"Taraqqiyot koʻzgusi" gazetasi nashriyotida yosh shoiraning yana bir kitobi nashrdan chiqdi

Muhtaram Prezidentimizning iqtidorli yoshlar kelajagini koʻzlab, ularni har tomonlama qoʻllab-quvvatlash maqsadida ilgari surgan 5 ta muhim tashabbusidan biri ijodkor yoshlarning iqtidor va qobiliyatlarini yuzaga chiqarish, ayniqsa, sanʼatda, adabiyot sohasida erishayotgan yutuqlarini ragʻbatlantirish, ijod maydoniga dadil kirib kelishlari uchun zarur shart-sharoitlar yaratishdan iborat. Bu borada “Taraqqiyot koʻzgusi” gazetasi tahririyati huzuridagi “Taraqqiyot koʻzgusi” gazetasi nashriyoti hamda tahririyat ijodiy jamoasi tomonidan amalga oshirilayotgan ishlar eʼtiborga munosib.

Gazeta tahririyati va “Taraqqiyot koʻzgusi” gazetasi nashriyoti ijodiy jamoasi  hamda tahririyat qoshidagi “Jayxun ilhomlari” nodavlat notijorat tashkiloti hamkorligida soʻnggi 2-3-yil ichida oʻnlab yosh ijodkorlarning ilk sheʼriy va nasriy toʻplamlari, shuningdek salkam 100 nafarga yaqin yoshlarning ijod namunalari jamlangan “Jayxun jilgʻalari”, “Yoshlik mavjlari” adabiy-badiiy anʼmanaxlar chop etilib, adabiyot ixlosmandlariga taqdim etildi. Ayni paytda nashriyot ijodiy jamoasi tomonidan qoraqalpoq millatiga mansub yosh havaskor ijodkorlar ijod namunalarini kitob holida chop etish uchun adabiy-badiiy tahrir jarayoni olib borilmoqda.

Shuni mamnuniyat bilan eʼtirof etish kerakki, oʻzining ilk sheʼrlar toʻplami orqali sheʼriyat ixlosmandlariga tanilib qolgan, ijoddek mashaqqatli maydonga dadil qadamlari, oʻziga xos uslubi bilan kirib kelayotgan shoir-u shoira yoshlarimiz ham talaygina. Tumanimizdagi 35-sonli maktabning 10-sinf oʻquvchisi Barnoxon Samandarova ana shunday qaynoq qalbli, tobora qalami charxlanib borayotgan ijodkor-yoshlardan.

Ilk ijod namunalari bilan tuman matbuoti, keyinchalik “Jetkenshek” gazetalari orqali tanilgan Barnoxon Samandarovaning ilk sheʼrlar toʻplami “Ilk parvozim” chop etilganiga hali koʻp vaqt boʻlgani yoʻq. “Ilk parvozim” toʻplamidagi begʻubor bolalik va ona Vatanga muhabbat, insoniylik tuygʻulari madh etilgan satrlar sheʼriyat ixlosmandlarini befarq qoldirmadi. 2021-yilning boshida nashr etilgan mazkur kitob nafaqat Barnoxonning tengdoshlari, balki koʻplab kitobsevar insonlarning maʼnaviyat mulkiga aylandi.

Yaqinda Barno Samandarovaning “Mehr” deb nomlangan ikkinchi kitobi ham nashriyotimizda chop etildi. Yosh ijodkorning ikkinchi kitobidan uning  turli mavzulardagi sheʼrlari va hayotiy hikoyalari joy olgan.

Joriy yilning 7-avgust sanasida Barnoxon tugʻilib-oʻsgan Xolimbeg ovulida yosh ijodkorning mazkur kitobi taqdimotiga bagʻishlangan tadbir boʻlib oʻtdi. Taqdimot marosimida Barnoxonning ijodiga oq yoʻl tilagan ustozlari va  “Jayxun ilhomlari” nodavlat notijorat tashkiloti raisi, Oʻzbekiston jurnalistlari ijodiy Uyushmasi aʼzosi Oʻrozali Reyimov, Yoshlar agentligi Amudaryo tuman boʻlimi boshligʻi Jasur Davletov, tuman hokimligi mutaxassislari, Barno Samandarovaning hamqishloqlari, tengdoshlari, yosh kitobxonlar ishtirok etishdi.

Tadbirda soʻzga chiqqan “Jayxun ilhomlari” nodavlat notijorat tashkiloti raisi Oʻrozali Reyimov, Yoshlar agentligi tuman boʻlimi boshligʻi Jasur Davletovlar Barnoxon Samandarovaning mehnatkashligi, bilimga intiluvchanligi, ijoddagi mashaqqatlari, izlanishlari haqida soʻz yuritishib, oʻz ustida tinimsiz ishlab, oʻqib-izlanayotgan yosh ijodkorning tumanimizdagi iqtidorli sanʼatkorlar bilan hamkorligi, allaqachon qoʻshiqqa aylanib, xalq qalbidan joy olishga ulgurgan sheʼrlari haqida mamnuniyat bilan soʻz yuritdilar.

Tadbir davomida Barno Samandarova taqdimot marosimi mehmonlari va hamqishloqlariga, bir guruh tengdoshlariga kitoblarini taqdim etdi, sheʼrlaridan namunalar oʻqib, kelgusidagi rejalari, orzulari haqida gapirib berdi.

Robiya YOʻLDOShEVA.