Oʻz nonimizning taʼmi shirin

Oʻz nonimizning taʼmiga ne yetsin! Quyoshli yurtimizning taftida yetilib pishgan qirmizi don xirmonlari yuksalgani sayin yurtdoshlarimizning quvonchiga-quvonch qoʻshilmoqda. Boisi, xirmon donga toʻlgani - yurt maʼmurligi, degani.

Bir paytlar xalqimiz ehtiyoji uchun un boshqa davlatlardan olib kelinardi. Mustaqilligimiz sharofati bilan paxta yakkahokimligiga chek qoʻyilib, xalqimiz uchun kerakli gʻalla, meva, sabzavotlar yetishtirishga eʼtibor qaratildi. Fermerlarga keng imkoniyatlar va sharoitlar yaratib berilgani tufayli qisqa vaqtda gʻalla mustaqilligiga erishildi.

Men rahbarlik qilayotgan "Bogʻi Eram” fermer xoʻjaligimizda ham har yili bugʻdoydan koʻzlanganiday hosil olib kelayapmiz.

Qisqa kunlar ichida 15 gektarlik maydonlarimizdan 37 tonna yuqori sifatli bugʻdoyni davlat xirmoniga topshirib, shartnomaviy rejamizni ortigʻi bilan ado etdik.

Qoraqalpogʻistonda birinchi boʻlib tumanimiz gʻallakorlarining bugʻdoy yetishtirish rejasini ado etgani, bunda bizning ham ulushimiz borligi bilan cheksiz quvonamiz.

Xoʻjaligimizda 68 gektar paxta maydonlari mavjud boʻlib, gʻoʻzalarimiz rivoji ham yaxshi. Birinchi suvga qongan nihollarimiz yoppasiga gulga kirdi. Baliqchilik, chorvachilik kabi qoʻshimcha tarmoqlardan ham yaxshi daromad olayapmiz.

Bunda bizga tumanimizning koʻptarmoqli fermer xoʻjaliklarida toʻplangan tajribalar qoʻl kelmoqda.

Yurtboshimiz I.Karimov: "Fermer nafaqat dehqonchilik sirlarini puxta bilishi, ayni paytda u iqtisodchi, hisobchi, menejer, selektsioner, biznesmen, kerak boʻlsa, diplomat boʻlmogʻi zarur. Bugungi hayot oldimizga qoʻyayotgan yangi-yangi vazifalarni yaxshi bilishi, odamlarning, ayniqsa, qishloq ahlining turmush darajasini yana-da yaxshilash, yurtimizni bundan-da obod qilishda faol ishtirok etishi kerak", - deya taʼkidladilar, fermerlarga qishloq xoʻjaligi sohasining hal qiluvchi kuchi, deya yuksak ishonch bildirdilar. Shu safda oʻzimning ham borligimdan gʻururlanaman, yanada unumliroq ishlashga harakat qilaman.

Ilhom POLVONOV,

"Bogʻi Eram” fermer xoʻjaligi raisi.

(Foto - http://www.12news.uz)