MADANIYaT OYLIGI DOIRASIDA TADBIRLAR OʻTKAZILDI

Oʻzbekiston Respublikasi Madaniyat vazirligi tomonidan fevral – Madaniyat oyligi deya eʼlon qilinganligi munosabati bilan tumanimizdagi 9-sonli Bolalar musiqa va sanʼat maktabida ham koʻpgina saʼy-harakatlar amalga oshirilmoqda.
Inson zoti borki, doimo koʻngliga ruhiy ozuqa baxsh etuvchi sanʼat asarlariga, kuy-qoʻshiqlarga doimo ehtiyoj sezib yashaydi, boʻsh vaqtlarida qoʻshiq tinglab orom olgisi keladi. Ayniqsa, jajji oʻgʻil-qizlarning ijrosidagi qoʻshiq, raqslar barchaga ham zavq-shavq, koʻtarinki kayfiyat bagʻishlaydi, ruhimiz tozaradi. Shuning uchun ham 9-sonli Bolalar musiqa va sanʼat maktabi rahbariyati, oʻqituvchilar jamoasi oylik doirasida oʻquvchilar ijrosida koʻpgina kontsert dasturlarini namoyish etishni rejalashtirganlar.

Shu yilning 18-fevralida Mangʻit shahridagi Istirohat bogʻida namoyish etilgan «Yoshlar bizning kelajagimiz» deb nomlangan kontsert ham shular jumlasidan. Kontsertda oʻqituvchilar va oʻquvchilar ijrosida diltortar ashulalar, raqslar va teatrlashtirilgan kompoziyalar ijro etildi.

Kontsert barcha tomoshabinlarga yorqin taassurotlar baxsh etdi.
19-fevral kuni esa maktabning anʼanaviy cholgʻu, xoreografiya va teatr sinflari oʻquvchilari 38-sonli umumiy oʻrta taʼlim maktabi oʻquvchilari uchun maktab faollar zalida «Beshta muhim tashabbus – beshta imkoniyat» gʻoyasini oʻzida aks ettirgan ulkan kontsert dasturini  havola etdilar.

Dasturda sahna koʻrinishlari, raqs va ashulalar ijro etildi.
Maktab oʻquvchilari oʻz tengdoshlari kontsertidan ulkan taassurotlar oldilar.

Oygul RAJABOVA.