"Тараққиёт кўзгуси" газетаси нашриётида ёш шоиранинг яна бир китоби нашрдан чиқди

Муҳтарам Президентимизнинг иқтидорли ёшлар келажагини кўзлаб, уларни ҳар томонлама қўллаб-қувватлаш мақсадида илгари сурган 5 та муҳим ташаббусидан бири ижодкор ёшларнинг иқтидор ва қобилиятларини юзага чиқариш, айниқса, санъатда, адабиёт соҳасида эришаётган ютуқларини рағбатлантириш, ижод майдонига дадил кириб келишлари учун зарур шарт-шароитлар яратишдан иборат. Бу борада “Тараққиёт кўзгуси” газетаси таҳририяти ҳузуридаги “Тараққиёт кўзгуси” газетаси нашриёти ҳамда таҳририят ижодий жамоаси томонидан амалга оширилаётган ишлар эътиборга муносиб.

Газета таҳририяти ва “Тараққиёт кўзгуси” газетаси нашриёти ижодий жамоаси  ҳамда таҳририят қошидаги “Жайхун илҳомлари” нодавлат нотижорат ташкилоти ҳамкорлигида сўнгги 2-3 йил ичида ўнлаб ёш ижодкорларнинг илк шеърий ва насрий тўпламлари, шунингдек салкам 100 нафарга яқин ёшларнинг ижод намуналари жамланган “Жайхун жилғалари”, “Ёшлик мавжлари” адабий-бадиий анъманахлар чоп этилиб, адабиёт ихлосмандларига тақдим этилди. Айни пайтда нашриёт ижодий жамоаси томонидан қорақалпоқ миллатига мансуб ёш ҳаваскор ижодкорлар ижод намуналарини китоб ҳолида чоп этиш учун адабий-бадиий таҳрир жараёни олиб борилмоқда.

Шуни мамнуният билан эътироф этиш керакки, ўзининг илк шеърлар тўплами орқали шеърият ихлосмандларига танилиб қолган, ижоддек машаққатли майдонга дадил қадамлари, ўзига хос услуби билан кириб келаётган шоир-у шоира ёшларимиз ҳам талайгина. Туманимиздаги 35-сонли мактабнинг 10-синф ўқувчиси Барнохон Самандарова ана шундай қайноқ қалбли, тобора қалами чархланиб бораётган ижодкор-ёшлардан.

Илк ижод намуналари билан туман матбуоти, кейинчалик “Жеткеншек” газеталари орқали танилган Барнохон Самандарованинг илк шеърлар тўплами “Илк парвозим” чоп этилганига ҳали кўп вақт бўлгани йўқ. “Илк парвозим” тўпламидаги беғубор болалик ва она Ватанга муҳаббат, инсонийлик туйғулари мадҳ этилган сатрлар шеърият ихлосмандларини бефарқ қолдирмади. 2021 йилнинг бошида нашр этилган мазкур китоб нафақат Барнохоннинг тенгдошлари, балки кўплаб китобсевар инсонларнинг маънавият мулкига айланди.

Яқинда Барно Самандарованинг “Меҳр” деб номланган иккинчи китоби ҳам нашриётимизда чоп этилди. Ёш ижодкорнинг иккинчи китобидан унинг  турли мавзулардаги шеърлари ва ҳаётий ҳикоялари жой олган.

Жорий йилнинг 7 август санасида Барнохон туғилиб-ўсган Холимбег овулида ёш ижодкорнинг мазкур китоби тақдимотига бағишланган тадбир бўлиб ўтди. Тақдимот маросимида Барнохоннинг ижодига оқ йўл тилаган устозлари ва  “Жайхун илҳомлари” нодавлат нотижорат ташкилоти раиси, Ўзбекистон журналистлари ижодий Уюшмаси аъзоси Ўрозали Рейимов, Ёшлар агентлиги Амударё туман бўлими бошлиғи Жасур Давлетов, туман ҳокимлиги мутахассислари, Барно Самандарованинг ҳамқишлоқлари, тенгдошлари, ёш китобхонлар иштирок этишди.

Тадбирда сўзга чиққан “Жайхун илҳомлари” нодавлат нотижорат ташкилоти раиси Ўрозали Рейимов, Ёшлар агентлиги туман бўлими бошлиғи Жасур Давлетовлар Барнохон Самандарованинг меҳнаткашлиги, билимга интилувчанлиги, ижоддаги машаққатлари, изланишлари ҳақида сўз юритишиб, ўз устида тинимсиз ишлаб, ўқиб-изланаётган ёш ижодкорнинг туманимиздаги иқтидорли санъаткорлар билан ҳамкорлиги, аллақачон қўшиққа айланиб, халқ қалбидан жой олишга улгурган шеърлари ҳақида мамнуният билан сўз юритдилар.

Тадбир давомида Барно Самандарова тақдимот маросими меҳмонлари ва ҳамқишлоқларига, бир гуруҳ тенгдошларига китобларини тақдим этди, шеърларидан намуналар ўқиб, келгусидаги режалари, орзулари ҳақида гапириб берди.

Робия ЙЎЛДОШЕВА.