QILIChBOYLIK MOHIR NONVOY

Qilichboy ovuli azaldan yer bilan tillashib, dur undiruvchi dehqonlari, sohibkor-u bogʻbonlari, usta-hunarmandlari bilan mashhur. Shuning uchun ham nafaqat tumanimizda, balki qoʻshni tumanlarda ham qilichboyliklar yetishtirgan tabiat neʼmatlari, hunarmandchilik buyumlarining qadri baland.
Mustaqillik yillarida bu zaminda tadbirkorlik sohasi ham ravnaq topdi. Koʻptarmoqli fermer xoʻjaliklari safi oshdi. Ovul ahliga yengillik, qulaylik yaratishga bel bogʻlagan tadbirkorlar mehnati bilan oʻnlab xizmat koʻrsatish shoxobchalari bunyod etilib, oʻz faoliyatini boshladi. Pirovardida koʻplab yoshlarning ish bilan bandligi taʼminlandi. Dilbarxon Bekmurodova ana shunday tadbirkorlardan biri. U ayrimlarga oʻxshab chetdi ishlab, pul topish haqida oʻylamadi. Xalqning kundalik ehtiyojiga monand ravishda nonvoylik bilan shugʻullanishga qaror qildi. Buning uchun zarur mablagʻ va xarajatlarni ham oʻzi topdi. Yetmaganiga roʻzgʻoridagi don-dunini ishlatdi. Dastlabki yopgan nonlari tezda sotilib ketdi. Xalq ehtiyojidan kelib chiqib, ertasiga yanada koʻproq non yopdi. Qarasa, mijozlar koʻpaygandan-koʻpayib borayapti. Oʻylab oʻtirmay, yoniga mahalladosh 3 nafar ayol-qizni ishga oldi. Yangidan tandirxona barpo etdi. Ovul ahlining buyurtmalari asosida ish yurita boshladi. Yupqa non, choʻrak, turkmani choʻrak, patir nonlarga talab yanada koʻpaydi. Aholi buyurtmasiga koʻra, toʻy-marosimlar uchun non va patir, somsa yopishni, keksalar uchun uylariga eltib berish xizmatini yoʻlga qoʻydi. Bu ishlarni amalga oshirishda Dilbarxonga yordamchilari Yulduzxon Toʻrayeva va Marhobaxon Toʻrayevalar yaqindan yordam berishmoqda.
- Ovulimiz ahliga xizmat qilayotganimdan xursandman, - deydi, Dilbarxon mamnuniyat bilan. – Birov turkmancha choʻrak, yana birov sedanali non va somsa, qat-qat patir non buyurtma qilishadi. Barchasini mijozlarning koʻnglidagiday qilib bajarishga harakat qilamiz.
Ayni paytda Dilbarxon Bekmurodova oʻz shogirdlari bilan toʻy nonlari tayyorlab bermoqda. Ovul ahlining ogʻirini yengil, mushkulini oson qilib, quvonchli kunlarida dasturxonlarining eng oliy neʼmati – issiqqina non yopib berayotganidan Dilbarxon mamnun. Yangi yilda nonvoyxona faoliyatini yana kengaytirishni reja qilgan mohir nonvoy Dilbarxon Bekmurodovaga:
- Tandiringiz nonga toʻlsin-u el-yurt rizqi yanada ziyoda boʻlsin! –  deymiz!

Oyimjon Oʻrozaliyeva, mehnat faxriysi.