ШИФОКОРЛАР СУЛОЛАСИ ДАВОМЧИСИ

Ҳаёт моҳир муаллим – гарчи гапирмасада, ён-атрофдаги воқеа-ҳодисаларда тўғри хулоса чиқаришга ўргатади, оқил донишманд ҳамки, яхши-ёмонни фарқлашга ўргатади ва яна одил тарозибондирки, ҳар кимнинг қандай инсонлигини, баҳосини кўрсатиб туради.

Туман Тиббиёт бирлашмасига қарашли Болалар поликлиникасида пульмонолог шифокор бўлиб ишлайдиган Феруза Шомуродовани ҳам хизматлари туфайли танийдиганлар, ҳурмат қиладиганлар кўп.

Соҳага меҳр унинг қонида бор десак, адашмаган бўламиз. Отаси туманимиз тиббиёти равнақига муносиб ҳисса қўшган раҳматлик таниқли шифокор Худоёр Шомуродов, онаси маҳоратли ҳамшира Норгул опанинг болалар соғлиғи учун фидойилик қилишларини кўриб улғайган қиз 38-сонли мактабни тугатиб, Самарқанд Давлат Педиатрия олийгоҳига ўқишга кирди. Институтни тугатгач, 1996-1997 йилларда Нукус шаҳридаги Республика касалхонасида интернатура ўтади.

1997 йилнинг июлидан бошлаб, туман Тиббиёт бирлашмасининг Болалар поликлиникасида ишлаб келмоқда.

Феруза айни кунда давлатимизда аҳоли орасида соғлом турмуш тарзи, тиббий маданиятни юксалтириш, жисмоний фаоллик кенг тарғиб этилаётганидан хурсандлигини қувониб таъкидлайди. Чунки болалар орасидаги кўпгина касалликлар турмуш тарзимиздан келиб чиқаяпти, деб ҳисоблайди.

Айни кунларда унинг қабулига кунига 30 нафардан зиёд 18 ёшгача бўлган ёшлар, ўсмирлар, болалар нафас йўллари касалликларидан шикоят қилиб келишади.

Болалар шифокори бўлишнинг ўзига яраша мураккабликлари бор. Чунки ёш болажонлар ўзларидаги касаллик белгиларини айта олмайди, шифокор боланинг аҳволига қараб, текширувлар натижасига кўра даво муолажасини буюради. Болалар ҳолатини ҳис қилиш, ҳар бир беморга индувидуал ёндошиш лозим.

Айниқса, коронавирус пандемияси даврида ўзининг, оила аъзоларининг соғлиғини хавф остига қўйиб, кунига 10-12 соатлаб ишлади. Кунига 70-80 нафарлаб беморларни қабул қилиб, аҳволига қараб, стационар ё уй шароитида даволанишга йўналтирди, даво муолажаларини олишини назорат қилди ва соғайиб, ҳаётга қайтишига сабабчи бўлди.

– Илоҳим, ўша хавф-хатарлар орқамизда қолгани рост бўлсин! Биласизми, ўзимга ҳам юқиб қолсачи, деган ўй кўнглимга келган вақтлар бўлди, фарзандларим кўз ўнгимга келарди. Бироқ қўрққаним йўқ. Шифокор касалликдан қўрқса, ютқазади.

Минг шукур, таҳликали даврлардан ўтиб, бугунгидай осойишта кунларга етдик, – дейди мамнунлик билан фидойи шифокор Феруза Шомуродова.

У обрў-эътиборли шифокор бўлиш билан бирга олти нафар фарзандларини ҳам турмуш ўртоғи билан ҳамжиҳатликда элга муносиб қилиб вояга етказишаяпти. Учови олийгоҳлар талабалари, уч эгизак фарзандлари эса мактаб ўқувчилари.

Уй-рўзғор, фарзанд тарбияси билан хизмат вазифасини ҳам биргаликда уддалаб келаётган маҳоратли шифокорга толмас куч-қувват тилаб, 8 март байрами билан қутлаб қоламиз.

Ойгул РАЖАБОВА.