ҚИЛИЧБОЙЛИК МОҲИР НОНВОЙ
Қиличбой овули азалдан ер билан тиллашиб, дур ундирувчи деҳқонлари, соҳибкор-у боғбонлари, уста-ҳунармандлари билан машҳур. Шунинг учун ҳам нафақат туманимизда, балки қўшни туманларда ҳам қиличбойликлар етиштирган табиат неъматлари, ҳунармандчилик буюмларининг қадри баланд.
Мустақиллик йилларида бу заминда тадбиркорлик соҳаси ҳам равнақ топди. Кўптармоқли фермер хўжаликлари сафи ошди. Овул аҳлига енгиллик, қулайлик яратишга бел боғлаган тадбиркорлар меҳнати билан ўнлаб хизмат кўрсатиш шохобчалари бунёд этилиб, ўз фаолиятини бошлади. Пировардида кўплаб ёшларнинг иш билан бандлиги таъминланди. Дилбархон Бекмуродова ана шундай тадбиркорлардан бири. У айримларга ўхшаб четди ишлаб, пул топиш ҳақида ўйламади. Халқнинг кундалик эҳтиёжига монанд равишда нонвойлик билан шуғулланишга қарор қилди. Бунинг учун зарур маблағ ва харажатларни ҳам ўзи топди. Етмаганига рўзғоридаги дон-дунини ишлатди. Дастлабки ёпган нонлари тезда сотилиб кетди. Халқ эҳтиёжидан келиб чиқиб, эртасига янада кўпроқ нон ёпди. Қараса, мижозлар кўпайгандан-кўпайиб бораяпти. Ўйлаб ўтирмай, ёнига маҳалладош 3 нафар аёл-қизни ишга олди. Янгидан тандирхона барпо этди. Овул аҳлининг буюртмалари асосида иш юрита бошлади. Юпқа нон, чўрак, туркмани чўрак, патир нонларга талаб янада кўпайди. Аҳоли буюртмасига кўра, тўй-маросимлар учун нон ва патир, сомса ёпишни, кексалар учун уйларига элтиб бериш хизматини йўлга қўйди. Бу ишларни амалга оширишда Дилбархонга ёрдамчилари Юлдузхон Тўраева ва Марҳобахон Тўраевалар яқиндан ёрдам беришмоқда.
- Овулимиз аҳлига хизмат қилаётганимдан хурсандман, - дейди, Дилбархон мамнуният билан. – Биров туркманча чўрак, яна биров седанали нон ва сомса, қат-қат патир нон буюртма қилишади. Барчасини мижозларнинг кўнглидагидай қилиб бажаришга ҳаракат қиламиз.
Айни пайтда Дилбархон Бекмуродова ўз шогирдлари билан тўй нонлари тайёрлаб бермоқда. Овул аҳлининг оғирини енгил, мушкулини осон қилиб, қувончли кунларида дастурхонларининг энг олий неъмати – иссиққина нон ёпиб бераётганидан Дилбархон мамнун. Янги йилда нонвойхона фаолиятини яна кенгайтиришни режа қилган моҳир нонвой Дилбархон Бекмуродовага:
- Тандирингиз нонга тўлсин-у эл-юрт ризқи янада зиёда бўлсин! – деймиз!
Ойимжон Ўрозалиева, меҳнат фахрийси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
