EL DARDIGA DARMON ShIFOKORLAR

Tibbiy xizmat koʻrsatish sohasida jarrohlik muolajalari muhim oʻrin tutadi. Shu bois, mamlakatimiz tibbiyot tizimidagi jarrohlik boʻlimlari faoliyatini takomillashtirish, mazkur yoʻnalishga eng zamonaviy texnologiyalarni joriy etish, xalq salomatligini muhofaza qilishni davr talablari darajasiga koʻtarish, sohani eng soʻnggi rusumdagi tibbiy asbob-anjomlar bilan taʼminlashga alohida eʼtibor qaratilmoqda.

Tuman Tibbiyot birlashmasi huzuridagi rejali jarrohlik boʻlimi zamonaviy  meʼmoriy yechimga ega uch qavatli binoning uchinchi qavatida joylashgan boʻlib, mazkur bino 2013-yilda toʻliq taʼmirlanib, rekonstruktsiya qilingan, 30 bemor oʻrniga moʻljallangan boʻlim tarkibida 20 ta jarrohlik va 10 ta urologik kasalliklar oʻrni mavjud.

Boʻlim uzluksiz elektr energiyasi va issiqlik manbai bilan taʼminlangan. Har bir xona doimiy issiq va sovuq suv bilan taʼminlangan boʻlib, bemorlar uchun zarur maishiy imkoniyatlar yaratilib, mahalliy kanalizatsiya tarmogʻiga ulangan  va xonalar tibbiy linoleum bilan qoplangan.

Ayni paytda rejali jarrohlik boʻlimida 6 nafar oliy toifali mutaxassis shifokorlar faoliyat  olib borishmoqda. Ulardan 3 nafari kattalar va 1 nafari bolalar jarrohlari, 2 nafari esa oliy toifali urolog-shifokorlardir. Bemorlarga ikkita sektorda tun-u kun beminnat xizmat koʻrsatiladi. Birinchi  sektorda yiringli jarrohlik xonasi, ikkinchi sektorda esa toza bogʻlash xonasi boʻlib, ikkala sektor alohida joylashtirilgan. Har ikkala sektor xonalarida bemorlarga malakali tibbiyot xodimlari xizmat koʻrsatishadi.

Boʻlimning jarrohlik blokida jarrohlik amaliyotlarini muvafaqqiyatli amalga oshirish uchun barcha imkoniyatlar yaratilgan. Anesteziolog xonasi, intensiv jonlashtirish xonasi, jarrohlik amaliyoti uchun zarur ashyolarni tayyorlash xonasi, sterillangan jarrohlik anjomlari va yuvinish xonalari hamda jarrohlik amaliyotlari uchun maxsus zal shifokorlar uchun qulay va ketma-ketlikda joylashganligi bois, jarrohlik amaliyotlarini oʻtkazish jarayonida hech bir muammo boʻlmaydi.

Jarrohlik zali eng zamonaviy tibbiy asbob-uskunalar bilan jihozlanib, bu yerda doimiy moʻʼtadil havo sharoitini saqlab turishga moʻljallangan yangi konditsioner oʻrnatilgan. Shifokorlar uchun qulay jarrohlik stoli, elektro-koogulyator – EXVCh-300 apparati, Rossiya davlatida ishlab chiqarilgan FAZA-21 narkoz apparatlari  jarrohlik muolajalarini muvaffaqiyatli oʻtkazish imkonini bermoqda.

TTB tomonidan boʻlimga eng zarur yoritgichlar, sterillovchi va qurituvchi jihozlar oʻrnatilgani boʻlim shifokorlari uchun yana bir qulaylik boʻldi.

Ayniqsa, 2018-yilda “Salomatlik – 3” loyihasi doirasida boʻlimga keltirilgan yirik jarrohlik uskunalari toʻplami shifokorlarning yanada unumli va sifatli ishlashlari uchun zarur imkoniyat yaratdi.

Ayni paytda rejali jarrohlik boʻlimida  30 nafar xodim faoliyat yuritishmoqda. Ulardan 6 nafari oliy toifali mutaxassis shifokorlar, 11 nafari oʻrta maxsus maʼlumotli hamshiralar, 13 nafari esa enagalardir. Boʻlim rahbari, oliy toifali jarroh-shifokor R.Jumaniyozov, oliy toifali jarrohlar K.Amanov, B.Yavidov, jarrohlik bloki katta hamshirasi Ch.Oʻrozoqova, boʻlimning katta hamshirasi R.Nurmatova, muolaja hamshirasi N.Rahimova, navbatchi hamshiralar R.Ashirova, Z.Matkarimovalarning shirin, samimiy  muomalalaridan bemorlar hamisha minnatdor.

Boʻlimga 2021-yilning oʻtgan 10 oyi davomida 990 nafar turli toifadagi bemorlar qabul qilinib, ularning deyarli barchasi sogʻlomlashtirilib, oilalari bagʻriga qaytarildi.

Xalqimizda asrlar sinovidan oʻtgan ibratli ibora bor: “Jon ogʻrisa –tabib malham”,  deyishadi. Rejali jarrohlik boʻlimiga malham istab kelguvchilar uchun ularga  shirin muomalalari, shifobaxsh qoʻllari, ilm-u  salohiyati bilan quvvat bagʻishlab, dardlariga darmon boʻlayotgan salomatlik posbonlariga:

– Kasbingizdan kamol toping, Siz azizlarning  mehringizdan el-u xalq omon boʻlsin, shifokorlar! – deymiz.

Robiya YOʻLDOShEVA.