AHOLI TIBBIY XATLOVDAN OʻTKAZILMOQDA

Tibbiyotning tasdiqlashicha, jismoniy faollik hamda ovqatlanish meʼyor va qoidalariga amal qilmaslik, yetarli darajada vitamin va minerallar isteʼmol qilmaslik, tarkibida  yogʻ, tuz miqdori koʻp boʻlgan taomlarni  koʻp yeyish – aholining  yurak-qon tomir, endokrin, xavfli oʻsma kabi kasalliklarga chalinishiga, yoshlarning aqliy oʻsishdan ortda  qolishiga sabab boʻlar ekan.

Endilikda aholi salomatligini himoya qilish boʻyicha Prezidentimizning tegishli Qaroriga  muvofiq 2021-yilning 1-iyunidan boshlab, 6-23 oylik bolalar uy sharoitida tayyorlangan ovqatlarni boyitish maqsadida mikro nutriyent kukuni, 6 oylikdan 5 yoshgacha boʻlgan bolalar “A” vitamini, 2-10 yoshdagi bolalar gelmentoz profilaktikasi boʻyicha preparatlar bilan bepul taʼminlanadi. Shuningdek, tibbiyot xodimlari aholi  orasida sogʻlom  turmush tarzini qoʻllab-quvvatlash, jismoniy faollikning inson salomatligi uchun zarurligini keng targʻib etishadi.

Qarorga muvofiq 2022-yil 1-yanvarga  qadar mahallalar kesimida yuqumli  boʻlmagan kasalliklar boʻyicha “aholining salomatlik profili” shakllantiriladi, yaʼni tibbiy xatlov oʻtkaziladi. Bunda aholining ovqatlanish xarakateri, tana vazni indeksi, spirtli ichimlik va tamakiga qaramlilikning mavjudligi, arterial bosim, qondagi qand miqdori va xolesterin darajasi kabi koʻrsatkichlarning qamrab olinishi nazarda tutilgan. Bu ishlarni amalga oshirishga birlamchi tibbiy boʻgʻinlarda umumiy  amaliyot shifokori oʻrniga oilaviy shifokor va tajribali hamshiralardan iborat tibbiy brigadalar tuzildi.

Bu vazifalarning bajarilishida qishloq oilaviy poliklinikalari  zimmasiga masʼuliyatli vazifalar yuklangan. Ayni kunda bu borada tumanimizda ham amaliy harakatlar boshlab yuborildi.

21-yanvar kuni Oʻzbekiston Respublikasi Sogʻliqni  saqlash vaziri oʻrinbosari Shohruh Sharahmedov, Qoraqalpogʻiston Respublikasi Sogʻliqni saqlash vaziri Murod Qurbonov va bir guruh masʼullar Amudaryo tumanidagi 1-sonli oilaviy  poliklinikada boʻlishib, yuqoridagi masalalar yuzasidan amalga oshirilayotgan ishlar, oilaviy shifokorlar ishtirokida tuzilgan tibbiy brigadalar faoliyati, xatlov jarayoni bilan tanishdilar.

Shuningdek, masʼullar oʻzgalar parvarishiga muhtoj, nogironligi boʻlgan shaxslarning uylariga borib, holidan xabar olishdi.

Tashrif davomida Qoraqalpogʻiston Respublikasi Sogʻliqni saqlash vaziri Murod Qurbonov tuman Tibbiyot birlashmasiga murakkab jarrohlik amaliyotini amalga  oshirishda foydalaniladigan zamonaviy laparoskop uskunasini topshirdi.

Tibbiyot sohasi masʼullari tumanimizga tashrifi davomida yangi amaliyot – aholini tibbiyot xatlovdan oʻtkazish borasida muhim yoʻl-yoʻriq va maslahatlar berdilar.

Oygul RAJABOVA.