Toʻlqin ovulida gʻallachilik va bogʻdorchilik boʻyicha amaliy seminarlar boʻlib oʻtdi

Amudaryo tumanining Toʻlqin ovuli yana bir bor qishloq xoʻjaligi sohasidagi muhim voqealarga mezbonlik qildi. Bu safargi tadbirlar qishloq xoʻjaligi mahsuldorligini oshirish, zamonaviy agrotexnologiyalarni amaliyotga joriy etish va 2026-yil hosiliga puxta tayyorgarlik koʻrish maqsadida tashkil etilgan boʻlib, u nafaqat fermerlar, balki butun tuman qishloq xoʻjaligi tizimi uchun dolzarb ahamiyat kasb etdi.

Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari — Qishloq xoʻjaligi vaziri Shuhrat Teshayev boshchiligidagi ishchi guruh Toʻlqin ovulidagi “Amat Toʻrayev” fermer xoʻjaligida boʻlib, bu yerda 2026-yil hosili uchun ekilgan gʻalla maydonlarining holati bilan yaqindan tanishdi.

Seminar Qoraqalpogʻiston Respublikasi Vazirlar Kengashi tomonidan tasdiqlangan reja-grafik asosida oʻtkazildi. Unda Amudaryo tumani hokimi Sobir Xoʻjametov, Qishloq xoʻjaligi boʻlimi masʼullari, Agroinspektsiya mutaxassislari, Oʻsimliklar karantini va himoyasi inspektsiyasi xodimlari, Fermerlar kengashi vakillari hamda fermerlar ishtirok etdi.

Mutaxassislar tomonidan ekinlar holati chuqur tahlil qilinib, kuz-qish mavsumida bajarilishi zarur boʻlgan agrotexnik tadbirlar boʻyicha aniq koʻrsatmalar berildi. Xususan, gʻalla parvarishini texnologik ketma-ketlik asosida olib borish, oʻgʻitlash va sugʻorish rejimlarini toʻgʻri belgilash, kasallik va zararkunandalarga qarshi kurashishning zamonaviy usullarini qoʻllash, tuproq unumdorligini oshirishning ilmiy asoslangan yoʻnalishlari muhokama qilindi.

Bu koʻrsatmalar fermerlar uchun yangi mavsumga sifatli tayyorgarlik boʻlishi bilan birga, hosildorlikning barqaror oʻsishida ham muhim omil boʻlib xizmat qiladi.

Tadbirning ikkinchi qismida esa bogʻdorchilik yoʻnalishidagi oʻquv-amaliy seminar oʻtkazildi. Unda bogʻ qator oralaridan samarali foydalanish masalasi kun tartibidan oʻrin oldi. Mutaxassislar toʻqsonbosti usulida ekiladigan ekin turlari, ularni parvarishlash talablari, sugʻorish usullari, tuproqni saqlash texnologiyalari va hosildorlikni oshirish yoʻllari boʻyicha batafsil maʼlumotlar berishdi.

Seminar davomida bogʻlar kesimida amaliy mashgʻulotlar tashkil etilib, qatnashchilarga qator oralari uchun mos ekinlarni tanlash, ularni oʻz vaqtida parvarishlash, agrotexnik tadbirlarni toʻgʻri bajarish, suv resurslaridan tejamkorlik bilan foydalanish boʻyicha tavsiyalar berildi.

Seminar fermerlar bilimini boyitish, hosildorlikni oshirish va yer resurslaridan samarali foydalanishda muhim tajriba maydoni vazifasini bajarishi shubhasiz. Unda bildirilgan fikrlar, berilgan tavsiyalar va oʻtkazilgan amaliy mashgʻulotlar 2026-yil hosili uchun puxta zamin yaratishda muhim omil boʻlib xizmat qiladi. Eng asosiysi, bu jarayonlar qishloq xoʻjaligida zamonaviy yondashuvlarni keng joriy etish, fermer xoʻjaliklarini yangi bilimlar bilan qurollantirish, hududda samarali agrotexnologiyalarni amaliyotga tatbiq etish kabi ustuvor vazifalarga xizmat qiladi.

Charos Arslonova, tuman hokimligining Axborot xizmati rahbari.