XALQ DEPUTATLARI TUMAN KENGAShINING 21-SESSIYaSI TOʻGʻRISIDA AXBOROT

Joriy yilning 29-noyabr kuni Xalq deputatlari tuman Kengashining 21-sessiyasi boʻlib oʻtdi. Sessiya majlisida tuman hokimi oʻrinbosarlari, hokimlik masʼul xodimlari, boʻlimlar rahbarlari, xalq taʼlimi muassasalari rahbarlari hamda ommaviy axborot vositalari vakillari ishtirok etdilar. Sessiya ishiga tuman hokimi Sultonboy Yoʻldashev raislik qildi hamda sessiyani olib bordi.
Sessiya kun tartibida turli masalalar muhokamaga qoʻyildi.

Sessiya kun tartibida dastlabki – Qoraqalpogʻiston Respublikasi Joʻqorgʻi Kengesi Prezidiumining 2020-yil 21-noyabr kungi “2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlarining ijrosi ustidan parlament nazoratini amalga oshirish toʻgʻrisida”gi 151-sonli qarori haqida”gi masala yuzasidan tuman hokimi oʻrinbosari, investitsiyalar va tashqi savdo boʻlimi boshligʻi Rashid Salayevning axboroti tinglandi.

Axborotda tumanda mazkur hujjat ijrosini taʼminlash borasida amalga oshirilayotgan ishlar xususida soʻz yuritildi. Xususan, aholining ijtimoiy nochor qatlamlarini qoʻllab-quvvatlash, ushbu maqsadda ajratilgan davlat mablagʻlaridan qonun hujjatlarida belgilangan tartibda maqsadli va samarali foydalanilishini taʼminlash, fuqarolar yigʻini raislari, uning oʻrinbosarlari va maslahatchilari tomonidan fuqarolar yigʻini faoliyatining asosiy yoʻnalishlari boʻyicha olib borilayotgan ishlar, hududdagi taʼlim muassasalari, oilaviy poliklinikalar, qishloq vrachlik punktlari rahbarlarining faoliyatini doimiy nazoratga olish va tahlil qilib borish yuzasidan belgilangan vazifalar toʻgʻrisida axborot berildi.

Yigʻilish kun tartibidagi navbatdagi “Fuqarolarning oʻzini oʻzi boshqarish organlari toʻgʻrisida”gi Oʻzbekiston Respublikasi Qonunining tumandagi ijrosi toʻgʻrisida”gi masala yuzasidan tuman hokimining oʻrinbosari – Mahalla va oilani qoʻllab-quvvatlash boʻlimi boshligʻi Alisher Yoʻldoshev axborotida tumanda kam taʼminlangan oilalarga moddiy yordam koʻrsatish va voyaga yetmagan bolalari boʻlgan muhtoj oilalarga, ikki yoshga toʻlmagan bolalari bor ishlamaydigan onalarga ijtimoiy nafaqalar tayinlash va toʻlash boʻyicha yoʻl qoʻyilgan kamchiliklar xususida toʻxtalib oʻtdi. Bu borada sustkashlik qilgan oqsoqollarga tegishlicha choralar qoʻrish lozimligini qayd etdi.

Huquqbuzarliklarning oldini olish va ularning profilaktikasi holati toʻgʻrisidagi masala ham sessiya kun tartibidan oʻrin oldi. Ushbu masala yuzasidan tuman Ichki ishlar boʻlimi boshligʻi oʻrinbosari – huquqbuzarliklar profilaktikasi boʻlinmasi boshligʻi Baxtiyor Oʻrozov oʻz hisobotida tumanda jinoyatchilik va huquqbuzarliklarning barvaqt oldini olishda jamoatchilik institutlari, mahalla faollari bilan hamkorlikda chora-tadbirlar olib borilayotganini alohida taʼkidladi. Buning natijasida mahallalarda yashovchi, jinoyat qilishga moyil shaxslar alohida nazoratga olingani, ular tomonidan sodir etilishi mumkin boʻlgan jinoyatlar keskin kamaytirishga erishilgani xususida toʻxtalib oʻtdi.

Sessiyada navbatdagi – aholiga tibbiy xizmat koʻrsatish sifatini oshirish borasida amalga oshirilayotgan ishlar yuzasidan tuman Tibbiyot birlashmasi boshligʻi vazifasini vaqtincha bajaruvchisi Zokirjon Oʻrozboyevning hisoboti tinglandi. Hisobotda davlatimiz rahbarining cogʻliqni saqlash tizimi birlamchi boʻgʻinida tibbiy xizmat sifatini yanada takomillashtirish va aholi oʻrtasida sogʻlom turmush tarzini shakllantirish boʻyicha belgilangan chora-tadbirlarni amalga oshirish borasida tuman Tibbiyot birlashmasida amalga oshirilayotgan izchil ishlar toʻgʻrisida maʼlumot berildi.

Shundan soʻng, navbatdagi “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni talablarini bajarishda tumandagi muassasa, korxona va tashkilot rahbarlarining javobgarligi haqidagi masala muhokama  qilindi. Mazkur masala xususida tuman hokimligi devonxona mudiri Xamro Yuldashovning axboroti tinglandi. U oʻz axborotida tuman hokimligiga 2020-yilning 9 oyi davomida  jismoniy va yuridik shaxslardan 1219 ta yozma va ogʻzaki murojaatlar kelib tushganligi, murojaatlar  qonun talablari asosida roʻyxatdan oʻtkazilib, ijrochilarga oʻz vaqtida yetkazilganligi va belgilangan muddatlarda oʻrganilib, ariza mualliflariga tegishli javoblar berilganligi xususida maʼlumot berdi.

Tumanda millatlararo munosabatlarni mustahkamlash boʻyicha amalga oshirilayotgan ishlar toʻgʻrisida tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlari boʻyicha oʻrinbosari Mahmud Shermetov axborot berdi. Axborotda bu borada samarali ishlar olib borilayotganligi taʼkidlandi. Aholini, ayniqsa, yoshlarni millatlararo totuvlik ruhida tarbiyalashga qaratilgan tadbirlar yoshlar tarbiyasida muhim ahamiyat kasb etayotganligi qayd etib oʻtildi.

Sessiya kun tartibidagi navbatdagi masala boʻyicha tuman davlat Soliq inspektsiyasi va tuman Moliya boʻlimi rahbarlari axborotlarida tumanda soliq tushumlarining oʻz vaqtida undirilayotgani, prognoz koʻrsatkichlarining bajarilishi, pandemiya davrida tadbirkorlik subʼektlari uchun berilgan soliq imtiyozlarining amalda qoʻllanilishi hamda byudjetning barqarorligini taʼminlash, mahalliy byudjet daromadlarining qoʻshimcha rezervlarini shakllantirish va daromadlarini oshirish boʻyicha amalga oshirilayotgan ishlar xususida maʼlumotlar berishdi.

Yigʻilish kun tartibidagi soʻnggi masala – tumanda oilalarning ijtimoiy-iqtisodiy darajasini oʻrganish, ijtimoiy holatini yaxshilash va farovonligini oshirish, kambagʻallik toifasidan chiqarish boʻyicha amalga oshirilayotgan ishlar toʻgʻrisidagi tuman hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari, iqtisodiy taraqqiyot va kambagʻallikni qisqartirish boʻlimi boshligʻi Maʼmurjon Temirboyevning axborotida bu borada olib borilayotgan samarali chora-tadbirlar sanab oʻtildi.

Sessiya kun tartibida muhokama etilgan barcha masalalar yuzasidan tegishli qarorlar qabul qilindi.

Tuman hokimligining Axborot xizmati.