Amudaryo tumanida targʻibot tadbirlari oʻtkazildi

Oʻzbekiston Respublikasi Prezidenti Shavkat Mirziyoyevning 2020-yil 29-dekabrdagi Oliy Majlisga Murojaatnomasining mazmun-mohiyatini keng targʻib qilish maqsadida tuman faollari bilan uchrashuvlar oʻtkazilmoqda.

15-yanvar kuni Amudaryo tumanidagi 9-sonli bolalar musiqa va sanʼat maktabida ham targʻibot guruhi aʼzolari ishtirokida tadbir tashkil qilindi.

Tumandagi 2-sektor hududida joylashgan muassasa, korxona va tashkilotlar rahbarlari ishtirok etgan tadbirda dastlab Prezidentimizning Parlamentga Murojaatnomasining mazmun-mohiyati haqida professor-oʻqituvchilar tomonidan batafsil tushunchalar berildi.

Maʼnaviy-maʼrifiy tadbirda Xalq taʼlimi tizimi vakillari, fuqarolarning oʻzini oʻzi boshqarish organlari masʼullari, hududdagi tashkilot va korxonalar mehnat jamoalari vakillari hamda rahbarlari, tadbirkorlar, maktablardagi yoshlar yetakchilari, tibbiyot sohasi vakillari qatnashdi.

Targʻibot guruhi aʼzolari taʼkidlab oʻtganlaridek, davlatimiz rahbari tomonidan mamlakat Parlamentiga yoʻllagan Murojaatnoma mamlakatimizning joriy yil va yaqin istiqboldagi taraqqiyotini belgilab beruvchi strategik hujjat boʻldi. Murojaatnomada bayon qilingan vazifalar ijrosi xalqimiz farovonligi va yurtimiz taraqqiyotida yangi sahifa ochib berishi shubhasiz. Davlatimiz rahbari 2020-yilda Oʻzbekistonda amalga oshirilgan ulkan islohotlarni tahliliy bayon qilar ekanlar, pandemiya va turli texnogen ofatlarga qaramay, Oʻzbekiston oʻtgan yilda koʻplab ijobiy natijalarga erishgan kamdan-kam davlatlardan biri boʻlganini va bu yutuqlar xalqaro miqyosda eʼtirof etilganini taʼkidladilar.

Muhtaram Prezidentimiz mamlakat taraqqiyotida taʼlim va tarbiyaning oʻrni beqiyos ekaniga alohida eʼtibor qaratib, “Yangi Oʻzbekiston maktab ostonasidan, taʼlim-tarbiyadan boshlanadi” degan gʻoya asosida taʼlim tizimida ham katta islohotlar amalga oshirilishini taʼkidlab oʻtdilar.

Murojaatnomada yangi Oʻzbekistonni har tomonlama yetuk va bilimli yoshlar bilan birgalikda barpo etish ustuvor vazifa etib belgilandi. Prezidentimiz tashabbuslari bilan 2021-yil – Yoshlarni qoʻllab-quvvatlash va aholi salomatligini mustahkamlash yili deb eʼlon qilingani, har bir fuqaro, xususan, mamlakatimiz yoshlariga katta quvonch, faxr va iftihor baxsh etdi. Prezidentimiz mamlakat kelajagi yoshlarning har tomonlama barkamol boʻlib voyaga yetishlariga bogʻliq ekanini yana bir bora taʼkidlab, bola tugʻilganidan to 30 yoshgacha yetgunicha qamrab olinadigan milliy tizim yaratish strategik vazifa etib belgilanganini aytib oʻtdilar.

Tadbirda targʻibot guruhi aʼzolari Murojaatnomada barcha yoʻnalishlar boʻyicha belgilab berilgan vazifalarga keng turda toʻxtalib oʻtdilar hamda ishtirokchilarni joriy yilgi davlat dasturi hamda tuman hududiy dasturiga xalq farovonligi va mamlakat taraqqiyotiga xizmat qiluvchi takliflarni kiritishga chaqirdilar.

Amudaryo tumanidagi 3-sektor hududida joylashgan muassasa, korxona va tashkilotlar rahbarlari ishtirokida ham targʻibot tadbirlari tashkil qilindi. Maʼnaviy-maʼrifiy tadbirda Prezidentimizning Parlamentga Murojaatnomasining mazmun-mohiyati haqida keng tushunchalar berildi.

Tadbirda soʻz olganlar Murojaatnomada davlat va jamiyat qurilishi tizimini takomillashtirish borasida ilgari surilgan taklif va gʻoyalar, qonun ustuvorligini taʼminlash va sud-huquq tizimini yanada isloh qilishga doir belgilangan ustuvor yoʻnalishlar, iqtisodiyotni rivojlantirish va liberallashtirish borasidagi vazifalar, ijtimoiy sohani rivojlantirishga doir ilgari surilgan gʻoyalar haqida batafsil toʻxtalib oʻtdilar. Shuningdek, Murojaatnomadan oʻrin olgan xavfsizlik, millatlararo totuvlik va diniy bagʻrikenglikni taʼminlash hamda chuqur oʻylangan, oʻzaro manfaatli va amaliy tashqi siyosat sohasidagi ustuvor yoʻnalishlar sharhi ham ishtirokchilarda katta taassurotlar qoldirdi.

Yigʻilish soʻngida targʻibotchilar ishtirokchilarni Murojaatnomada koʻtarilgan vazifalarni amalga oshirishga oʻz hissasini qoʻshishga daʼvat qildilar.

Amudaryo tumani Davlat soliq xizmati rahbari boshchiligidagi 4-sektor hududida ham shu kabi targʻibot tadbiri oʻtkazildi. Tadbirda taʼkidlanganidek, davlatimiz rahbarining Oliy Majlisga yoʻllagan Murojaatnomasi mamlakatimizning ijtimoiy-siyosiy hayotidagi muhim voqea boʻldi. Unda oʻtgan 2020-yilda amalga oshirilgan ishlar, erishilgan natijalar hamda bu yil amalga oshirilidagina ustuvor vazifalar belgilab berildi. Murojaatnomada Prezidentimiz davlat va jamiyatni yanada  rivojlantirish bilan bogʻliq eng asosiy yoʻnalishlar, barcha darajadagi davlat hokimiyati va boshqaruvi organlarining qator ustuvor vazifalarini belgilab berdi.

Maʼnaviy-maʼrifiy tadbirda soʻzga chiqqanlar Murojaatnomaning mazmun-mohiyati, asosiy yoʻnalishlari, unda ilgari surilgan fikrlar, iqtisodiy, ijtimoiy sohalarda amalga oshirilishi belgilangan asosiy vazifalar, ularni samarali tashkil etish yoʻllari xususida ishtirokchilarga keng tushuncha va maʼlumotlar berdi.

Savol-javob, ochiq muloqot tarzida oʻtgan tadbir iitirokchilari Murojaatnoma yuzasidan oʻzlarini qiziqtirgan barcha savollarga batafsil javoblar oldi. “2021-yil: yangi marralar, yakdil qadamlar” shiori ostida tumandagi toʻrtta sektor hududida oʻtkazilgan maʼnaviy-maʼrifiy targʻibot tadbirlari ishtirokchilari kelgusida oʻz ovul va mahallalari, mehnat jamoalarida Murojaatnomaning mazmun-mohiyati va uning doirasida 2021-yilda amalga oshiriladigan ulkan ishlarni keng xalq ommasiga yetkazishga oʻz hissalarini qoʻshadilar.

Amudaryo tumani hokimligining axborot xizmati.