72-sonli qishloq oilaviy poliklinikasi shifokorlari tomonidan aholiga sifatli tibbiy xizmat koʻrsatilmoqda

Xizr eli va beshovul mahallalari ahli sogʻlom turmush tarziga juda eʼtiborli. Bunga biz ijodiy jamoamiz bilan mazkur mahallalar ahlining turmush tarzi bilan tanishganimizda yaqqol guvoh boʻldik. Ozoda va koʻkalamzor koʻchalar, fasad qismlaridan tortib, ichkari uy va hovlilargacha obodon, fayzli xonadonlar, hosillari yigʻishtirib olingan tomorqalarda amalga oshirilayotgan kuzgi-qishki yumushlar, hatto aholining toʻylar boshlayotganidan bizning ham kayfiyatimiz koʻtarildi. Aytishadi-ku, tinchlik, salomatlik, farovonlik bor joyda xursandchilik boʻladi, deb. Nazarimizda Beshovul va Xizr elida bularning barchasi bor, muhimi, mazkur mahallalar ahlining salomatligi doimiy shifokorlar nazoratida.

Aholining reproduktiv salomatligini, onalik va bolalikni muhofaza qilish, fertil yoshidagi, shuningdek, nogironligi boʻlgan va keksa yoshdagi fuqarolarga tibbiy xizmat koʻrsatishni zamon talablari darajasida amalga oshirishda hududdagi 72-sonli qishloq oilaviy poliklinikasi shifokorlari tomonidan amalga oshirilayotgan profilaktik tadbirlar, sogʻlom turmush tarzi targʻibotiga bagʻishlangan tibbiy suhbatlar oʻzining ijobiy natijasini bermoqda.

Mazkur tibbiy muassasa xizmat hududidagi 1412 ta xonadon va ushbu xonadonlarda istiqomat qiluvchi 7750 nafar aholining yoshi, kasbiy faoliyati, sogʻligi boʻyicha masʼul shifokorlar tomonidan roʻyxat shakllantirilgan boʻlib, ushbu roʻyxatga muvofiq aholining jinsi, yoshi, tibbiy xizmatga zarurati boʻyicha ish yuritiladi. Erkin Rajabov rahbarligida faoliyat olib boruvchi 72-sonli qishloq oilaviy poliklinikasida ayni paytda 6 nafar yuqori malakali shifokor va 34 nafar tibbiy xodimlar Beshovul va Xizr eli mahallalari aholisi salomatligini muhofaza qilishdek masʼuliyat hissi bilan mehnat qilishadi.

1 yoshgacha boʻlgan 174 nafar, 14 yoshgacha boʻlgan 2378 nafar bolajonlarning salomatligi shifokorlarning doimiy nazoratida. Fertil yoshidagi 1984 nafar ayollar salomatligini mustahkamlash, ular bilan yakkama-yakka suhbatlar oʻtkazish, ayniqsa, homilador ayollarning sogʻligini doimiy nazorat qilish boʻyicha amalga oshirilayotgan chora-tadbirlar tufayli erta homiladorlikning oldi olinib, chaqaloqlarning sogʻlom, nuqsonsiz tugʻilishiga erishilmoqda,

Shuningdek, 1 yoshdan 14 yoshgacha boʻlgan bolalarni mavsumiy va oʻtkir respirator kasalliklarga qarshi emlash chora-tadbirlari oʻz vaqtida amalga oshirilgani bois, soʻnggi yillarda hududda bolalar orasida turli yuqumli va yuqumli boʻlmagan kasalliklarga chalinish holatlari keskin kamaydi.

Muassasa shifokorlari tomonidan 40 yoshdan 100 yoshgacha boʻlgan 2173 nafar fuqaroga tibbiy xizmat koʻrsatish boʻyicha ham alohida roʻyxat shakllantirilgan boʻlib, tibbiy xodimlar uyma-uy kirib borgan holda har bir fuqaroning sogʻligi yuzasidan shikoyatlarini tinglash orqali, agar haqiqatdan ham davolanishi zarur boʻlsa, bemorlarning tibbiy muolaja olishlariga yaqindan yordam berishmoqda.

Ayniqsa, 100 yosh atrofidagi va 100 yoshdan oshgan va nogironligi boʻlgan fuqarolarning yaxshi dam olishlari va oʻz salomatliklariga eʼtiborli boʻlishlarini taʼminlashga qaratilgan tibbiy targʻibot va tashviqot tadbirlari tufayli hududda aynan shu toifadagi fuqarolar safi va uzoq umr koʻrish darajasi yil sayin oshib bormoqda. Ayni paytda nafaqadagi fuqarolar 705 nafardan ziyod boʻlib ularning asosiy qismi 70 va undan yuqori yoshdagi fuqarolardir.

Muassasa xizmat hududida istiqomat qiluvchi bir nafar 100 yoshdan oshgan fuqaroning bardam va tetikligidan ayonki, mazkur tibbiy muassasa shifokorlarining xalq bilan hamkor-u birdamligi, hududda sogʻlom turmush tarzini qaror toptirish maqsadida amalga oshirayotgan saʼy-harakatlari haqiqatdan ham eʼtiborga munosib.

Shuni alohida eʼtirof etish kerakki, 72-sonli qishloq oilaviy poliklinikasi shifokorlari nafaqat oʻz xizmat hududi aholisining salomatligini muhofaza qilish, balki obodonlashtirish va koʻkalamzorlashtirish tadbirlarining inson salomatligiga ijobiy taʼsiri, ijtimoiy faollikni oshirishdagi ahamiyati yuzasidan ham targʻibot-tashviqot tadbirlarini olib borishadi.

Natija esa kutilganidan ham ziyoda. Guvoh boʻlganimizdek, Beshovul va Xizr eli mahallalari hududi kun sayin obodon va koʻkalamzor goʻshaga aylanib bormoqda. Zero, obod va farovon goʻshalarda istiqomat qiluvchi insonlar nafaqat jismonan, balki maʼnan ham sogʻlom, ijtimoiy faol boʻladilar. 72-sonli qishloq oilaviy poliklinikasi jamoasi tomonidan amalga oshirilayotgan ishlar buning yaqqol dalilidir.

Robiya Yoʻldosheva.