ShIFOKORLAR SULOLASI DAVOMChISI

Hayot mohir muallim – garchi gapirmasada, yon-atrofdagi voqea-hodisalarda toʻgʻri xulosa chiqarishga oʻrgatadi, oqil donishmand hamki, yaxshi-yomonni farqlashga oʻrgatadi va yana odil tarozibondirki, har kimning qanday insonligini, bahosini koʻrsatib turadi.

Tuman Tibbiyot birlashmasiga qarashli Bolalar poliklinikasida pulmonolog shifokor boʻlib ishlaydigan Feruza Shomurodovani ham xizmatlari tufayli taniydiganlar, hurmat qiladiganlar koʻp.

Sohaga mehr uning qonida bor desak, adashmagan boʻlamiz. Otasi tumanimiz tibbiyoti ravnaqiga munosib hissa qoʻshgan rahmatlik taniqli shifokor Xudoyor Shomurodov, onasi mahoratli hamshira Norgul opaning bolalar sogʻligʻi uchun fidoyilik qilishlarini koʻrib ulgʻaygan qiz 38-sonli maktabni tugatib, Samarqand Davlat Pediatriya oliygohiga oʻqishga kirdi. Institutni tugatgach, 1996-1997-yillarda Nukus shahridagi Respublika kasalxonasida internatura oʻtadi.

1997-yilning iyulidan boshlab, tuman Tibbiyot birlashmasining Bolalar poliklinikasida ishlab kelmoqda.

Feruza ayni kunda davlatimizda aholi orasida sogʻlom turmush tarzi, tibbiy madaniyatni yuksaltirish, jismoniy faollik keng targʻib etilayotganidan xursandligini quvonib taʼkidlaydi. Chunki bolalar orasidagi koʻpgina kasalliklar turmush tarzimizdan kelib chiqayapti, deb hisoblaydi.

Ayni kunlarda uning qabuliga kuniga 30 nafardan ziyod 18 yoshgacha boʻlgan yoshlar, oʻsmirlar, bolalar nafas yoʻllari kasalliklaridan shikoyat qilib kelishadi.

Bolalar shifokori boʻlishning oʻziga yarasha murakkabliklari bor. Chunki yosh bolajonlar oʻzlaridagi kasallik belgilarini ayta olmaydi, shifokor bolaning ahvoliga qarab, tekshiruvlar natijasiga koʻra davo muolajasini buyuradi. Bolalar holatini his qilish, har bir bemorga induvidual yondoshish lozim.

Ayniqsa, koronavirus pandemiyasi davrida oʻzining, oila aʼzolarining sogʻligʻini xavf ostiga qoʻyib, kuniga 10-12 soatlab ishladi. Kuniga 70-80 nafarlab bemorlarni qabul qilib, ahvoliga qarab, statsionar yo uy sharoitida davolanishga yoʻnaltirdi, davo muolajalarini olishini nazorat qildi va sogʻayib, hayotga qaytishiga sababchi boʻldi.

– Ilohim, oʻsha xavf-xatarlar orqamizda qolgani rost boʻlsin! Bilasizmi, oʻzimga ham yuqib qolsachi, degan oʻy koʻnglimga kelgan vaqtlar boʻldi, farzandlarim koʻz oʻngimga kelardi. Biroq qoʻrqqanim yoʻq. Shifokor kasallikdan qoʻrqsa, yutqazadi.

Ming shukur, tahlikali davrlardan oʻtib, bugungiday osoyishta kunlarga yetdik, – deydi mamnunlik bilan fidoyi shifokor Feruza Shomurodova.

U obroʻ-eʼtiborli shifokor boʻlish bilan birga olti nafar farzandlarini ham turmush oʻrtogʻi bilan hamjihatlikda elga munosib qilib voyaga yetkazishayapti. Uchovi oliygohlar talabalari, uch egizak farzandlari esa maktab oʻquvchilari.

Uy-roʻzgʻor, farzand tarbiyasi bilan xizmat vazifasini ham birgalikda uddalab kelayotgan mahoratli shifokorga tolmas kuch-quvvat tilab, 8-mart bayrami bilan qutlab qolamiz.

Oygul RAJABOVA.