“SPORTNI SEV, SPORT BILAN YaShA!” ShIORI OSTIDA MUSOBAQALAR OʻTKAZILDI

Mamlakatimizda yosh avlodning jismoniy tarbiya va sport bilan shugʻullanishi uchun zamon talablariga mos shart-sharoitlar yaratilmoqda, sport musobaqalarini  tashkil etish orqali ularda oʻz irodasi, kuchi va imkoniyatlariga boʻlgan ishonchni mustahkamlash, iqtidorli sportchilarni saralab olish imkoni yaratilmoqda. Natijada oʻsib kelayotgan yosh avlodni zararli odatlardan asrash, ularning boʻsh vaqtlari maqsadli va mazmunli oʻtkazilishiga erishilayapti.

“Sportni sev, sport bilan yasha!” - bu shior ayni kunda nafaqat yoshlarning,  balki, butun xalqimizning hayotiy shioriga aylanmoqda, jismoniy tarbiya va sport hayot tarzimizdan chuqur oʻrin egallamoqda.

Yaqinda Vatan himoyachilari kuniga bagʻishlanib, Amudaryo tumani Ichki ishlar boʻlimi va tuman Bolalar-oʻsmirlar sport maktabi hamkorligida tashkil etilgan dzyudo kurashi musobaqasi ham tumanimiz yosh polvonlari uchun bayram tuhfasi boʻldi. Musobaqada 2007-2009-yillarda tugʻilgan oʻsmirlar 32, 35, 38, 42, 50, 60 va 66 kilogramm vazn toifalarida oʻzaro bellashdilar.

Musobaqa oldidan oʻtkazilgan saflanishda Bolalar-oʻsmirlar sport maktabi direktori Chorsham Tojimurodov yosh polvonlarni, barchani 14-yanvar – Vatan himoyachilari kuni va milliy armiyamiz tashkil etilgan kun bilan qizgʻin tabrikladi. Bugungiday osuda  hayotimizni Vatanimizga cheksiz sadoqati, farzandlik burchi va kuchi, yigitlik shijoati bilan ishonchli qoʻriqlab turgan harbiylarga oʻz minnatdorchiligini  bildirib, yosh sportchilarni ularga munosib oʻrinbosarlar boʻlishga chaqirdi. Tuman Ichki ishlar boʻlimi  sovrini uchun oʻtkazilayotgan musobaqada barchani oʻz iqtidorini namoyon etishga chaqirdi.

“Sportni sev, sport bilan yasha!” shiori ostida oʻtkazilgan dzyudo boʻyicha sport maktab ochiq birinchilik musobaqasini 32 kilogramm vazn toifasidagi polvonlar boshlab berdilar. Maktabning tajribali murabbiyi Kamoladdin Norimov bosh hakamlik qilgan ochiq birinchilik musobaqasida Islom Adamboyev, Xushnud Sultonov, Kamron Ollaniyozov, Jasur Boltaboyev, Shohruh Sultonov, Umidjon Kamolov, Dilshodbek Rajabovlar oʻzlarining barcha raqiblaridan ustun kelib, gʻoliblikni  qoʻlga  kiritdilar. Shohruh Shomurodov, Abror Shomurodov, Zokirjon Saʼdullayev, Diyorbek Tursunboyev, Javohir Qodirov, Samir Yangiboyev, Rahmatjon Ismoilovlar esa ikkinchi oʻrinlarni yengib olishdi.

Shuningdek, Samandar Ozodov, Hidoyat Qurbonboyev, Xalil Ozodov, Javohir Bozorboyev, Zafarbek Boltaboyev, Kamronbek Boymurodov, Samandar Omonboyev, Quvonch Duzelboyev, Hakimboy Safarboyev, Omon Nazirboyev, Akbar Jobborberganov, Akbarali Chorshamov, Boburjon Egamberganov, Joʻrabek Murodovlar esa faxrli uchinchi oʻrinni egalladilar.

Musobaqa gʻoliblariga tuman Ichki ishlar boʻlimining sovrini va esdalik sovgʻalari topshirildi.

“Sportni sev, sport bilan yasha!” shiori ostida boʻlib oʻtgan sport maktab ochiq birinchiligi musobaqalari yosh sportchilarni dzyudo bilan sidqidildan, qunt bilan shugʻullanib, yangi-yangi marralarni egallashga ruhlantirdi, yosh sportchilarning oʻzlariga boʻlgan masʼuliyatini yanada oshirdi, kuchlilar musobaqalarda aniqlanishini yana bir bor isbotladi.

O.RAJABOVA.