,5 tonnadan bugʻdoyni erkin birja savdolari orqali, qolgan qismini toʻgʻridan-toʻgʻri shartnoma asosida erkin sotadi.

Mazkur qarorda belgilangan koʻpgina imtiyozlar tumanimizda ham gʻallachilikning daromadli sohaga aylanishida muhim huquqiy asos boʻlib xizmat qilmoqda.

Oygul RAJABOVA.